2 Iwhe e meru l'oge ndu eze 21 - BAYỊBURU Ẹzaa

Nteke Jehóramu bụ eze ndu Juda

¹ O noo ya, Jehóshafatu bya anwụhu lakfu nna iya whẹ lẹ maa. E lia ya l'ẹka e liru nna iya whẹ lẹ mkpụkpu Dévidi. Jehóramu, bụ nwa iya nwoke bya abụru eze l'ọzori iya.

² Jehóramu bẹ nweru unwune nwoke, bụkwawho ụnwu Jehóshafatu. Ẹwha unwune iya ono bụ: Azaríya, Jehiyẹlu, Zakaráya, Azaríya, Máyikelu ọwaa Shefataya. Gẹ whẹ ha bụkota ụnwu Jehóshafatu, bụ eze ndu Juda.

³ Nna whẹ bẹ nụru whẹ igweligwe mkpọla-ọcha, mẹe mkpọla-ododo, mẹe arya, vukota oke ọnu aswa, bya anụkota whẹ mkpụkpu, a tụru o shihu ike l'alị ndu Juda. Ọ bya eworu ọkwa onye eze nụ ọwhube Jehóramu, nkele ọo ya bụ ọkpara iya.

⁴ Nteke Jehóramu bya abụru eze, l'achị alị-eze nna iya ono, bya akpọlewho g'ọo abara, ọ tụko ụnwunna iya l'owhu gbushikota lẹ mma, hakwarụwho ndu ishi ndu Ízurẹlu gbushia.

⁵ Jehóramu bẹ gbarụ ụkporo awha l'awha iri l'ẹbo nteke ọ watarụ ọbu eze. Iwhe ọ chịru bụ awha ẹsato lẹ Jerúsalẹmu.

⁶ Ọ wọtaru ẹka ndu eze ndu Ízurẹlu, mee gẹ ndibe Éhabu meru, nkele ọ lụru ada Éhabu. O meru ejo-iwhe l'ẹnya Onye-Nwe-Ọha.

⁷ Ọle Onye-Nwe-Ọha bẹ kwobeleru-a iswi ọgbandzu yẹle Dévidi haa ọzo-ụlo Dévidi ono, t'ọ la whẹ l'iyi, nkele o kweru iya ụkwa l'ụnwu iya yẹle ẹpa iya ta abyadụ l'achị-buhu achị-buhu jeye lẹ gbururu.

⁸ Nteke Jehóramu bụ eze bẹ ndu Edọmu kwefuru ike lẹ whẹ ta anọhedu lẹ mkpula ọchichi ndu Juda. Whẹ dobe eze nkewhe, bụ onye l'a-nọ achị whẹ nụ.

⁹ Ọo ya bụ, Jehóramu chịta ndu ishi ndu ojọgu iya mẹe ụgbo-ịnya iya l'owhu, whẹ bakfu ndu Edọmu ono ọgu. Ndu Edọmu bya asọ-whee yẹle ndu ishi ụgbo-ịnya iya ono mgburumgburu. O be l'ẹnyashi, Jehóramu yẹle ndu nkiya zelihu gbushia ndu Edọmu ono.

¹⁰ Eshi nteke ono byeye ntaa bẹ ndu Edọmu l'ekwefu ike l'ọchichi ndu Juda. Nteke onokwawho bẹ ndu Libyina kwefuru ike l'ọchichi ndu Juda, o noo nkele Jehóramu bẹ jịkaru Onye-Nwe-Ọha, bụ Chileke nke nna iya whẹ.

¹¹ O nokwawho gẹ Jehóramu nọdu mowhashia ẹka l'aagwajẹ iwhe l'ugvu ugvu alị ndu Juda. O mee tẹ ndu bu lẹ Jerúsalẹmu dụ ghẹle-ghẹle-ghẹle, bya eduwhua ndu Juda ụzo.

Eláyija l'ezhi Jehóramu ozhi

¹² Ẹkwo-ozhi, shi l'ẹka Eláyija, bụ onye nkfuchiru Chileke bya erwua Jehóramu ẹka. Ẹkwo-ozhi ono l'ekfu sụ: “Ọ waa bụ iwhe Onye-Nwe-Ọha, bụ Chileke nke nna ghu Dévidi l'ekfu ndọwa: Eshi-ọwhu ị harụ ọwota ẹka nna ghu, bụ Jehóshafatu, haa ọwota ẹka Asa, bụ eze ndu Juda,

¹³ ọ bụ-chiaru ẹka ndu eze ndu Ízurẹlu b'ị wọtaru, bya emee tẹ ndu Juda mẹe ndu bu lẹ Jerúsalẹmu dụ ghẹle-ghẹle-ghẹle, ẹgube ono ndibe Éhabu meru ndu Ízurẹlu whẹ dụ; tẹhenu i gbushiwaa ụnwunna ghu, bụ iya bụ ndibe nna ghu whẹ, mbụ ndu ono, ka ghu mma ono;

¹⁴ ọ kwa iya bụ t'i lekwa lẹ Onye-Nwe-Ọha bya l'ewokfuta ndibe unu eze nchịkarehu, mẹe ụnwegirima unu, mẹe unyomu unu, mẹe iwhe unu enwe l'owhu.

¹⁵ Gụbedua l'onwoghu bẹ ejo ẹhu-ba-dụ-mma l'a-byakfuta, mbụ ejo ẹhu, l'eme l'ẹwho. Ẹhu ono l'e-me ghu, ẹwho acha ghu ntiriri mbọkumboku.”

Anwụhu Jehóramu

¹⁶ Onye-Nwe-Ọha bya akutsuta ndu Fílistiya mẹe ndu Arabu, bụ iya bụ ndu ono, bukube ndu Itiyópiya, Jehóramu dụ whẹ ashị.

¹⁷ Whẹ bya ọgu l'alị ndu Juda, zebata l'alị ono, vutakota iwhe lile, whẹ whụru l'ụlo eze, kpụkoo ụnwu iya nwoke mẹe unyomu iya, nke ọwhu bụ l'ọ tọ dụdu nwa iya nwoke, a harụ iya, gbahaa Jehowahazu, bụ nwa nwoke iya nke nwata.

¹⁸ Iwhe lile ono nwụ-gelewho, Onye-Nwe-Ọha bya atụru agwọta agwọta ẹhu-ba-dụ-mma ye Jehóramu l'ẹwho.

¹⁹ A nọnyaa, g'awha labọ gvụru; ẹhu-ba-dụ-mma ono mee ya; ẹwho chaa ya ntiriri. Ọ nwụhu l'ọta kpọkpo-kpọroro. Ndibe whẹ ta akpọberu iya igidi ọku gude kwabẹ iya ugvu, ẹgube ono, a kpọberu nna iya whẹ.

²⁰ Jehóramu bẹ gbarụ ụkporo awha l'awha iri l'ẹbo nteke ọ watarụ ọbu eze. Iwhe ọ chịru bụ awha ẹsato lẹ Jerúsalẹmu. Ọ nwụhuru t'ọ dụ onye tsọru áwhụ iya. E lia ya lẹ mkpụkpu Dévidi, ọle e te elidu iya l'ilu ndu eze.