2 Iwhe e meru l'oge ndu eze 20 - BAYỊBURU Ẹzaa

Jehóshafatu lwụ-gburu ndu Moabu mẹe ndu Amọnu

¹ E megee, ndu Moabu mẹe ndu Amọnu whẹle ụwhodu ndu Meyunimu nmagbabẹ ọnu byakfuta Jehóshafatu ọgu.

² O nweru ndu harụ bya ekfuaru Jehóshafatu sụ iya l'ikpoto madzụ l'awụkwa abyakfuta iya ọgu. Lẹ whẹ shi l'azụ ẹnyimu abya, mbụ lẹ whẹ shi Edọmu. Whẹ nọduwa lẹ Hazazọnu-tama, bụ iya bụ Enu-gedi.

³ Egvu ba Jehóshafatu; o ye onwiya l'ọcho Onye-Nwe-Ọha. Ọ bya aryaa ya aryarya t'a swịkota ẹgu l'alị ndu Juda l'owhu.

⁴ Ndu Juda tụko gẹ whẹ ha dzukota, tẹ whẹ chọo eyemẹka Onye-Nwe-Ọha. Whẹ shi lẹ mkpụkpu, dụkota l'alị ndu Juda l'owhu byakọta tẹ whẹ chọo Onye-Nwe-Ọha.

⁵ Tọ dụ iya bụ, Jehóshafatu bya akfụru l'atatiwhu edzudzu-ọha ndu Juda ono mẹe ndu Jerúsalẹmu ono, dzukoberu l'iwhu ọma ogboduwhu ọ̀whúú ono, dụ l'ụlo Onye-Nwe-Ọha,

⁶ bya asụ: “Gụbe Onye-Nwe-Ọha, bụ Chileke nke nna anyi whẹ, ?tọ dụ ghu bụ Chileke l'imigwe? ?Tọ dụ ghu l'achị alị-eze lile, dụ lẹ mba gẹ mba ha? Ike mẹe ọkpehu bẹ bụ l'ẹka ghu b'ọ dụkota, nke ọwhu bụ l'ọ tọ dụdu onye sụru gẹ l'ọo-kfụru kpọ ghu iwhu.

⁷ Gụbe Chileke anyi, ?tọ dụ ghu bẹ chịfuru ndu shi buru l'alị-a l'atatiwhu ndibe ghu, bụ ndu Ízurẹlu, bya eworu alị ọbu nụ ẹpa Ébirihamu, bụ ọnya ghu t'ọ bụru nkewhe jeye lẹ tututu-mịmimi?

⁸ Whẹ buwa iya ebubu, nọduwa iya tụaru ghu ụlo-nsọ, bụ ẹka l'ii-buru, bya ekfua sụ:

⁹ ‘Ọ -bụru l'ejo-iwhe bẹ byakfutaru anyi, o beru ọ -bụru ọgu b'ị harụ t'ọ byakfuta anyi, m'ọ bụ l'ịi-nụ anyi áwhụ, m'ọ bụ l'ọo ejo ẹhu-ba-dụ-mma, m'ọ bụ mkpẹgu bẹ byarụ anyi, bẹ anyi l'a-kfụru l'ụlo-ọ ya nụ, mbụ l'atatiwhu ghu, ryarụ kpua ghu l'iwhe-ọtsulanu, anyi l'eje, gụ anụa olu anyi dzọo anyi, o noo nkele i bu ebubu l'ụlo-ọ.’

¹⁰ “Sụa, lekwa unwoke ndu Amọnu, mẹe ndu Moabu, mẹe ndu ugvu ugvu alị Siye gẹ whẹ l'eze gidigidi eje abya, mbụ ndu ono, ị jịkaru tẹ ndu Ízurẹlu ba awụbashi l'alị whẹ nteke ono, whẹ shi l'alị Íjiputu fụta, whẹ kwee gbangoo whẹ, haa whẹ ọla l'iyi.

¹¹ Lewaro g'ọ bụ tẹ whẹ bya achịfu anyi l'iwhe anyi nwe enwe, mbụ l'alị-a, ị nụru anyi t'ọ bụru oke-iwhe anyi bẹ bụ obunggo, whẹ l'ebu anyi.

¹² Oowaa Chileke anyi, ?tịi gwadụ whẹ ọchi tọo? Nkele anyi te enwedu ike, anyi gude ejekfu ikpoto ndu-a, l'eze gbigbigbi-a abyakfuta anyi ọgu. Anyi ta amakwa iwhe anyi l'e-me, ọle anyi chịwaru ẹnya yeru ghu.”

¹³ Ndu Juda gẹ whẹ ha bya akfụru l'atatiwhu Onye-Nwe-Ọha mẹe ndu ọwhu ha nwanshị l'ime whẹ, mẹe unyomu whẹ, mẹe ụnwegirima whẹ.

¹⁴ O noo ya, ume Onye-Nwe-Ọha bya Jahaziyẹlu l'ẹhu l'echilabọ edzudzu-ọha ono. Jahaziyẹlu bẹ bụ nwa Zakaráya, Zakaráya bụru nwa Benaya, Benaya bụru nwa Jeyẹlu, Jeyẹlu bụru nwa Mataniya. Jahaziyẹlu ono bẹ bụ ẹpa Asafu onye ikfu Lívayi.

¹⁵ Ọ sụ: “Unu ngabẹ nchị, unubẹ ndu Juda, mẹe ndu bu lẹ Jerúsalẹmu, mẹe gụbe eze Jehóshafatu: Ọ waa iwhe Onye-Nwe-Ọha l'ekfu ndọwa: ‘Unu ba atsụshi egvu, t'obu be echifushi unu l'iswi ikpoto ndu-a. Nkele ọgu ono ta abụdu unu l'a-lwụ iya; ọo Chileke bẹ l'a-lwụ iya nụ.

¹⁶ Unu gbalihu echile jekfu whẹ ọgu. Whẹ l'e-tsoru ụzo, dụ l'ugvu Zizu abya, ẹka unu l'a-whụ whẹ bụ l'ishimishi nsụda, dụ l'atatiwhu echi-ẹgu Jeruwẹlu.

¹⁷ Unu ta alwụdu ọgu alwụ. O zhiawho t'unu kwaa kẹkereke kfụru chịmu, whụ ndzọfuta, shi l'ẹka Onye-Nwe-Ọha abyarụ unubẹ ndu Juda mẹe ndu Jerúsalẹmu. Unu ba atsụshi egvu, t'obu be echifushi unu echifu. O be echile t'unu jekfu whẹ ọgu, lẹ Onye-Nwe-Ọha l'e-swiru unu eswiru.’ ”

¹⁸ Tọ dụ iya bụ, Jehóshafatu whuzeta iwhu l'alị. Ndu Juda l'owhu mẹe ndu bu lẹ Jerúsalẹmu tụko gẹ whẹ ha dakọta kpurumu l'atatiwhu Onye-Nwe-Ọha, balahaarụ iya ẹja.

¹⁹ Ndu Lívayi, bụ ndu ọwhu shi l'eri Kohatu mẹe ndu ọwhu shi l'eri Kora wulishihu wata ọja Onye-Nwe-Ọha, bụ Chileke nke Ízurẹlu ajaja, whẹ gude oke olu, ha shii aja iya.

²⁰ Whẹ nmẹe ẹwa gbalihu jeshia echi-ẹgu mkpụkpu Tekowa. Gẹ whẹ l'eje bẹ Jehóshafatu kfụru akfụru sụ: “Unu nụa iwhe mu l'ekfu, unubẹ ndu Juda mẹe ndu bu lẹ Jerúsalẹmu! Unu kweta nke Onye-Nwe-Ọha, bụ Chileke unu, nke ọwhu unu l'a-kpọru g'ọo abara. Unu ekweta iwhe ndu nkfuchiru iya l'ekfu, nke ọwhu iwhe l'a-nọ ejeru unu l'iwhu l'iwhu.”

²¹ Jehóshafatu jekfugee ndu madzụ idzu, ọ bya atụa ẹka lẹ ndu l'a-gụru Onye-Nwe-Ọha egvu, mbụ ndu l'a-nọ aja iya ajaja, yeru uwe dụ nsọ vutaru ndu ojọgu ono ụzo, azụ egvu asụje: “Unu kele Onye-Nwe-Ọha ekele, nkele n-yemobu iya l'a-nọ jeye lẹ gbururu.”

²² Whẹ watalẹwho ọzu egvu ono, aja Onye-Nwe-Ọha ajaja, Onye-Nwe-Ọha woru ndu ojọgu dobe tẹ whẹ kpuru ekpuru shi nno lwụshi ndu Amọnu, mẹe ndu Moabu, mẹe ndu ugvu ugvu alị Siye ono ọgu, bụ iya bụ ndu ono byakfutaru ndu Juda ọgu. A lwugbua whẹ.

²³ Ndu Amọnu mẹe ndu Moabu bya ezelihu tsopyaa ndu ugvu ugvu alị Siye ọgu, gbugbushikota whẹ, whẹ bụru kpurupyata. Whẹ gbugelewho ndu ugvu ugvu alị Siye ono, whẹ dakọbe gbulahaa onwowhe l'onwowhe.

²⁴ Nteke ndu Juda rwuru l'ụlo-eli ndu nche, dụ l'echi-ẹgu, whẹ bya anọdu l'ẹka ono lefu ẹnya l'ụzo ẹka ikpoto ndu ono kụru. Iwhe whẹ whụru bụru odzu, dashịru gbaagbaa l'alị, bya awhụ l'ọ tọ dụdu onye nahụru gbalaa.

²⁵ Ọo ya bụ, Jehóshafatu yẹle ndu nkiya wụru jeshia tẹ whẹ je egwoo arya ndu ono, whẹ je akpolwu ikpoto eswi, mẹe arya, bụ agụta agụta, mẹe ẹkwa, mẹe iwhe l'erekaa ire, mbụ iwhe kariru gẹ whẹ l'e-gwotage iya. Ivu ono bẹ ha shii, nke ọwhu whẹ gworu iya abalị ẹto.

²⁶ O be mbọku ọwhu kwe iya ẹno, whẹ dzukota lẹ nsụda Beraka, bya anọdu l'ẹka ono jaa Onye-Nwe-Ọha ajaja. Ọo ya meru, e shi kuta ẹka ono nsụda Beraka byeye ntanụ.

²⁷ Tọ dụ iya bụ, ndu Juda ono l'owhu mẹe ndu Jerúsalẹmu ono lwatashia Jerúsalẹmu. Ọ bụru Jehóshafatu bụ onye ishi whẹ. Whẹ gude ẹhu-ụtso awụ alwa, nkele Onye-Nwe-Ọha bẹ mewaru tẹ whẹ tụru okoo kpua ndu ọhogu whẹ.

²⁸ Whẹ wụbata lẹ Jerúsalẹmu, akpọ une, mẹe ogumogu, egbu opyi-ọku abahụ l'ụlo Onye-Nwe-Ọha.

²⁹ Iwhe bụ ndu eze ndu alị ọdo tsụlahaa Onye-Nwe-Ọha egvu, nteke whẹ nụru lẹ Onye-Nwe-Ọha bẹ lwụshiru ndu ọhogu ndu Ízurẹlu ọgu.

³⁰ Ọo ya bụ, alị-eze Jehóshafatu dakọta gbẹe, nkele Chileke iya bẹ meru t'ume tukfuru iya ibẹka ibẹbo.

Mkpochi-ishi ọburu eze Jehóshafatu

³¹ O noo ya, Jehóshafatu bụru eze ndu Juda. Ọ gbarụ ụkporo awha l'awha iri l'ise nteke ọ watarụ ọbu eze. Ọ bụ eze ụkporo awha l'awha ise lẹ Jerúsalẹmu. Ẹwha ne iya bụ Azụba nwa nwanyị Shilihi.

³² Ọ wọtaru ẹka Asa, bụ nna iya. Ọ tọ dụdu ọwhu ọ harụ m'ọo nnanụ. O meru iwhe kfụru nhamụnha l'ẹnya Onye-Nwe-Ọha.

³³ Ọle o to wofudu ẹka l'aagwajẹ iwhe, tẹhenu ndu Juda te edobe obu whẹ l'ẹka Chileke nke nna whẹ nọ.

³⁴ Iwhe ọdo, Jehóshafatu megbaberu, wata l'ishi jeye lẹ ngvụcha b'e dekotaru l'ẹkwo iwhe e meru l'oge Jehu nwa Hanani, mbụ ọwhu e deru l'ẹkwo ndu eze ndu Ízurẹlu.

³⁵ E megee, Jehóshafatu, bụ eze ndu Juda je atụgba yẹle Ahazaya, bụ eze ndu Ízurẹlu, mbụ onye ono, meru ejo-iwhe.

³⁶ Yẹle iya bya atụko ẹka kụshia ụgbo-mini, l'a-nọ eje mkpụkpu Tashishi. Ọ bụru lẹ mkpụkpu Eziyọnu-geba bẹ whẹ nọdu kụshia ụgbo-mini ono.

³⁷ Tọ dụ iya bụ, Eliyéza, bụ nwa Dodavahu nke mkpụkpu Maresha bya ekfuru mabẹru Jehóshafatu sụ: “Eshi-ọwhu gụ lẹ Ahazaya tụkoru ẹka bẹ Onye-Nwe-Ọha l'a-tụko iwhe i mekotaru mebyishikota.” Ụgbo ono bya ekpukota, whẹ jebuhu mkpụkpu Tashishi ono.