2 Iwhe e meru l'oge ndu eze 2 - BAYỊBURU Ẹzaa

Aakwakọ nkwakọ ọtu eze-ụlo Chileke

¹ Sólomọnu bya achịpyaa ya l'obu iya lẹ ya l'a-tụru Onye-Nwe-Ọha ụlo mẹe lẹ ya l'a-tụ ụlo eze bụ ẹka ya l'e-buru.

² Ọ bya agụta ụkporo ụnu unwoke ugbo ẹsato l'ụnu iri l'ise tẹ whẹ bụru ndu l'evu iwhe e gude eme ụlo ono, gụta ụkporo ụnu unwoke ugbo iri tẹ whẹ bụru ndu l'awa ẹwhuru l'ugvu ugvu alị ono, bya agụta ụnu unwoke tete tẹ whẹ bụru ndu ishi, l'eleta ọrwu ono ẹnya.

³ Sólomọnu bya ezhia Hiramu, bụ eze ndu Taya ozhi sụ: “T'ọ bụkwaru ẹgube ono, i mekoshiru nna mu Dévidi nụ iya oshi sida t'ọ tụa ụlo ebubu iya bụ gẹ l'ii-mekoshi mbẹdua.

⁴ Mu bya l'atụa ụlo, bụ ẹka Onye-Nwe-Ọha, bụ Chileke mu l'e-buru, doberu iye ya nsọ t'ọ bụru ẹka l'aa-kpọje ụ̀nwù-isẹnsu, l'eshi kwẹkwekwe ọku l'iwhu iya mẹe t'ọ bụru ẹka l'ee-dobeje buredi, dụ nsọ ntekenteke, bya abụru ẹka l'aa-gbajẹ ngwo-ẹja ọkpokota-iwhe-ọku eswe mẹe ẹnyashi, mẹe lẹ mbọku Sabatụ, mẹe l'ọnwa ọ̀whúú, mẹe l'ori oge Onye-Nwe-Ọha, bụ Chileke anyi, ẹgube e doberu iya t'ọ bụru nsọ ndu Ízurẹlu jeye lẹ gbururu.

⁵ Ụlo ọbu, mu l'abya atụtu bẹ l'a-pa ẹka apaa nkele Chileke anyi bẹ kangokotaru iwhe bụ agwa l'owhu.

⁶ Ọle ọbu, ?ọo onye bẹ sụru gẹ l'ọo-tụru iya ụlo? Eshi-ọwhu igwe, mbụ igwe ọwhu kakọta l'eli l'ẹte asụa ya anọdu. ?Ọo onye bẹ mu bụ nke tẹ mu tụaru iya ụlo? T'a gụfulewho l'aatụ iya g'ọo ẹka l'aakpọjeru iya isẹnsu ọku.

⁷ Ntaa bụkwa t'i zhitaru mu onye l'eme nka lẹ mkpọla-ododo, mẹe lẹ mkpọla-ọcha, mẹe l'ope, mẹe lẹ mkpụrumkpu-igwe, bya abụru onye l'eme nka, gude oghu ododo, mẹe oghu uswe, mẹe oghu, dụ urwukpu-urwukpu akpa ẹkwa. Onye ọbu l'a-bụkwaruwho onye ọopyi iwhe-apyịpyi doru ẹnya. Yẹle ndu nkemu, bụ ndu l'eme nka, nna mu Dévidi doberu bẹ l'e-yeko ẹka rwụa ọrwu ono lẹ Jerúsalẹmu mẹe lẹ Juda.

⁸ Nụkwa mu whọ oshi sida, mẹe oshi sayịpuresu, mẹe oshi alugumu, shi l'ugvu ugvu Libanọnu. Nkele o doru mu ẹnya lẹ ndu nkeghu l'eme nka l'ọwa oshi ugvu ugvu Libanọnu. Ndu nkemu bẹ whẹ lẹ ndu nkeghu l'e-yeko ẹka l'ọrwu ono;

⁹ nke ọwhu whẹ l'a-nụ mu oshi ha l'igweligwe. Nkele ụlo ọbu, mu l'abya atụtu bẹ bụ agaga-gvuragvu, dụ biribiri.

¹⁰ Iwhe mu l'a-nụ ndu nkeghu ono, bụ ndu l'egbu oshi ono bụ witi, e gweru egwegwe, dụ ụkporo ụnu ẹkpa ugbo labọ l'ụnu iri. Mu anụ whẹ balị, dụ ụkporo ụnu ẹkpa ugbo labọ l'ụnu iri mẹe galọnu mmẹe, dụ ụkporo ụnu ugbo iri l'ẹbo l'ụnu iri, bya anụ whẹ tinu mmanụ, dụ ụkporo ụnu ugbo labọ l'ụnu iri.”

¹¹ Tọ dụ iya bụ, Hiramu, bụ eze ndu Taya dee ẹkwo-ozhi gude yeeru Sólomọnu ọnu sụ: “Ọo obu, Onye-Nwe-Ọha yeru ndibe iya b'o gude mee t'ị bụru eze whẹ.”

¹² Hiramu kfukwawho ọdo sụ: “T'ajaja bụru nke Onye-Nwe-Ọha, bụ Chileke nke Ízurẹlu, onye meru igwe mee eliwhe, mbụ onye ono, nụru eze bụ Dévidi nwa, marụ ágụ, mbụ nwa, nweru ori-l'ichicho, bya abụru nwa iwhe doru ẹnya, t'ọ bụru onye l'a-tụru Onye-Nwe-Ọha eze-ụlo, tụaru onwiya ụlo eze.

¹³ Ntaa bẹ mu l'ezhiwaa nwoke l'aza Huramu-abyi t'ọ bya. Ọ bụ nwoke l'eme nka, bụru onye iwhe doru ẹnya.

¹⁴ Ọ bụ nwa nwanyị, shi l'ikfu Danu. Nna iya bụru nwoke Taya gẹdegede. Ọ nwụru g'e shi eme nka lẹ mkpọla-ododo, mẹe lẹ mkpọla-ọcha, mẹe l'ope, mẹe lẹ mkpụrumkpu-igwe, mẹe l'ẹwhuru, mẹe l'oshi; ọ nwụa ogude oghu ododo, mẹe oghu, dụ urwukpu-urwukpu, mẹe oghu uswe, mẹe ọkpobe ẹkwa-ọcha akpa ẹkwa. Ọ marụ gẹ l'apyịje iwhe-apyịpyi, dụ l'iche l'iche; o jee l'a-dụ ike mekota iwhe e yeru iya l'ẹka t'o mee. Ndu nkeghu, bụ ndu l'eme nka mẹe ndu nka ono, onye-nwe-mu nụ Dévidi, bụ nna ghu doberu bẹ whẹ l'iya l'e-yeko ẹka l'ọrwu ono.

¹⁵ Ntaa bụkwa tẹ gụbe onye-nwe-mu nụ nụwaro ndu ozhi ghu witi, mẹe balị, mẹe mmanụ, mẹe mmẹe ọbu, i kfuru okfu iya

¹⁶ t'anyi je awataru ghu oshi ole, ị chọru l'ugvu ugvu Libanọnu; sweshia ya esweshi seghaa l'eze-ẹnyimu je dobe iya lẹ Jọpa, bụ ẹka l'ọo-dụ gụ evu iya ala Jerúsalẹmu.”

Sólomọnu l'ahọ ndu ọrwu

¹⁷ Tọ dụ iya bụ, Sólomọnu bya agụa ndu mbyambya, bukota l'alị Ízurẹlu ọgu, ẹgube ono, nna iya Dévidi gụru whẹ. Iwhe whẹ dụkota bụ ụkporo ụnu unwoke ugbo iri lẹ tete l'ụnu unwoke ẹno.

¹⁸ O woru ụkporo ụnu ugbo ẹsato l'ụnu iri l'ise dobe tẹ whẹ bụru ndu l'evu iwhe e gude eme ụlo ono; dobe ụkporo ụnu ugbo iri tẹ whẹ bụru ndu l'awa ẹwhuru l'ugvu ugvu alị ono, bya edobe ụnu tete tẹ whẹ bụru ndu ishi, l'awhụ mẹka ọrwu ono, nke ọwhu whẹ l'a-nọ eme tẹ ndu ono rwụje ọrwu.