2 Iwhe e meru l'oge ndu eze 19 - BAYỊBURU Ẹzaa

Onye nkfuchiru Chileke l'abarụ Jehóshafatu mba

¹ Jehóshafatu, bụ eze ndu Juda bya alwata ibe iya lẹ Jerúsalẹmu l'ẹhu-guu.

² Jehu, bụ nwa Hanani onye l'awhụ awhụ lụfu tẹ ya gbata iya ndzuta. Ọ sụ Jehóshafatu: “?Ọ gbarụ t'i yeru onye ejo obu ẹka? ?Ọ gbarụ t'i ye ndu kpọru Onye-Nwe-Ọha ashị obu? Eshi-ọwhu i meru nno, bẹ oke ẹhu-eghughu shiakwa l'ẹka Onye-Nwe-Ọha nọ eje abyakfuta ghu.

³ Ọle g'ọ dụle-zhia bẹ iwhe dụ ree halẹkwaru-a dụ ghu l'ẹhu, nkele i mebyishiru itso Ashera, dụkota l'alị-a, i dobe obu ghu nhamụnha achọ Onye-Nwe-Ọha.”

Iwhe Jehóshafatu mezhiru emezhi

⁴ Jehóshafatu buru lẹ Jerúsalẹmu, ọ tụgbukwaa ọdo jekfu ndu nkiya, mbụ ndu ono, shi lẹ mkpụkpu Byiyesheba bua jeye l'ugvu ugvu alị Ífuremu. Ọ chịta-whu whẹ azụ nụ Onye-Nwe-Ọha, bụ Chileke nke nna whẹ.

⁵ O woru ndu ọgbo-ikpe dobekota lẹ mkpụkpu, a tụkotaru o shihu ike l'alị ndu Juda, dobe whẹ lẹ mkpụkpu lẹ mkpụkpu.

⁶ Ọ sụ ndu ọgbo-ikpe ono: “T'ẹnya dokwa unu rịsaa l'iwhe unu l'eme, nkele ọ tọ kwa madzụ bẹ unu l'ekperu ikpe; onye unu l'ekperu iya bụkwa Onye-Nwe-Ọha, bụ onye ono, l'anọduje swiru unu l'ikpe lile, unu l'ekpe.

⁷ Ntaa bụkwa t'unu tsụ Onye-Nwe-Ọha egvu, unu akwabẹ ẹnya l'iwhe unu l'eme, nkele Onye-Nwe-Ọha, bụ Chileke anyi ta achọdu ikpe, gberu ngo, oobu madzụ ẹnya l'iwhu ta adụ iya ree, t'ọ dụ iya ree mbụ nnuchi-ọnu.”

⁸ Lẹ Jerúsalẹmu bẹ Jehóshafatu doberu ndu Lívayi ụwhodu, mẹe ndu l'agbajẹ ẹja nụ Chileke, mẹe ndu ishi l'ẹnya-uwhu ndu Ízurẹlu tẹ whẹ bụru ndu l'ekpe ikpe, larụ l'iwu Onye-Nwe-Ọha ọwaa tẹ whẹ kpeshije okfu. Ẹka whẹ bu bẹ bụ lẹ Jerúsalẹmu.

⁹ O kfuaru whẹ sụ: “Ọ waa iwhe unu l'e-meje ndọwa: Unu l'e-gude ọtsu egvu Onye-Nwe-Ọha egvu yẹle ọkfushi ike l'iwhe unu kfuru, gude obu unu l'owhu eme iya:

¹⁰ Iwhe bụ okfu, ụnwunna unu whẹ shi lẹ mkpụkpu, whẹ bu wotaru unu t'unu kpee, m'ọ bụ okfu ọchi egbugbu, m'ọ bụ okfu l'e mebyiru iwu, m'ọ bụ l'e mebyiru iwhe e kfuru, m'ọ bụ l'e mebyiru iwhe a tọru ọkpa iya, m'ọ bụ l'e mebyiru nsọ. Unu lọkwa whẹ ẹka lẹ nchị tẹ whẹ kwabẹkwa ẹnya, nke ọwhu whẹ l'ete emeta iwhe ikpe l'a-nma whẹ l'iwhu Onye-Nwe-Ọha. Ọ -dụa bẹ oke ẹhu-eghughu Onye-Nwe-Ọha l'a-byakfutakwa unu l'ụnwunna unu ono. O noo g'unu l'e-me iya, nke ọwhu unu l'ete emeta iwhe ikpe l'a-nma unu.

¹¹ “Ọ kwa Amaríya onye ishi ndu l'agbajẹ ẹja nụ Chileke bẹ l'a-bụru onye ishi unu l'iwhe l'eeme ala lẹ Onye-Nwe-Ọha. Zebadaya nwa Ishimẹlu, bụ ọchi-ọha ikfu Juda abụru onye ishi l'iwhe l'eeme ala l'eze. Ọwhube ndu Lívayi bẹ l'a-bụru ndu ishi unu. T'obu shihukwa unu ike l'iwhe lile, unu l'eme. Tẹ Onye-Nwe-Ọha swikwaru ndu l'eme iwhe kfụru nhamụnha eswiru.”