2 Iwhe e meru l'oge ndu eze 18 - BAYỊBURU Ẹzaa

Mayikaya l'alọ Éhabu ẹka lẹ nchị

¹ Nteke ono bẹ Jehóshafatu nweru ẹku, ọ bụru onye l'aakwabẹ ugvu, parụ ẹka. O je agbata Éhabu ọgo, shi nno yẹle iya tụgba bụru nnanụ.

² Awha olemole bya agaa, o jee ibe Éhabu lẹ mkpụkpu Samériya. Éhabu gbuaru Jehóshafatu yẹle ndu whẹ l'iya lị bya ikpoto atụru mẹe eswi; bya akwakọta iya t'o jeshia ọgu lẹ mkpụkpu Ramótu, dụ l'alị Giledu.

³ Éhabu, bụ eze ndu Ízurẹlu bya asụ Jehóshafatu, bụ eze ndu Juda: “?Ii-tso mu eje ọgu lẹ mkpụkpu Ramótu ono, dụ l'alị Giledu?” Jehóshafatu yee ọnu sụ: “Mu lẹ ghu bụnu nnanụ. Ndibe ghu mẹe ndibe mu bụru nnanụ. Anyi l'unu l'a-tụgba ẹka lwụa ọgu ono.”

⁴ Ọle Jehóshafatu bẹ sụru eze ndu Ízurẹlu ono sụ iya: “Vuakwaru ụzo kpaada Onye-Nwe-Ọha ishi marụ iwhe l'oo-kfu.”

⁵ Tọ dụ iya bụ, eze ndu Ízurẹlu bya achịkobe ndu nkfuchiru, dụ ụnu madzụ bya ajị whẹ sụ: “?Ọo t'anyi je alwụshi ndu mkpụkpu Ramótu, dụ l'alị Giledu ọgu, tọo tẹ mu be ejeshi?” Whẹ sụ iya: “Jeshia, lẹ Chileke bẹ l'e-me tẹ mkpụkpu ono lwa eze l'ẹka.”

⁶ Jehóshafatu bya asụ: “?Tọ dụhedu onye nkfuchiru Onye-Nwe-Ọha ọdo, nọ l'ẹka-a, anyi l'a-kpabaa ishi?”

⁷ Eze ndu Ízurẹlu sụ Jehóshafatu: “O nwefukwaaru onye lanụ ọdo, anyi l'e-shi l'ẹka iya kpata Onye-Nwe-Ọha ishi ọbu. Onye ọbu bẹ bụ Mayikaya nwa Imula. Ọle ọ dụ mu ashị, o noo nkele o too kfubudua okfu ọma l'ẹhu mu gbahaa ẹjo iya.” Jehóshafatu sụ: “Eze, be ekfushi ẹgube ono.”

⁸ Tọ dụ iya bụ, eze ndu Ízurẹlu bya ekua onye ozhi iya lanụ sụ iya: “Je ekua Mayikaya nwa Imula t'ọ bya ntaantaa.”

⁹ O noo ya, eze ndu Ízurẹlu yẹle Jehóshafatu, bụ eze ndu Juda bya eyekota uwe onye eze whẹ, sụgaru l'oshi-eze whẹ l'ẹka l'eechije balị, nọ l'ọnu ẹka l'eeshije abahụ mkpụkpu Samériya; ndu nkfuchiru ono gẹ whẹ ha nọdu whẹ l'iwhu ekfukaa iwhe whẹ l'ekfu.

¹⁰ Onye lanụ lẹ ndu nkfuchiru ono, bụ Zedekaya nwa Kenana bẹ metaru ụpyi igwe asụje: “Onye-Nwe-Ọha bẹ sụru agha: ‘Ọo ụpyi-a bẹ l'ịi-dụ ndu Arámu jeye nteke whẹ l'a-lakọta l'iyi.’ ”

¹¹ Ndu nkfuchiru ono gẹ whẹ ha l'ekfukota iwhe lanụ asụje: “Jeshia ọgu lẹ mkpụkpu Ramótu, dụ l'alị Giledu, je alwụ-gbua whẹ. Onye-Nwe-Ọha bẹ l'e-woru mkpụkpu ono ye eze l'ẹka.”

¹² Tọ dụ iya bụ, onye ozhi ono, jeru oku Mayikaya bya asụ iya: “Lekwa, ndu nkfuchiru ọwhu bẹ okfu whẹ bụkwa nnanụ, whẹ tụkokwa ekfu lẹ nke ọma l'e-meru eze. T'okfu gụ lẹ whẹ bụkwaru nnanụ, kfubukwaaru iya okfu ọma.”

¹³ Mayikaya bya asụ: “Onye-Nwe-Ọha vuru-a ishi iya g'o vu iya; ọo iwhe Chileke mu kfuru bẹ mu l'e-kfu.”

¹⁴ Nteke Mayikaya bya erwua lẹ nke eze, eze sụ iya: “Mayikaya, ?ọo t'anyi je ọgu lẹ mkpụkpu Ramótu ono, dụ l'alị Giledu, tọo tẹ mu be ejeshi?” Mayikaya sụ: “Lọbaru je alwụ-gbua whẹ, o noo l'ee-woru ndu ono ye ghu l'ẹka.”

¹⁵ Eze bya asụ iya: “?Ọo ugbo ole bẹ mu l'a-sụ ghu t'i ribuaru mu nte l'ọ tọ dụdu iwhe ọdo, l'ii-kfuru mu, gbahaa t'i kfuru mu ire-lanụ l'ẹwha Onye-Nwe-Ọha?”

¹⁶ Mayikaya kfulahaa sụ: “Mu whụru gẹ ndu Ízurẹlu l'owhu jekashihuru nnanụ nnanụ l'ugvu g'ọo atụru, l'ete enwee onye nche; Onye-Nwe-Ọha sụ: ‘Ndu-a bẹ l'ete enwedua enwe l'ẹka. T'onyenọnu lashia ibe iya l'ẹhu-guu.’ ”

¹⁷ Eze ndu Ízurẹlu sụ Jehóshafatu: “?Mu ta asụdu ghu l'ọ tọo byadụ l'ekfu mma l'ishi mu, gbahaa ẹjo iya?”

¹⁸ Mayikaya l'ekfu iwhe l'ookfu sụ: “Ngwa ngabẹ nchị nụ iwhe Onye-Nwe-Ọha l'ekfu: Mu whụru Onye-Nwe-Ọha g'ọ nọdu anọdu l'oshi-eze iya, ndu ojọgu-imigwe kfụa ya l'ẹka-ụtara mẹe l'ẹka-ịcha.

¹⁹ Onye-Nwe-Ọha sụ whẹ: ‘?Oo onye bẹ l'a-rata Éhabu, bụ eze ndu Ízurẹlu t'o jeshia ọgu lẹ mkpụkpu Ramótu, dụ l'alị Giledu, nke ọwhu bụ o -jee ishi iya ewhuhu?’ “Onye lanụ fụta bya ekfua iwhe lanụ, onye ọdo fụta bya ekfua iwhe ọdo.

²⁰ E megee, ume lanụ kfụfuta bya akfụru l'iwhu Onye-Nwe-Ọha sụ: ‘Ọo mu l'a-rata iya t'o je.’ “Onye-Nwe-Ọha sụ iya: ‘?Ọo l'ụzo, dụ ọdu agha bẹ l'ii-shi rata iya?’

²¹ “Ọ sụ: ‘Mu l'a-lụfu je abụru nwamaa ejire, je eberu l'ọnu ndu nkfuchiru ono, Éhabu kuru.’ “Onye-Nwe-Ọha sụ iya: ‘Ịi-ratakọta iya ọbu. Tụgburu je.’

²² “Ọo ya bụ, t'ị manụruwho lẹ Onye-Nwe-Ọha bẹ yeru nwamaa ejire, o beru l'ọnu ndu nkfuchiru-a. Onye-Nwe-Ọha kfuakwaru ejo okfu tukobe ghu.”

²³ Tọ dụ iya bụ, Zedekaya nwa Kenana kpụlitaru repyaa ya Mayikaya l'ishi nchị pyaa sụ: “?Ndẹe gẹ Ume Onye-Nwe-Ọha shi lụfu mu l'ẹhu bya ekfuru yeru gụbedua?”

²⁴ Mayikaya sụ: “Mbọku, l'ọo-sahụ ghu l'ẹnya bẹ bụ mbọku ono, l'ii-je edomia onwoghu l'ime mkpu ụlo.”

²⁵ Eze ndu Ízurẹlu bya asụ: “Unu kpụta Mayikaya kpụ-kfu Amọnu, bụ ọchi-ọha mkpụkpu mẹe Jowashi, bụ nwa eze.

²⁶ Unu asụ whẹ l'eze bẹ sụru agha: ‘Unu tuchia onye-e l'ọka-mkpọro. Tọ bụru buredi yẹle mini l'a-bụjeru nri iya jeye mu ejee guu lwa guu.’ ”

²⁷ Mayikaya sụ: “I -jekwa guu lwa guu, marụ l'ọ tọ bụdu Onye-Nwe-Ọha bẹ kfuru okfu ono nụ mu.” Ọ bya asụ ndu lile, nọ l'ẹka ono tẹ whẹ tụbe nvọ l'okfu ono.

E gburu Éhabu l'ẹgu ọgu lẹ mkpụkpu Ramótu

²⁸ Ọo ya bụ, eze ndu Ízurẹlu yẹle Jehóshafatu, bụ eze ndu Juda bya achịta ndu ojọgu whẹ tụgburu jeshia mkpụkpu Ramótu, dụ l'alị Giledu.

²⁹ Eze ndu Ízurẹlu ono bya asụ Jehóshafatu: “Mu l'a-gha onwomu ụghara bahụ l'ọgu ono. Gụbedua l'e-yeru uwe mkpẹelanu ghu.” Eze ndu Ízurẹlu bya emee onwiya t'a ba ahụbe iya ama bahụ l'ọgu ono.

³⁰ Eze ndu Arámu bẹ sụhawaru ndu ishi ụgbo-ịnya iya sụ whẹ: “Unu ba alwụshikwa onye ukfu m'ọ bụ onye nta ọgu. Onye unu l'a-lwụshi ọgu kpụ bụ eze ndu Ízurẹlu.”

³¹ Ndu ishi ụgbo-inya ono whụlewho Jehóshafatu, whẹ sụ: “Lekwa eze ndu Ízurẹlu ọbu!” Ọo ya bụ, whẹ dakọbe tsopyabe iya ọgu, Jehóshafatu chishia mkpu, Onye-Nwe-Ọha gbatarụ iya. Chileke mee whẹ haa ya.

³² Nteke ndu ishi ụgbo-ịnya bya amarụ l'ọ tọ dụ eze ndu Ízurẹlu, whẹ dakọbe haa ya achịchi.

³³ O nweru onye ọwhu ọbu, ẹka nahụru o je atụa akfụ iya, ọ bụru eze ndu Ízurẹlu kurumu l'ẹhu. Ọ bụru lẹ mgbakụ ẹka ngwọgu, ọ kwarụ onwiya dzekfuru edzekfuru bẹ arwa ono shi nmata iya. Ọ ryashịaru onye l'angarụ iya ụgbo-ịnya sụ: “Kpọo l'azụ l'azụ pafụ mu l'ọgu-a, nkele e merwuwaru mu ọkpobe ẹhu.”

³⁴ Ọgu ono l'aka njọ aka eje eje mbọku ono. Eze ndu Ízurẹlu ono gbagide onwiya agbagide l'ụgbo-ịnya ono. Whẹ lẹ ndu Arámu lwụ-zhiawho ọgu ono jeye l'urwẹnyashi. Ẹnyanwu rịbalewho l'ishi, ọ nwụhu.