2 Iwhe e meru l'oge ndu eze 17 - BAYỊBURU Ẹzaa

Nteke Jehóshafatu bụ eze ndu Juda

¹ Jehóshafatu, bụ nwa nwoke Asa bya abụru eze l'ọzori iya. Ọ bya emee onwiya, ike kabaa ya adụdu, nke ọwhu l'ọo-lwụshi ndu Ízurẹlu ọgu.

² O dokashia ndu ojọgu edokashi lẹ mkpụkpu lile, a tụru o shihu ike l'alị ndu Juda, bya edobe ọdu-ọgu l'alị ndu Juda mẹe lẹ mkpụkpu ndu Ífuremu, bụ ẹka nna iya, bụ Asa natakọtaru l'ọgu.

³ Onye-Nwe-Ọha bya eswiru Jehóshafatu, o noo nkele nteke ọ watarụ ọbu eze b'ọ wọtakotaru ẹka ochee-oroke iya, bụ Dévidi, tọ gwa Bálu.

⁴ Ọo ụzo Chileke nke nna iya b'o tsoru, bya emee iwhe iwu iya kfuru, tọ wọta ẹka ndu Ízurẹlu.

⁵ Ọo ya meru iwhe Onye-Nwe-Ọha meru alị-eze ono, ọ kwata lwa Jehóshafatu l'ẹka ọkpobe alwalwa. Ndu Juda kpaa-whuu vutalahaaru iya iwhe, ọ bya enweru ẹku shinene, bụru onye l'aakwabẹ ugvu parụ ẹka.

⁶ O wofutaru obu iya zhiberu Onye-Nwe-Ọha. Ọdo bụ l'o wofuru ẹka l'aagwajẹ iwhe mẹe itso Ashera ono dụ l'alị ndu Juda.

⁷ O be l'awha kwe iya awha ẹto, ọ watarụ ọbu eze, o zhia ndu ishi iya, bụ Benu-hayilu, mẹe Obedaya, mẹe Zakaráya, mẹe Netanẹlu, mẹe Mayikaya, tẹ whẹ je ezhia iwhe lẹ mkpụkpu, dụkota l'alị ndu Juda.

⁸ O bya eyeru whẹ ndu Lívayi, bụ Shemaya, Netaniya, Zebadaya, Asahẹlu, Shemiramotu, Jehonatanu, Ádonayija, Tobayija, Tobu-adonayịja, ọwaa ndu l'agbajẹ ẹja nụ Chileke, bụ Elishama yẹle Jehóramu.

⁹ Whẹ zhigbakota iwhe l'alị ndu Juda. Whẹ gude ẹkwo-iwu Onye-Nwe-Ọha ezhi iya. Whẹ jekota mkpụkpu, dụ l'alị ndu Juda ezhi whẹ iwhe ono.

Ọga l'iwhu Jehóshafatu

¹⁰ Ntsụ-megvu, shi l'ẹka Onye-Nwe-Ọha bya l'ẹhu iwhe bụ ndu eze ndu alị lile, gbarụ ndu Juda mgburumgburu, whẹ ta alwụshi Jehóshafatu ọgu.

¹¹ Ndu Fílistiya bya aharụ vutaru Jehóshafatu iwhe, bya atụaru iya ụtu mkpọla-ọcha. Ndu Arabu kpụtaru iya ebyila, dụ ụnu ugbo iri lẹ tete l'ụkporo ise mẹe mkpi, dụ ụnu ugbo iri lẹ tete l'ụkporo ise.

¹² Jehóshafatu l'aka ike aka eje eje ntekenteke. Ọ bya atụshia agbarara, ẹka l'eedomije onwonye mẹe mkpụkpu ẹka l'aakwakọbeje iwhe l'alị ndu Juda.

¹³ Ọ bya enweru iwhe ọ kụbe-geeru nyịmu-nyịmu lẹ mkpụkpu, dụkota l'alị ndu Juda. Ọ bya enweru ndu ojọgu, bụ ndu ike dụ l'ọgu lẹ Jerúsalẹmu.

¹⁴ Ọ waa g'e shi doo whẹ l'ẹnya-uwhu l'ẹnya-uwhu ndọwa: L'ikfu Juda, onye bụ onye ishi ndu ojọgu, dụ-gee ụnu ugbo labọ l'ụkporo iri bẹ bụ Aduna. Ndu ojọgu, l'ọochi bẹ dụkota ụnu unwoke ugbo ụnu l'ụkporo ugbo iri l'ẹsaa l'unwoke iri.

¹⁵ Onye l'etsota iya nụ bẹ bụ onye ishi ndu ojọgu, bụ Jehohananu. Ndu ojọgu, yẹbedua l'achị bẹ dụkota ụnu unwoke ugbo ụnu l'ụkporo ugbo iri l'ise.

¹⁶ Onye nke ẹto bẹ bụ Amasíya, bụ nwa Zikiri. Yẹbedua bẹ tụru obu iya ama ejeru Onye-Nwe-Ọha ozhi. Ndu ojọgu, l'ọochi bẹ dụkota ụnu unwoke ugbo ụnu l'ụkporo ise, mbụ ndu bụkota ndu ike dụ l'ọgu.

¹⁷ L'ikfu Bénjaminu, onye bụ onye ishi ndu ojọgu bẹ bụ Ẹliyada onye ike dụ l'ọgu. Ndu ojọgu, yẹbedua l'achị bẹ dụkota ụnu unwoke ugbo ụnu l'ụkporo ise, mbụ ndu l'apa ube mẹe iwhe l'eegudeje egbobuta onwonye.

¹⁸ Onye l'etsota iya nụ bẹ bụ Jehozabadu. Ndu ojọgu, yẹbedua l'achị bẹ dụkota ụkporo ụnu unwoke ugbo ụnu l'ụkporo labọ l'unwoke iri.

¹⁹ Ndu ono bụ ndu l'ejeru eze ozhi, t'a gụfukwa iya ndu ọwhu eze doberu lẹ mkpụkpu, ọ tụkotaru; o shihu ike l'alị ndu Juda l'owhu.