2 Iwhe e meru l'oge ndu eze 16 - BAYỊBURU Ẹzaa

Ọgu onye lẹ Ízurẹlu

¹ O be l'awha kwe Asa ụkporo awha l'awha iri l'ishii, ọ watarụ ọbu eze, Básha bụ eze ndu Ízurẹlu jekfu ndu Juda ọgu, je atụa mkpụkpu Rama t'o shihu ike, nke ọwhu l'oo-to kwe t'ọ dụ onye l'e-shi l'ẹka iya nke Asa, bụ eze ndu Juda lụfu alụfu, m'ọ bụ bata abata.

² Tọ dụ iya bụ, Asa wota mkpọla-ọcha mẹe mkpọla-ododo l'ẹku, dụ l'ụlo Onye-Nwe-Ọha mẹe l'ẹku, dụ l'ụlo eze wojeru eze ndu Arámu, bụ Benu-hadadu, onye bu lẹ Damásukọsu bya asụ iya:

³ “Tẹ mu lẹ ghu tụgbanu bụru nnanụ, ẹgube ono, nna mu yẹle nna ghu shi tụgba bụru nnanụ. Lekwa mkpọla-ọcha yẹle mkpọla-ododo, mu wotaru ghu ndọwa. Tụgbua je emebyia atụgba ono gụ lẹ Básha bụ eze ndu Ízurẹlu tụgbaru, nke ọwhu l'ọo-parụ mu haa.”

⁴ Benu-hadadu kweta iwhe eze bụ Asa kfuru. O yefu ndu ishi ndu ojọgu iya, whẹ jeshia ọgu lẹ mkpụkpu, dụkota l'alị Ízurẹlu. Whẹ lwụta mkpụkpu Ijọnu, mkpụkpu Danu, mkpụkpu Abẹlu-mayimu ọwaa mkpụkpu ẹka l'aakwakọbe iwhe l'alị ndu Náfutali l'owhu.

⁵ Básha nụlewho iwhe meru nụ, o buhaa ọtu mkpụkpu Rama ono t'o shihu ike, gbado ọrwu ono, o gude l'ẹka arwụ.

⁶ Tọ dụ iya bụ, eze bụ Asa chịtakota ndu Juda l'owhu, whẹ je evushikota ẹwhuru ono yẹle oshi ono, Básha shi gude atụ mkpụkpu Rama t'o shihu ike. Asa chịta iya tụa mkpụkpu Geba mẹe mkpụkpu Mizupa, whẹ shihukota ike.

⁷ Nteke ono bẹ Hanani, bụ onye l'awhụ awhụ byakfutaru Asa bụ eze ndu Juda bya asụ iya: “Eshi-ọwhu ọ bụ eze ndu Arámu b'i dakoberu, t'ọ bụ Onye-Nwe-Ọha, bụ Chileke ghu b'i dakoberu, bẹ ndu ojọgu eze Arámu ono pyofuwaru wụkashihu ghu l'ẹka.

⁸ ?Ndu Itiyópiya mẹe ndu Libyiya ta abụnua ikpoto ndu ojọgu, chị igweligwe ụgbo-ịnya mẹe ndu l'agba ịnya bẹ whẹ bụ? ?Tọ dụ l'ọo l'ị dakoberu Onye-Nwe-Ọha b'o gude woru whẹ ye unu l'ẹka?

⁹ Ẹnya Onye-Nwe-Ọha bẹ l'eje eje alwa alwa lẹ mgboko l'owhu, achọ ndu kpọru obu yeru iya tẹ ya gbẹe whẹ ọkpu-ike. I mewaru umere onye eswe, ọo ya bụ lẹ wata ntaa tụgburu bẹ ọgu l'a-nọ-zhiawho etso ghu.”

¹⁰ Ọo ya bụ, Asa vọru ọku ghua ẹhu l'ẹka onye ono, l'awhụ awhụ ono nọ, ọ tụru iya chee l'ọka mkpọro, o noo nkele ẹhu-eghughu l'avọ iya kfurukfuru l'ẹhu l'iswi iwhe ono. Asa melahaa ụwhodu ndu madzụ ome-l'iwe nteke ono.

Anwụhu Asa

¹¹ Iwhe Asa megbaberu, watazhiewho l'ishi jeye lẹ ngvụcha b'e dekotaru l'ẹkwo ndu eze ndu Juda mẹe nke ndu Ízurẹlu.

¹² Ọ bụru l'awha kwe iya ụkporo awha l'awha iri lẹ tete, ọ watarụ ọbu eze bẹ iwhe meru Asa l'ọkpa. Iwhe-ememe ono ka iya njọ. Nteke ono, iwhe ono l'eme iya bẹ l'ọoto chọdua Onye-Nwe-Ọha, ọ bụru ndu l'eme ọgvu b'ọ chọru jee tẹ whẹ yeru iya ẹka.

¹³ Asa bya anwụhu lakfu nna iya whẹ lẹ maa. Ọ bụru l'awha kwe iya ụkporo awha ugbo labọ l'awha lanụ, ọ watarụ ọbu eze b'ọ nwụhuru.

¹⁴ Whẹ lia ya l'ilu, ọ tụru doberu onwiya lẹ mkpụkpu Dévidi. Whẹ nyebe iya l'igbe-odzu a wụru mmanụ, l'eshikaa kwẹkwekwe, mbụ mmanụ ọwhu, ndu l'eme mmanụ kụru l'ẹka whẹ. Whẹ kpọberu iya o-kpo-tititi ọku gude kwabẹ iya ugvu.