2 Iwhe e meru l'oge ndu eze 15 - BAYỊBURU Ẹzaa

Iwhe Asa mezhiru emezhi

¹ Ume Chileke bya Azaríya nwa Odẹdu l'ẹhu.

² Ọ lụfu-shia jekfu Asa je asụ iya: “Asa mẹe ndu Juda mẹe ndu Bénjaminu l'owhu, unu ngabẹru mu nchị. Onye-Nwe-Ọha l'a-tụkwaru ike yeru unu m' ọ -bụru l'unu tụru ike yeru iya. Unu -chọo ya bẹ unu l'a-chọ-vu iya. Ọle unu -haa ya, ya ahaa unu.

³ O tewaru ẹnya ndu Ízurẹlu nọ, whẹ te enwe ọkpobe Chileke, whẹ te enwe ndu l'agbajẹ ẹja nụ Chileke, l'ezhi whẹ iwhe, whẹ te enwe iwu, l'achị whẹ nụ.

⁴ Ọle nteke iwhe l'atsụ whẹ l'anụ bẹ whẹ lwakfutaru Onye-Nwe-Ọha, bụ Chileke nke Ízurẹlu, whẹ chọo ya bya achọ-vu iya.

⁵ Nteke ono bẹ madzụ l'ete ejedu g'ọ dụ iya mma, t'iwhe be eme iya. O noo nkele ndu bu l'alị ono bẹ nọlewho l'aghamẹhu.

⁶ Mba nọnu fụta, whẹ egwee mba ibe whẹ ryaka-eryune, mkpụkpu egwee mkpụkpu ibe whẹ ryaka-eryune, nkele Chileke bẹ gude iwhe-ọtsulanu, dụ l'iche l'iche echi whẹ ọnu l'alị.

⁷ Ọle t'unubẹdua shihu obu ike. Unu ba atugbekwa ẹka l'ọrwu unu l'arwụ, nkele ọrwu, unu rwụru bẹ l'ee-bu unu obunggo iya.”

⁸ Nteke Asa nụru okfu ono, mbụ ozhi ono, Azaríya nwa Odẹdu zhiru, obu bya eshihu iya ike. Ọ bya ewoshikota ejo agwa, dụ l'alị ndu Juda, mẹe l'alị ndu Bénjaminu l'owhu, mẹe ọwhu dụ lẹ mkpụkpu ono, ọ natakọtaru l'ugvu ugvu alị Ífuremu. Ọ bya emekwazhia ẹnya-mgbẹja Onye-Nwe-Ọha ono, dụ l'atatiwhu ụlo Onye-Nwe-Ọha.

⁹ Tọ dụ iya bụ, ọ chịkobe ndu Juda l'owhu, mẹe ndu Bénjaminu, mẹe ndu ọwhu shi l'ikfu Ífuremu, mẹe ndu ikfu Manáse, mẹe ndu ikfu Símiyọnu, mbụ ndu ono, whẹ l'iya bu, nkele igweligwe bẹ kfụkafuru lẹ Ízurẹlu wụ-kfuta Asa gẹ whẹ whụru lẹ Onye-Nwe-Ọha, bụ Chileke iya bẹ swiru iya eswiru.

¹⁰ Whẹ dzua lẹ Jerúsalẹmu l'ọnwa ẹto l'awha kwe Asa awha iri l'ise, ọ watarụ ọbu eze.

¹¹ Whẹ gbaarụ Onye-Nwe-Ọha ẹja lẹ mbọku ono. Ọ bụru l'anụ, whẹ kpụkoru l'ọgu bẹ whẹ shi wota anụ gbaa ẹja ono, mbụ ụnu eswi l'ụkporo ugbo iri l'ise, mẹe ụnu atụru ugbo iri l'ẹsaa l'ụkporo atụru iri.

¹² Whẹ gbaa ndzụ sụ lẹ whẹ l'e-gude obu whẹ l'owhu mẹe ndzụ whẹ l'owhu chọo Onye-Nwe-Ọha, bụ iya bụ Chileke nke nna whẹ.

¹³ L'onye l'ẹte achọo Onye-Nwe-Ọha, bụ Chileke nke Ízurẹlu bẹ l'ee-gbu egbugbu, mbụ nwata mbụ ọgurenya, oke l'anya.

¹⁴ Whẹ gude oke olu chia mkpu tụa ụzu, bya egbua opyi-ọku, whụa ụpyi gude ribuaru Onye-Nwe-Ọha nte.

¹⁵ Ndu Juda l'owhu tekota ẹswa nte ono, whẹ riburu, nkele whẹ gude obu whẹ g'ọ ha ribua ya, tẹhenu whẹ gude lẹge ẹgu iya ha whẹ l'ẹhu chọo Chileke chọ-vu iya. Onye-Nwe-Ọha bya, emee whẹ tukfuru ume ibẹka ibẹbo.

¹⁶ Eze bụ Asa bya anafụ ne iya oche, bụ Maaka ọkwa ọbu eze-nwanyị, nkele ọ ya doberu ejo agwa Ashera. Asa bya egbujishia itso Ashera ono, Maaka doberu gwee ya ryaaryaa, je akpọo ya ọku l'ọnu-iyi Kidirọnu.

¹⁷ Ọle o to wofudu ẹka ono, l'aagwajẹ iwhe lẹ Ízurẹlu. Obenu lẹ Asa zhiru obu iya l'ẹka Onye-Nwe-Ọha nọ jeye g'ọ nọ-beru.

¹⁸ O wota iwhe nna iya doberu nsọ mẹe ọwhu yẹbedua doberu nsọ bya edobe l'ụlo Chileke, mbụ mkpọla-ọcha, mẹe mkpọla-ododo, mẹe arya ọdo.

¹⁹ Ọgu ọdo ta adahẹ jeye a nọkota awha, kwe Asa ụkporo awha l'awha l'iri l'ise, ọ watarụ ọbu eze.