2 Iwhe e meru l'oge ndu eze 14 - BAYỊBURU Ẹzaa

¹ Ọo ya bụ, Abáyija bya anwụhu lakfushia nna iya whẹ lẹ maa, e lia ya lẹ mkpụkpu Dévidi. Asa, bụ nwa iya nwoke bya abụru eze l'ọzori iya. Nteke Asa bụ eze bẹ nchị dụ ndoo l'alị ono awha iri.

Nteke Asa bụ eze ndu Juda

² Asa bẹ meru iwhe dụ ree mẹe iwhe kfụru nhamụnha l'ẹnya Onye-Nwe-Ọha bụ Chileke iya.

³ O wofuru ẹnya ẹka ono, l'aagbajẹru agwa ndu ọha ọdo ẹja; wofu ẹka ono, l'aagwajẹ iwhe, bya akụpyashia ẹwhuru ono, e doberu nsọ, gbutsushia itso Ashera.

⁴ Ọ tụaru ndu Juda iwu sụ tẹ whẹ chọo Onye-Nwe-Ọha, mbụ Chileke nke nna whẹ yẹle tẹ whẹ dobe iwhe iwu iya kfuru mẹe iwhe ọ sụru tẹ whẹ meje.

⁵ O nokwawho g'o wofuru ẹka l'aagwajẹ iwhe ono, dụkota lẹ mkpụkpu ndu Juda mẹe ẹnya ẹka ono, l'aakpọje ụ̀nwù isẹnsu ọku, dụ iya nụ. Nchị dụ ndoo l'alị-eze ono nteke l'ọochi.

⁶ Ọ tụru mkpụkpu, a tụ-wheru mgbodo mgburumgburu l'alị Juda, nkele nchị dụwaa ndoo l'alị ono. Ọ tọ dụdu onye byarụ iya ọlwushi ọgu l'awha ono g'ọ ha, nkele Onye-Nwe-Ọha bẹ meru nchị dụ iya ndoo.

⁷ Ọ bya asụ ndu Juda: “Unu t'anyi tụa mkpụkpu-a t'o shihu ike, gude mgbodo tuwheta iya mgburumgburu, tụshia ya ụlo-eli yekota iya ọnuzo mẹe mgbọro-igwe, l'ee-gudeje agbachi iya agbachi. Alị-a bẹ bụkwadu nke anyi, o noo l'anyi chọru Onye-Nwe-Ọha, bụ Chileke anyi, anyi chọru iya; o mewaa tẹ nchị dụ anyi ndoo ibẹka ibẹbo.” Ọo ya bụ, whẹ bya atụa mkpụkpu ono, ọ gaarụ whẹ.

⁸ Asa bẹ nweru ndu ojọgu, shi l'ikfu Juda; ndu dụ ụnu unwoke ugbo ụnu l'ụkporo ugbo iri l'ẹsaa l'unwoke iri. Ndu ono l'egudeje eze iwhe l'eegudeje egbobuta onwonye mẹe arwa. O nweru ndu ojọgu, shi l'ikfu Bénjaminu, ndu ono dụ ụkporo ụnu unwoke ụkporo ụzo iri l'ise. Ọwhube ndu ono l'apajẹ iwhe l'eegudeje egbobuta onwonye nke nshịi mẹe akfụ. Ndu ono gẹ whẹ bụkota ndu ike dụ l'ọgu.

Asa lwugburu Zera

⁹ O noo ya, onye Itiyópiya, l'eeku Zera bya achịta ụnukurunu ndu ojọgu byakfutashia ndu Juda ọgu, chịru ụgbo-ịnya, dụ ụkporo ugbo iri l'ise whẹ sọru yobayoba jeye whẹ bahụ lẹ mkpụkpu Maresha.

¹⁰ Asa bya achịta ndu nkiya jekfushia Zera whẹ ọgu. Whẹ tụko kwaa kẹkereke ọgu ono lẹ nsụda Zéfata lẹ mkpụkpu Maresha.

¹¹ Tọ dụ iya bụ, Asa bya aryaku Onye-Nwe-Ọha, bụ Chileke iya sụ: “Jiko Onye-Nwe-Ọha; ọ tọ dụkwa onye ọdo, dụ g'ọo ghu, bụ onye l'e-yetaru onye ọkpehu l'adụa ẹka tẹ yẹle onye ọkpehu dụ swịa ya. Yetanuru anyi ẹka jiko Onye-Nwe-Ọha, bụ Chileke anyi, nkele ọo ghu bẹ anyi dawhuberu, ọ bụru ẹwha ghu bẹ anyi gude abyakfuta ụnukurunu ndu-a ọgu. Gụbe Onye-Nwe-Ọha, ọ kwa ghu bụ Chileke anyi; be ekwekwa t'ike madzụ ka nkeghu.”

¹² Ọo ya bụ, Onye-Nwe-Ọha lwụ-gbua ndu Itiyópiya l'iwhu Asa mẹe l'iwhu ndu Juda. Ndu Itiyópiya ono tsu l'ọso.

¹³ Asa mẹe ndu whẹ l'iya lị chịa whẹ jeye mkpụkpu Gera. Ọgu ono taa ishi ndu Itiyópiya ono jeye tọ dụ onye o gbuwhodoru. E gweru whẹ ryaaryaa l'iwhu Onye-Nwe-Ọha yẹle ndu ojọgu iya. Ndu Juda vụa arya whẹ shii.

¹⁴ Mkpụkpu lile, gbarụ mkpụkpu Gera mgburumgburu bẹ whẹ lakọtaru l'iyi, nkele ntsụ-megvu, shi l'ẹka Onye-Nwe-Ọha bẹ byarụ ndu mkpụkpu ono l'ẹhu. Whẹ gwoo arya ndu mkpụkpu ono, mkpata nkele arya parụ iya ẹka.

¹⁵ Whẹ bakfu ụlo-ẹkwa ndu nweru élwù; je erwuko ikpoto atụru ndu ono mẹe ịnya-kamẹlu whẹ. Nteke ono whẹ lwatashia Jerúsalẹmu.