2 Iwhe e meru l'oge ndu eze 13 - BAYỊBURU Ẹzaa

Nteke Abáyijamu bụ eze ndu Juda

¹ L'awha kwe eze Jerobowamu awha iri l'ẹsato, ọ watarụ ọbu eze ndu Ízurẹlu bẹ Abáyija watarụ ọbu eze ndu Juda.

² Ọ chịru awha ẹto lẹ Jerúsalẹmu. Ẹwha ne iya bụ Mayikaya nwada Yuriyẹlu nke mkpụkpu Gibyiya. Ọgu bya adalaharụ Abáyija yẹle Jerobowamu.

³ Abáyija tụgburu jeshia ọgu ono, chịta ndu ojọgu dụ ụnu ụnu ugbo ụnu labọ l'ụkporo iri, bụ ndu tsụru lẹ nwoke, bụru ndu ojọgu, a họru ahọho whẹ jeshia. Ọwhube Jerobowamu chịta ndu ojọgu nkiya, dụ ụnu ụnu ugbo ise, bụkwawho ndu a họru ahọho, whẹ je akwaarụ Abáyija kẹkereke.

⁴ Tọ dụ iya bụ, Abáyija je akfụ-koru l'eli ugvu Zemarayimu l'ugvu ugvu alị Ífuremu, kfushilaha sụ: “Jerobowamu, lẹ Ízurẹlu l'owhu, unu ngabẹ nchị!

⁵ ?Ọ fụtaru l'unu ta amadụ lẹ Onye-Nwe-Ọha, bụ Chileke nke Ízurẹlu bẹ gude ọgbandzu, l'ẹte anwahụ anwahụ woru ọobu eze ndu Ízurẹlu nụ Dévidi yẹle ẹpa iya jeye lẹ gbururu?

⁶ Ọ bụru iya bẹ Jerobowamu nwa Nebatu, bụ onye ozhi Sólomọnu nwa Dévidi gbalihuru kwefuru onye-nwe-iya nụ ike.

⁷ Ndu bụ ọga-lẹ-mkpa madzụ, bụ ndu ejo-obu bya eswiwhee ya mgburumgburu, bụru ọ-karia-ẹka l'ẹka Rehobówamu nwa Sólomọnu nọ, mbụ nteke Rehobówamu bụkwaduroo nwata-une, l'adụa iwhe ọ marụ, t'ọ dụ ike kweeru whẹ gagarịga.

⁸ “Iwhe unu tụbenuru ntaa bụ l'unu l'e-kweru alị-eze Onye-Nwe-Ọha gagarịga, mbụ alị-eze ono, o yeru l'ẹka ẹpa Dévidi. Unu hakwa l'igwe l'ẹka iya nke unu, tẹmenu unu l'ụnwu oke-eswi mkpọla-ododo ono, Jerobowamu meshiru t'ọ bụru agwa unu nọdukwawho.

⁹ ?Tọ nụa unu bẹ chịfuru ndu l'agbarụ Onye-Nwe-Ọha ẹja, mbụ ẹpa Érọnu mẹe ndu Lívayi, bya egude ẹka unu dobe ndu l'agbarụ unu ẹja ẹgube ono, ndu ọha ọdo l'emeje? Iwhe bụ onye gude oke-eswi yẹle ebyila ẹsaa bya tẹ ya swaa onwiya ẹja l'ẹhu bẹ bụwaa onye l'agbarụ agwa ono, l'adụa iwhe ọ bụ ẹja.

¹⁰ “Ọle anyịbedua bẹ bụ Onye-Nwe-Ọha bụ Chileke nke anyi, anyi tẹke ahakwaa ya. Anyi nweru ndu l'agbajẹ ẹja nụ Chileke, bụ ẹpa Érọnu. Ọo whẹ l'ejeru Onye-Nwe-Ọha ozhi, ndu Lívayi l'eyeru whẹ ẹka l'ozhi ono.

¹¹ Ụtsu mbọkumboku mẹe urwẹnyashi, fụtaru afụta bẹ whẹ l'agbajẹ ẹja ọkpokota-iwhe-ọku, kpọoru Onye-Nwe-Ọha ụ̀nwù isẹnsu, l'eshi kwẹkwekwe ọku, bya edoo buredi, dụ nsọ l'eli teburu ono, e mecharu emecha. L'urwẹnyashi bẹ whẹ l'eyeje ọku l'oryọku ono, a tukoberu l'iwhe ono, e meru lẹ mkpọla-ododo, l'aatukobeje oryọku. O noo nkele anyịbedua l'edobe iwhe Onye-Nwe-Ọha, bụ Chileke anyi yeru anyi l'ẹka t'anyi dobeje. Ọle unubẹdua bẹ pawarụ Onye-Nwe-Ọha haa.

¹² Chileke bẹ swiru anyi eswiru. Ọo ya bụ onye ishi anyi. Ndu l'agbajẹru iya ẹja bẹ chịwaa opyi-ọku abya tẹ whẹ gbua opu-ọgu l'ishi unu. Unubẹ ụnwu Ízurẹlu, t'unu ba alwụshikwa Onye-Nwe-Ọha ọgu, mbụ Chileke nke nna unu whẹ, nkele ọ tọo kalẹkwaru unu.”

¹³ Jerobowamu bẹ zhihawaru ndu ojọgu iya tẹ whẹ jee mpya ọgu l'azụ ndu Juda ono. Jerobowamu gude ndu ojọgu iya nọdu whẹ l'iwhu, ndu ojọgu iya ọwhu kpuru ndu Juda ono l'azụ.

¹⁴ Ndu Juda bya aghaa ẹnya; whụ l'ọgu ono shi whẹ l'iwhu shi whẹ l'azụ. Whẹ ryaku Onye-Nwe-Ọha, ndu l'agbajẹ ẹja nụ Chileke gbua opyi-ọku.

¹⁵ Tọ dụ iya bụ, ndu Juda chishia mkpu ọgu. Whẹ chilewho mkpu-ọgu ono, Chileke lwụ-gbua Jerobowamu mẹe ndu Ízurẹlu ono gẹ whẹ ha l'iwhu Abáyija yẹle ndu Juda.

¹⁶ Ndu Ízurẹlu gbaarụ ndu Juda ọso, Chileke woru whẹ ye ndu Juda l'ẹka.

¹⁷ Abáyija yẹle ndu nkiya gbua whẹ beebee, nke ọwhu bụ lẹ ndu whẹ gburu egbu lẹ ndu ojọgu ndu Ízurẹlu ono bẹ dụkota ụnu ugbo ụnu ẹto l'ụkporo ụnu madzụ labọ l'ụmadzu iri, bụkota ndu ojọgu, a họru ahọho.

¹⁸ Ọo ya bụ, a kakputa ndu Ízurẹlu l'ẹnya nteke ono. Ndu Juda bya alwụ-gbua, o noo nkele whẹ dakoberu Onye-Nwe-Ọha, bụ Chileke nke nna whẹ.

¹⁹ Abáyija chịpyabe Jerobowamu, naa ya mkpụkpu Bẹtelu yẹle ụnwu mkpụkpu, dụkota iya nụ, mẹe mkpụkpu Jeshana yẹle ụnwu mkpụkpu, dụkota iya nụ, mẹe mkpụkpu Éfurọnu yẹle ụnwu mkpụkpu, dụkota iya nụ.

²⁰ Jerobowamu ta adụhe ike nwetabaa ike enweta ọdo nteke Abáyija nọ ndzụ. Onye-Nwe-Ọha bya echigbua ya ọ nwụhu.

²¹ Ọle Abáyija bẹ ike l'aka aka eje eje. Ọ lwụa ụnwanyi iri l'ẹno, nwụta ụkporo unwoke l'unwoke labọ; nwụta ụnwanyi iri l'ishii.

²² Iwhe ọdo, Abáyija megbaberu mẹe iwhe o meru mẹe okfu, o kfuru b'e dekotaru l'ẹkwo akọ onye nkfuchiru Chileke, bụ Ido.