2 Iwhe e meru l'oge ndu eze 12 - BAYỊBURU Ẹzaa

Ndu Íjiputu zebataru Jerúsalẹmu

¹ Ọchichi lwalẹwho Rehobówamu l'ẹka ọkpobe alwalwa, o shihulewho ike ree, yẹle ndu Ízurẹlu bya ahaa ome iwhe iwu Onye-Nwe-Ọha kfuru.

² O rwua l'awha kwe Rehobówamu awha ise, ọ watarụ ọbu eze, Shishaku, bụ eze ndu Íjiputu byatashia ọgu lẹ Jerúsalẹmu, nkele whẹ te ekwedu tẹ Onye-Nwe-Ọha gude ire whẹ ẹka.

³ Ọ chịru ụnu ụgbo-ịnya ugbo ẹto mẹe ụkporo ụnu ndu l'agba ịnya ugbo ẹsaa l'ụnu iri, whẹ byatashia ọgu ono. Ndu whẹ l'iya shi lẹ Íjiputu bya ọgu ono bụ agụta agụta, mbụ ndu Libyiya, mẹe ndu Sukimu, mẹe ndu Itiyópiya.

⁴ Ọ natakọta iwhe bụ mkpụkpu, a tụshiru ike lẹ Juda, whẹ sọru yobayoba byatashia Jerúsalẹmu.

⁵ Tọ dụ iya bụ, Shemaya, bụ onye nkfuchiru Chileke byakfuta Rehobówamu yẹle ndu ishi ndu Juda gẹ whẹ dzukoru lẹ Jerúsalẹmu l'ẹka whẹ l'atsụ Shishaku egvu. Ọ sụ whẹ: “Ọ waa iwhe Onye-Nwe-Ọha l'ekfu ndọwa: ‘Unu pawarụ mu haa, mbẹdua pawarụ unu haarụ Shishaku.’ ”

⁶ Ndu ishi ndu Ízurẹlu ono mẹe eze bya ewozeta onwowhe alị sụ: “Onye-Nwe-Ọha bẹ dụ chịriri.”

⁷ Onye-Nwe-Ọha whụlewho lẹ whẹ wozetaru onwowhe alị, Onye-Nwe-Ọha bya ekfuru okfu yeru Shemaya sụ: “Eshi ọwhu whẹ wozetawaru onwowhe alị bẹ mu ta alahẹdu whẹ l'iyi. Mu l'e-mechia t'a nafụta whẹ. Mu te eshihedu l'ẹka Shishaku tụ-koshi Jerúsalẹmu ẹhu-eghughu mu.

⁸ Ọle ọbu, whẹ l'a-nọdu Shishaku lẹ mkpula, nke ọwhu whẹ l'a-marụ ọdu iche dụ l'aanọ mu l'ẹka eje ozhi mẹe l'aanọ l'ẹka ndu eze ndu alị ọdo eje ozhi.”

⁹ Ọo ya bụ, Shishaku bụ eze ndu Íjiputu byatashia ọgu lẹ Jerúsalẹmu, bya evukoo ẹku, dụ l'ụlo Onye-Nwe-Ọha mẹe ẹku, dụ l'ụlo eze. O vutakota iwhe lile. Ọ chịtakwawho iwhe l'eegudeje egbobuta onwonye ono, Sólomọnu kpụshiru lẹ mkpọla-ododo.

¹⁰ Eze bụ Rehobówamu bya egude ope kpụshia iwhe l'eegudeje egbobuta onwonye ono ọdo gude dochia ẹnya iya ọwhu, woru iya ye l'ẹka ndu ishi ndu l'eche ọnu ẹka l'eeshije abahụ l'ibe eze nche, tẹ whẹ leta iya ẹnya.

¹¹ L'ọobuje nteke eze l'eje l'ụlo Onye-Nwe-Ọha, ndu nche ono aparụ iwhe ono, l'eegudeje egbobuta onwonye etso iya. E -megee, whẹ ewowhuta iya azụ bya edobe l'ụlo-nche.

¹² Nteke ono, Rehobówamu wozetaru onwiya alị l'iwhu Onye-Nwe-Ọha bẹ Onye-Nwe-Ọha wofuru ẹhu-eghughu iya l'ẹka ọ nọ, nke ọwhu bụ l'o to medu iya t'ọ bụru kpurupyata. Ọdo bụru l'ọnodu bya adụ ree l'alị Juda.

Mkpakọ iwhe nwụru l'ọchichi Rehobówamu

¹³ O noo ya, eze bụ Rehobówamu kpọo onwiya g'ọo abara lẹ Jerúsalẹmu bụru eze. Ọ gbarụ ụkporo awha ugbo labọ l'awha lanụ nteke ọ watarụ ọbu eze. Iwhe ọ chịru bụ awha iri l'ẹsaa lẹ Jerúsalẹmu, bụ iya bụ obodo ono, Onye-Nwe-Ọha họtaru l'ikfu Ízurẹlu l'owhu tẹ ya buru. Ẹwha ne iya bụ Naama onye Amọnu.

¹⁴ O meru ejo-iwhe, o noo nkele o to kpọduru obu iya ye tẹ ya chọo ụzo Onye-Nwe-Ọha.

Anwụhu Rehobówamu

¹⁵ Iwhe Rehobówamu megbaberu; wata l'ishi jeye lẹ ngvụcha b'e dekotaru l'ẹkwo Shemaya, bụ onye nkfuchiru Chileke mẹe l'ẹkwo Ido, bụ onye l'awhụ awhụ. Rehobówamu yẹle Jerobowamu ta alwụ-bujedu ọgu alwụ-bu.

¹⁶ Rehobówamu bya anwụhu lakfushia nna iya whẹ lẹ maa. E lia ya lẹ mkpụkpu Dévidi. Abáyija, bụ nwa iya nwoke bya abụru eze l'ọzori iya.