2 Iwhe e meru l'oge ndu eze 11 - BAYỊBURU Ẹzaa

Ozhi, Shemaya zhiru Rehobówamu

¹ Rehobówamu lwarwulewho Jerúsalẹmu; ọ chịkobe ndu ẹnya-ụlo Juda mẹe ndu Bénjaminu; ụkporo ụnu unwoke ugbo ụkporo labọ l'ụnu unwoke ugbo iri, bụ ndu ojọgu, a họru ahọho, tẹ whẹ je alwụshi ndu Ízurẹlu ọgu, nke ọwhu whẹ l'a-natawhu alị-eze ono azụ bya anụ Rehobówamu.

² Ọle Onye-Nwe-Ọha bẹ kfuru okfu yeru Shemaya, bụ onye nke Chileke sụ iya:

³ “Je akarụ Rehobówamu nwa Sólomọnu, bụ eze ndu Juda, gụ akarụ ndu Ízurẹlu l'owhu mẹe ndu Bénjaminu,

⁴ l'ọ waa iwhe Onye-Nwe-Ọha l'ekfu ndọwa: Unu be ejekwa ọlwushi ụnwunna unu ọgu. T'onyenọnu lashia ibe iya, nkele ọo mụbe Onye-Nwe-Ọha bẹ iwhe ono shi l'ẹka.” Ọo ya bụ, whẹ nụa iwhe ono Onye-Nwe-Ọha kfuru dawhushia azụ. Whẹ te ejehe ọlwushi Jerobowamu ọgu.

Rehobówamu tụru Juda o shihu ike

⁵ Rehobówamu bẹ bu lẹ Jerúsalẹmu. Ọ bya atụshia mkpụkpu, dụ l'alị ndu Juda o shihugee ike, nke ọwhu l'oo-gbochitaje whẹ l'ọgu.

⁶ Mkpụkpu ọbu, ọ tụru bụ Bẹ́tulehemu, Étamu, Tekowa,

⁷ Betu-zuru, Soko, Adulamu,

⁸ Gatu, Maresha, Zifu,

⁹ Adorayimu, Lakishi, Azeka,

¹⁰ Zora, Ayịjalonu, ọwaa Hiburọnu. Mkpụkpu ono bẹ bụkota mkpụkpu, a tụshiru ike l'alị ndu Juda mẹe l'alị ndu Bénjaminu.

¹¹ Ọ bya atụa agbarara ye iya, ọ bụru ọ-kpọru-akpaa, bya chịta ndu ishi ndu ojọgu wụ-jia ya. O meta ụlo ẹka l'aakwakọbeje nri, mẹe mmanụ, mẹe mmẹe ye iya.

¹² O yekota iwhe e gude egbobuta onwonye mẹe arwa lẹ mkpụkpu ono, bya emee tẹ mkpụkpu ono bụru ọ-kpọru-akpaa. Ọo ya bụ, Juda mẹe Bénjaminu nọdu iya l'ẹka.

Ndu l'agbajẹ ẹja nụ Chileke mẹe ikfu Lívayi bẹ lwarụ Juda

¹³ Ndu l'agbajẹ ẹja nụ Chileke mẹe ikfu Lívayi, nọkota l'alị Ízurẹlu bya atụru ike yeru iya.

¹⁴ Ikfu Lívayi bya aparụ alị ẹka élwù whẹ l'atajẹ nri mẹe alị whẹ haa, lwatashia Juda mẹe Jerúsalẹmu, o noo nkele Jerobowamu yẹle ụnwu iya te ekwedu tẹ whẹ bụru ndu l'agba ẹja anụ Onye-Nwe-Ọha ẹja.

¹⁵ Ọo Jerobowamu gude ẹka iya gụta ndu l'a-nọ agba ẹja l'ẹka l'aagwajẹ iwhe mẹe ndu l'a-nọ agba ẹja nụ ogvụ-nwamkpi yẹle oke-eswi ọ kpụshiru dobe whẹ l'agwa.

¹⁶ Iwhe bụ ndu kpọru obu whẹ ye tẹ whẹ chọo ụzo Onye-Nwe-Ọha, bụ Chileke nke Ízurẹlu bya eshi l'ikfu g'ikfu ha l'alị Ízurẹlu wụfutakota bya etsoru ikfu Lívayi jeshia Jerúsalẹmu, tẹ whẹ gbaarụ Onye-Nwe-Ọha ngwo-ẹja, mbụ Chileke nke nna whẹ.

¹⁷ Whẹ gbẹe alị-eze ndu Juda ọkpu ike tụru ike yeru Rehobówamu, bụ nwa Sólomọnu awha ẹto kperegedemu. Whẹ mekota iwhe Dévidi mẹe Sólomọnu chọru l'ime awha ẹto ono.

Ndibe Rehobówamu

¹⁸ Rehobówamu bẹ lụru Mahalatu, bụ nwada Jeremotu. Jeremotu bụ nwa nwoke Dévidi. Jeremotu ono lụa Abyihelu, bụ nwada Eliyabu. Eliyabu bụ nwa nwoke Jesi.

¹⁹ Ọ nwụtaru iya unwoke, ẹwha whẹ bụ: Jewushi, ọwaa Shemaraya, ọwaa Zahamu.

²⁰ Rehobówamu lụ-geeru iya bya alụa Maaka, bụ nwada Abụsalomu. Ọ nwụtaru iya Abáyija, ọwaa Atayi, ọwaa Ziza, ọwaa Shelomiti.

²¹ Rehobówamu bẹ ka oye Maaka, bụ nwada Abụsalomu obu karụ unyomu iya ọdo mẹe ụnwanyi ọdo, l'ọoto ọlua l'ọkpoku nwanyị. Ọ lụru ụnwanyi iri l'ẹsato. O nweru ụnwanyi ụkporo ugbo ẹto, l'ọoto ọlua l'ọkpoku nwanyi. Ọ nwụta unwoke ụkporo l'ẹsato bya anwụta ụnwanyi ụkporo ugbo ẹto.

²² Rehobówamu bya atụa Abáyija nwata ụlo Maaka ẹka t'ọ bụru onye ishi l'echilabọ ụnwunna iya, nkele ọo ya b'ọ gbarụ égò tẹ ya mee eze.

²³ O meru iwhe l'ụzo mmamagụ bya edokashia ụnwu iya edokashi, whẹ nọdukota l'uswetuma alị ndu Juda mẹe nke Bénjaminu, mbụ lẹ mkpụkpu lile, a tụru o shihu ike. L'ọonu whẹ nri anụ whẹ iya nke etsutsu iya, ọ lụshiaru whẹ nwanyị.