2 Iwhe e meru l'oge ndu eze 10 - BAYỊBURU Ẹzaa

Nteke Rehobówamu bụ eze ndu Ízurẹlu

¹ Tọ dụ iya bụ, Rehobówamu tụgbua jeshia Shékemu nkele ndu Ízurẹlu l'owhu bẹ wụwaru jeshia ẹka ono tẹ whẹ mee ya eze.

² Nteke ono bẹ Jerobowamu nwa Nebatu nọ lẹ Íjiputu, bụ ẹka ọ gbarụ laa nteke ono l'ọogbaru Sólomọnu ọso. Ọ nụa lẹ Rehobówamu bụwaa eze, o shi lẹ Íjiputu lwatashia.

³ A bya ezhia t'e je ekua ya. Jerobowamu yẹle ndu Ízurẹlu gẹ whẹ ha bya awụ-kfu Rehobówamu bya asụ iya:

⁴ “Nna ghu bẹ boru anyi ivu, l'anyị ẹrwa. Ntaa bụkwa t'i mee ozhi mkpọnwuru ono, nna ghu dzuberu anyi mẹe ivu-ẹrwa ono, o boru anyi kabaa ọlwa alị, nke ọwhu anyi l'a-bụru ndu ozhi ghu.”

⁵ Rehobówamu sụ whẹ: “Unu dawhu azụ l'abalị ẹto ntaa.” Ọo ya bụ, whẹ wụkashihu.

⁶ Tọ dụ iya bụ, eze Rehobówamu jekfushia ndu bụ ọgurenya idzu; mbụ ndu ono, shi ejeru nna iya Sólomọnu ozhi nteke ọ nọ ndzụ, bya ajịa whẹ sụ: “?Ndẹe g'unu sụru tẹ mu yeru ndu-a ọnu?”

⁷ Whẹ sụ iya: “Ọ -bụru l'ịi-dụru ndu-a bẹlebele, eme iwhe dụ whẹ ree, bya ekfuru whẹ okfu njima, ọo ya bụ, whẹ abụru ndu ozhi ghu jeye lẹ gbururu.”

⁸ Ọle Rehobówamu bẹ jịkaru ọnu ono, ndu bụ ọgurenya yeru iya. O jekfushia unwokorọbya, bụ ndu whẹ l'iya tseru idzu; mbụ ndu l'ejeru iya ozhi.

⁹ Ọ jịa whẹ sụ: “?Ndẹe g'unubẹdua sụru tẹ mu yeru ndu-a ọnu? ?Ọo gụnu bẹ anyi l'e-kfuru ndu-a, sụru tẹ mu mee ivu, nna mu boru whẹ t'ọ ka ọlwa alị?”

¹⁰ Unwokoro ono, whẹ l'iya tseru sụ iya: “Iwhe l'ii-kfuru ndu ono, sụru ghu lẹ nna ghu boru whẹ ivu l'anyị ẹrwa, ọdo bụ t'i mee ya t'ọ ka ọlwa alị; iwhe l'ii-kfuru whẹ bụ l'ezeke-mkpụshi-ẹka ghu bẹ ka ukfu nna ghu ọdu igbi.

¹¹ L'eshi ọwhu nna ghu boru whẹ ivu-ẹrwa bẹ l'ii-me iya t'ọ ka njọ. Eshi-ọwhu ọ bụ ẹchachi mmaanụ bẹ nna ghu shi echije whẹ bẹ l'ịi-bụru akpị agbakashị whẹ.”

¹² Ọo ya bụ, whẹ nọlewho abalị ẹto ono, bụ nteke eze sụru tẹ whẹ bya, Jerobowamu yẹle ndu Ízurẹlu l'owhu wụru jekfuwhu Rehobówamu azụ.

¹³ Eze jịka idzu ono, ndu bụ ọgurenya whọ chikoshiru iya, salahaa ndu Ízurẹlu okfu kpaakpaa.

¹⁴ O jenu etsoru idzu ono, unwokoro whọ chikoshiru iya kfua sụ: “Nna mu bẹ boru unu ivu, dụ ẹrwa, ọle mbẹdua l'e-me t'ọ ka njọ. Nna mu bẹ bụ ẹchachi mmaanụ b'o shi echije unu, ọle mbẹdua l'a-bụru akpị agbakashị unu.”

¹⁵ Ọo ya bụ, eze ta angarụ ndu Ízurẹlu nchị. Ọ bụkwanuru Chileke b'o shi l'ẹka ọ dụ nno, nke ọwhu iwhe ono, Onye-Nwe-Ọha shi l'ọnu Ahayija nke mkpụkpu Shilo kfuaru Jerobowamu nwa Nebatu l'a-vụkota.

¹⁶ Gẹ ndu Ízurẹlu l'owhu bya achọfuta l'eze ta angadụru whẹ nchị, whẹ sụ iya: “?Ọo gụnu bẹ anyi lẹ Dévidi jigba? ?Ọo gụnu bụ oke-iwhe, anyi nweru l'ẹhu nwa Jesi? Unubẹ Ízurẹlu, t'onyenọnu lashia ụlo-ẹkwa iya-o! Letawaro ọzo-ụlo ghu ẹnya gụbe Dévidi!” Ọo ya bụ, ndu Ízurẹlu wụkashihu lashia ụlo-ẹkwa whẹ.

¹⁷ Ọ bụwaruro ndu Ízurẹlu onona, bu lẹ mkpụkpu lẹ mkpụkpu, dụ l'alị ndu Juda bẹ Rehobówamu bụ eze whẹ.

¹⁸ Tọ dụ iya bụ, eze Rehobówamu zhifu Adoniramu, bụ onye ishi ọgbo ndu l'eje ozhi mkpọnwuru t'o jekfu ndu Ízurẹlu. O rwua ẹka ono, ndu Ízurẹlu gude ẹwhuru tụ-gbua ya. Eze Rehobówamu mekebe ẹgwegwa nyihu ụgbo-ịnya iya gbalaa, ọ bụru iya ọla Jerúsalẹmu.

¹⁹ Nkeshi nteke ono bẹ ndu Ízurẹlu l'ekwefuru ọzo-ụlo Dévidi ike byeye ntanụ.