1 Tímoti 6 - BAYỊBURU Ẹzaa

Ndu bụ ohu

¹ T'iwhe bụ ndu bụ ohu gụa onye-nwe-whẹ nụ lẹ ndu ọ gbarụ tẹ whẹ kwabẹje ugvu. Ọo ya bụ nggẹ t'e wota ẹwha Chileke mẹe iwhe ono, anyi l'ezhi gwọo l'ẹja.

² Tẹ ndu bụ ohu, onye-nwe-whẹ nụ bụ ndu nke Kuráyisutu ba akọ-mijekwa ndu ono, nwe whẹ nụ nkele ọo lẹ whẹ bụ ụnwunna lanụ. Iwhe whẹ l'e-mechia bụ tẹ whẹ kabaanụ anọ ejeru whẹ ozhi, ejeshi iya ike; eshi onye ono nwe ohu ono kwetakwaruwho nke Kuráyisutu, ọ makwarụwho lẹ Chileke yeru iya obu. Ọonoje emeru ohu iya ono ree gude ebu iya nggo ozhi iya ono, l'oojeshiru iya ike. Tímoti, o noo iwhe l'ịi-nọje ezhi, gụ anmashịjekwaawho ọkwa iya ike.

Ejo nzhi mẹe ọkpobe ẹku

³ Sụa, ọ -bụru l'o nweru onye ọdo, bya ezhide iwhe ọdo gbarụ iche, onye ọbu te ekwe l'okfu nke Onye-nwe-anyi Jisọsu Kuráyisutu, mbụ okfu, l'anụ ọkpobe ndzụ, mbụ onye ọbu jịkafua iwhe ono, anyi zhiru lẹ nke gẹ l'ee-shije etso Chileke,

⁴ onye ono bẹ l'emekwaa nwọ-ha-g'iya ọ-ha-g'iya, l'ẹbe ọdukwanu iwhe onye ono marụ. Ẹhu, l'eme onye ono bụkwa ntụtego mẹe anọ abawhe mba okfu, l'adụa iwhe ọ patarụ, mbụ okfu, bụlewho l'ọokpataje tẹ madzụ doberu ibe iya ẹnya-kfụrukfuru mẹe anọ akpawhe ẹnya mẹe anọ ekfubyishi ibe onye mẹe anọ elewhe ibe onye ejo ẹnya,

⁵ whẹ l'anọje eyeru ibe whẹ okfu. Ndu dụ nno bụ ndu égò sweru eswe, bụkwaruwho ndu l'ẹte amaa ọkpobe-okfu ono. Whẹ l'anọje arị l'a-nọ etso Chileke bẹ bụ ụzo, whẹ l'e-shi rita urwu.

⁶ O noo bụkwaru ọkpobe-okfu. Madzụ l'eritaje oke urwu, m'o -tsoo Chileke. Ọle ọ kwa m'ọ -bụru l'iwhe onye ọbu nwe l'atsụje iya-a l'ẹnya g'ọ halẹkwaa.

⁷ O noo l'ọ tọ dụdu iwhe anyi gude bya mgboko-o, o nokwawho gẹ l'ọoto dụa iwhe anyi l'e-gude eshi lẹ mgboko-o ala.

⁸ Ọo ya bụ, ọ -bụru l'anyi nweru iwhe eriri, nweru iwhe oye l'ẹhu, t'o noo tsụjee anyi l'ẹnya.

⁹ Ọle ndu l'anọje achọ gẹ whẹ l'e-shi kpaa ẹku bẹ bụ ejo-achọ ono, whẹ l'achọ l'enwujeru whẹ ye l'ome iwhe-dụ-ẹji. Ọ bụru iwhe ono l'abụje ọnya nmata whẹ. Igweligwe iwhe l'agụ whẹ nụ tụkoru bụru iwhe mmaanụ, tẹmenu ọ bụru iwhe l'ebutaje whẹ anụ hụbe l'ọku, tẹmenu l'ọolotaje whẹ lomia l'ẹka whẹ l'a-nọdu mebyihu, laa l'iyi.

¹⁰ Ọ kwa oye ẹnya l'okpoga bẹ bụ ẹka iwhe lile, bụ ejo-iwhe futaru. O nwekwaru ndu bụ l'ọo lẹ whẹ l'achọ okpoga bẹ meru whẹ shiswee ụzo, parụ ekwekwe whẹ kweru nke Kuráyisutu parụ haa. Ọ bụkwaru iya whọ meru g'o gude whẹ gude ẹka whẹ wotaru onwowhe iwhe-ọtsulanu, ha l'igweligwe.

Iwhe Tímoti l'e-meje

¹¹ Ọle-a, tẹ gụbedua bụ onye nke Chileke zekotajekwaaru ẹgube iwhe ono g'ọ ha, kebe ẹhu meje t'ị bụru onye dụ chịriri, gụ emekwawho t'ị bụru onye l'akwabẹ Chileke ugvu. Nọshilekwawho ike l'ekwekwe ono, i kweru nke Kuráyisutu, gụ eye ndu ọdo obu. Tajẹkwaru iwhe nshi, gụ adụkwawho odoo.

¹² Dụlekwawho g'ọo onye marụ ọso, mbụ, kebelekwawho ẹhu wheje ewhewhe ọso bụ iya bụ ọso, gbarụ onye kweru nke Kuráyisutu. Kebe ẹhu gbajẹ iya nke ọwhu l'ii-gbarwu ẹka, a kparụ oge t'a gbarwua nggẹ ị nata obunggo ọso ono bụ iya bụ ndzụ tututu-mịmimi. Ọo oku nke ndzụ ono bẹ Chileke kuru ghu sụ ghu t'ị bya enweru nteke ono, ị kfụru l'iwhu edzudzu ọha kfua, o doo ẹnya sụ l'i kwewaru ọkpobe-okfu nke Kuráyisutu ono.

¹³ Ọo l'iwhu Chileke ono, bụ Chileke ọwhu l'anụje iwhe lile ndzụ mẹe l'iwhu nke Kuráyisutu Jisọsu ono, kfụru l'iwhu Páyileti gbaarụ ọkpobe-okfu ono ẹka-ebe, ọo l'iwhu whẹ bẹ mu nọdu ekfushiru ghu iya ike sụ,

¹⁴ t'i tsojelekwawho iwhe lile ono, mu kfushikotaru ghu g'ọ ha. T'ọ bọ dụkwa ẹka l'ii-doswe iya m'ọo l'ẹka lanụ, ọo ya bụ t'ọ bọ dụ ọwhu l'aa-gụru byabẹ ghu jeye nteke ono, Onye-nwe-anyi Jisọsu Kuráyisutu l'a-bya ọdo.

¹⁵ Ọo nteke o rwuru lẹ mgbe iya bẹ Chileke l'e-me t'a whụ-dzuru Kuráyisutu ọbu. Mbụ Chileke ono, dụkota ree, dzukota oke l'ime onwiya; ọ bụru yẹbedua kpụ bẹ bụ Nnajị-Ọha l'owhu, bụru eze, kakọta iwhe lile bụ ndu eze; bụru Onye-Nwe-Ọha ọwhu kakọta iwhe lile, bụ ndụ-nwe-ọha.

¹⁶ Ọo ya kpụ bụ onye l'ẹte abyaa l'anwụhu anwụhu. Ẹka o bu bẹ iwhoro, dụ iya nụ l'ete ekwejedu tẹ madzụ byakụbe iya ntse. O to nwekwa madzụ igbalekọma, gudejewaa ẹnya iya whụa ya, tọ hẹkwanu m'ọo l'o nweru onye bya l'a-whụ iya. Sụa, t'ọ bụru iya bẹ ndiwhe l'a-kwabẹje ugvu; ike ono, bụ agvụgagvu ono abụru nkiya. O nokwa g'ọ dụ-o!

¹⁷ A bya lẹ nke ndu nweru iwhe l'eli-mgboko-o, iwhe l'ii-kfuru whẹ kfushiaru whẹ iya ike bụkwa tẹ whẹ be egudekwa iya ku onwowhe, whẹ te edobehunu obu whẹ l'iwhe ono, l'adụa gẹ l'ọono-be ono. Tẹ whẹ dobechia obu whẹ lẹ Chileke ono, bụ o-me-l'uko. Chileke ono l'anụkotaje anyi iwhe lile, nụ iya nke anyịnyi nke ọwhu l'oo-me t'ẹhu tsọmahu anyi.

¹⁸ Tẹ ndu ono, nweru iwhe meje iwhe dụ ree, mbụ-a; tẹ whẹ meje iwhe dụ ree ono nteke nteke, tẹ whẹ bụru o-me-l'uko, ya ewheje whẹ uwhere tẹ whẹ lẹ ndu ọdo gbaa mgba l'iwhe whẹ.

¹⁹ Ọo -bụru lẹ whẹ l'eme nno, ya abụru iya bụ lẹ whẹ nweru ọkpobe iwhe, o noo lẹ whẹ l'e-shi nno kụberu onwowhe ọkpobe iwhe, mbụ ọkpobe iwhe l'a-dụru whẹ jeyewaro lẹ mgbe l'iwhu. Ọo ya bụkwanu nke ọwhu bụ nteke mgbe iya beleruwho, whẹ anata ndzụ, bụ ọkpobe ndzụ.

²⁰ Sụa, byiko Tímoti, kwabẹlekwaruwho iwhe ono, e yeru ghu l'ẹka ono ẹnya. Gụ ezelajeeru anọ ekfu mkpọkoro okfu l'adụa iwhe ọ patarụ, ba anọdujekwa atụ-whe mkpọkoro ẹgo, bụ iwhe ndiwhe l'ahajẹru sụ l'ọo mmamagụ, ọle ọ tọ dụdu mmamagụ, ọ bụ.

²¹ O nweru ndu l'anọje arị lẹ whẹ marụ iwhe, whẹ egude lẹ whẹ marụ iwhe, lẹ whẹ marụ iwhe, whua ụzo ekwekwe ono, anyi kweru. Tẹ Chileke meeru unu eze-iwhe-ọma.