1 Tímoti 5 - BAYỊBURU Ẹzaa

¹ Ba abajẹkwaru nwoke ọgurenya mba. Iwhe l'ii-mejechia bụ t'i kfujeeru whẹ okfu lẹ nrwe gẹ-woo l'ọo whẹ bụ nna ghu. Mejeeru unwokorọbya gẹ-woo lẹ gụ lẹ whẹ shi l'ẹwho lanụ.

² Ụnwanyi ọgurenya bẹ l'ịi-nọje emeru gẹ whẹ bụ ne ghu. Gụ emekwaruwho ụnwumgboko gẹ gụ lẹ whẹ bụ ụnwu ne. Iwhe mu l'ekfu bụ t'i bi merwukwa onwoghu l'ẹhu whẹ.

Ụnwu-mbunu

³ Kwabẹjekwa ụnwu-mbunu ugvu. Gụ eletaje whẹ ẹnya m'ọ -bụru lẹ whẹ ta amadụ gẹ whẹ l'e-me ilile.

⁴ Nteke bụ lẹ nwa-mbunu bẹ nweru nwa, ọdua l'o nweru nwanwa, t'ụnwegirima ono nwụta l'ọo whẹbedua l'e-vuada ụzo leta ibe whẹ ẹnya, l'o nokwa iwhe gbarụ ndu nke Chileke ndono. Ọo ya bụ, whẹ eshi nno melataru ndu nwụru whẹ nụ ree, ndu ono nwụru whẹ nụ meru whẹ. O noo iwhe dụ ree l'iwhu Chileke.

⁵ Ọle tẹ nwanyị, bụwhoo nwa-mbunu, l'ẹte amaa gẹ l'oo-me ilile, to nwe onye l'eleta iya ẹnya, tẹ nwanyị ono bụkwaru Chileke bẹ l'ọo-nọje ele ẹnya l'ẹka. Tẹ nwa-mbunu ono ba atugbejekwa ẹka l'anọ ekfu anụ Chileke eswe l'ẹnyashi. Iwhe l'ọo-nọje ekfuru iya bụ t'ọ kwọo ya rọ lẹ mkpa.

⁶ Ọle nwa-mbunu ọwhu, l'anọjelewho eme ejo-iwhe dụ iya ree l'obu iya bẹ nwụhuakwaru anwụhu, ọ sụ l'iya nọ ndzụ.

⁷ O noo iwhe l'iikfujeru whẹ ndono, mbụ kfua ya kwata kfushiaru whẹ iya ike nke ọwhu whẹ l'a-nọ eme umere, gbarụ whẹ nụ. Ọo ya bụ t'ọ bọ dụ iwhe l'aa-ta whẹ ụta iya.

⁸ Ọ -bụru l'o nweru onye harụ ndu whẹ l'iya bụ; onye ọbu te eleta whẹ ẹnya, kelekele ndu ọwhu bu ndibe whẹ gẹdegede, iwhe onye ono l'egoshi kwa lẹ ya te ekwetadu nke Kuráyisutu, mbụ mẹe onye l'ete ekwee nke Kuráyisutu bẹ gbẹkwaanu ka iya mma.

⁹ Nteke l'aa-nọ edeshi ẹwha ụnwu-mbunu l'ẹkwo, be edebukwaa ẹwha nwa-mbunu, l'ẹteke anọ-rwua awha ụkporo ugbo ẹto nke ọwhu a nwụru iya. Onye l'ii-deje ẹwha iya bụkwa onye bụ nwoke lanụ kpụ b'ọ lụru.

¹⁰ Tẹ nwanyị, l'ii-de ẹwha iya l'ẹkwo bụkwaru nwanyị, a tụgbaru ọnu ome ree nkiya. Tọ bụkwaru nwanyị, zụfutawaru ụnwu iya ree. Nwanyị ono abụru onye l'akwajẹru ndu byarụ ụlo iya ọkpobe ẹbyii, ya abụkwaruwho nwanyị, gudewaa mini kwọchaa ndu nke Chileke ọkpa, ya abụkwaru nwanyị, yewaru ndu l'eje iwhe-ọtsulanu ẹka, ya abụkwaruwho onye wowaru onwiya yekota l'ome iwhe-ọma mgburumgburu.

¹¹ Jịkajekwa ode ẹwha ụnwu-mbunu, bụkwadua ụnwogbaga. O noo l'ọobuje nteke ẹgu iwhe ono, l'agụje whẹ gụtaleru whẹ whọ, whẹ agbẹeru Kuráyisutu azụ; chọlahaa gẹ whẹ l'e-shi je alụta ji ọdo.

¹² Whẹ -mee ya nno bẹ kwa iya bụ lẹ Chileke l'a-nma whẹ ikpe lẹ whẹ te emehedu iwhe ono, whẹ kweru Kuráyisutu ụkwa iya ono.

¹³ Iwhe ọdo bụru nụ l'ụnwu-mbunu, bụkwadua ụnwogbaga bẹ l'a-nwụlahaa ẹnyiru, whẹ etsoru ekpuwhe l'ụlo. Ọwhu kabaanụ ẹji bụru lẹ whẹ l'e-tsojeru edowhe gwẹregweregwere, whẹ abụru o-jeru-okfu l'eeyeru iya whẹ. Whẹ ekfukwawho iwhe l'agbazhidua whẹ l'ekfukfu ilile.

¹⁴ O nokwa iwhe meru mu l'ekfukwa sụ t'ụnwu-mbunu, bụkwadua ụnwogbaga je alụta ji ọdo, nwụshia ụnwegirima, leta ụlo whẹ ẹnya. Ọo ya bụ nke ọwhu onye ọgu anyi ono, l'ẹte adụ ọrwu l'ọo-whụta anyi l'ẹhu, l'oo-gude ekfuru anyi rororoo.

¹⁵ O nwekwaru ụnwanyi-mbunu ono, ndu ọwhu hawarunụ Kuráyisutu gbee dakọbewaa tsolahaa Sétanu.

¹⁶ Ọo ya bụ, o -nweru nwanyị, kweru nke Kuráyisutu, nweru abụbu; abụbu iya whẹ ono bụru ụnwu-mbunu; tẹ nwanyị ọbu letakwa abụbu iya whẹ ono ẹnya. Tẹ nwanyị ono b'a patakwa mkpa ẹhu abụbu iya whẹ ono, bụ ụnwu-mbunu bya ebo chọchi. Tọ bụlekwaruwho ụnwu-mbunu ọwhu l'ẹte amaa gẹ whẹ l'e-me bẹ chọchi l'a-nọje eleta ẹnya.

Ndu e meru ọgurenya chọchi

¹⁷ Iwhe gbarụ t'e mejee ya bụ t'a kwabẹje ndu, e meru ọgurenya chọchi ugvu, ka l'ugvu, mbụkwa ndu ọwhu l'ejeru chọchi ozhi ree, kelekele nke ndu ono, keberu ẹhu arya okfu Chileke arya, ezhikwa iya who ezhi.

¹⁸ O noo l'e deru iya l'ẹkwo Okfu Chileke sụ: “Unu be ekechijekwa eswi ọnu mẹ unu mee ya l'ọodzoshiru unu ẹswa lẹ balị l'ụda balị unu.” Ọ sụkwawho: “Onye l'eje ozhi gbarụ nke t'ọ natajẹ aswa ozhi, l'ooje.”

¹⁹ Ọ -bụru l'o nweru onye sụru l'onye e meru ọgurenya chọchi bẹ meru ẹji, be eyekwaru onye ọbu ọnu, t'a gbahakwaa l'a dụ ẹbo ọbu ẹto agba ọku iya l'onye ono meru-a iwhe ọbu.

²⁰ Ndu ọwhu bụ ndu l'eme iwhe-dụ-ẹji, gụ abajẹeru whẹ mba l'edzudzu-ọha. Ọo ya bụkwanu nke ọwhu ndu ọwhua l'a-nọwaro atsụ egvu ome iwhe-dụ-ẹji.

²¹ Mu nọdu l'iwhu Chileke mẹe l'iwhu Kuráyisutu Jisọsu mẹe l'iwhu nke ndu ojozhi-imigwe ono ọ họtaru, e kfuru ghu iwhe-e ekfushiru ghu iya ike sụ ghu: t'i tsolekwawho iwhe lile ono, mu nọdu kfushikotaru ghu g'ọ ha. Ba anmajẹkwa madzụ ikpe nteke gụbedua l'ẹteke amarwetaa iwhe onye ọbu meru. T'ọ bọ dụ-zhikwaa iwhe l'ii-meje lee madzụ ẹnya l'iwhu.

²² Rịjeekwa ọriri tẹmenu gụ abyabẹ madzụ ẹka l'ishi; be emejekwa iya gburugburu. T'ẹka ghu ba adụkwa l'iwhe-dụ-ẹji ndu ọdo l'eme. Dobelekwawho onwoghu ọ̀gà.

²³ T'ọ bọ bụlekwawho mini kpụ bẹ bụ iwhe l'ịi-ngụje. Ngụtajekwa mmẹe nwanshị mẹe l'ọ̀gvú ẹwho ghu ono mẹe ẹhu-ba-dụ-mma ono, bụ iwhe l'anọje eme ghu nteke nteke.

²⁴ O nweru ndu ejo iwhe whẹ l'eme bụ ejo iwhe a tụkoru ele l'ẹnya, mbụ ọ gbẹekwanu dụ gẹ-woo l'iwhe ono, whẹ metaru bẹ vuwa whẹ ụzo eje tẹ Chileke nma whẹ ikpe. O nwekwanuru ndu ọwhu bụ a nọnyaada tẹmenu nke whẹ avọ-lishihu.

²⁵ O nokwawho gẹ l'ọoduje iwhe e meru ree. O nweru ree, madzụ l'emee, ya abụru ree, a tụkoru ele l'ẹnya. Nteke bụ l'o nweru ree ọwhu, e meru t'a whụ iya ntaa, bẹ bụkwa a nọnyakwaawho bẹ l'ọo-tụko gbafụtachaa iwhe. ?I nụwaru iya?