1 Tímoti 4 - BAYỊBURU Ẹzaa

Ndu ẹjo nzhi

¹ Ume Chileke bẹ l'ekfuru iya anyi arwụ iya anyi arwụ lẹ nchị sụ l'o rwudelewho nteke Jisọsu l'a-bya b'o nweru ndu l'e-docha ọkpobe-okfu ono, anyi kwetaru ono, wata anọ anga nchị l'iwhe ndu ọgvu l'alowhu alowhu l'ekfu, whẹ etsolahaa iwhe ọgvu ono l'ezhi.

² Ndu ono, l'etso iwhe ọgvu ono l'ezhi bẹ l'ahajẹ tẹ ndu iwe-l'obu-ọchi-l'ọnu-eze whẹ ono gude ejo ejire, whẹ l'anọje adzụshi duwhushia whẹ, mbụ ndu ọbu, l'ẹte amajẹhe iwhe gbarụ whẹ l'ememe nkele Sétanu bẹ gudewaa mkpụrumkpu igwe, ọku dụ, mee iwhe-ọhubama l'ọriri whẹ, gude goshi l'ọo ya nwe whẹ.

³ Ndu dụ nno bẹ iwhe whẹ l'anọje ezhi bụ l'ọ tọ dụdu ree t'a lụje nwanyị, whẹ ekfukwawho l'o nweru ọga nri ọwhu l'ẹte adụa ree tẹ madzụ rijee. Ọle ọ kwaa Chileke bẹ meru nri ono sụ t'e rijee ya eri, mbụ tẹ ndu kweru l'ọo Chileke ono bụ Chileke whẹ, rijee ya mẹ whẹ -kelewa iya ekele iya, mbụkwa ndu ono, byawaa bya amawarụ ọkpobe-okfu ono.

⁴ Iwhe lile, bụ iwhe Chileke meru bẹ dụkota ree eriri. Ọ tọ dụkwa ọwhu gbarụ nke t'a jịkaje iya. Iwhe anyi l'e-mejechia bụ t'anyi rijee iwhe g'iwhe ha mẹ anyi kelewaa Chileke ekele iya.

⁵ O noo l'okfu Chileke mẹe ekfukfu ono, e kfuru nụ Chileke ono bẹ mewaru: iwhe ono dụkota nsọ l'iwhu Chileke.

Onye l'ejeru Kuráyisutu Jisọsu ozhi ejerwe iya ejerwe

⁶ Ọ -bụru l'i wotaru iwhe lile-e, e kfukotaru ghu g'ọ ha kfukotaru ụnwunna lile bẹ kwa iya bụ l'ị bụ onye l'ejeru Kuráyisutu Jisọsu ozhi, ejerwe iya ejerwe. Ọo ya bụ l'iigoshi l'ọo okfu Chileke ono i kwetaru mẹe ọkpobe iwhe ono, e zhiru ghu, i shizhiawho nkeshi ono tsota bẹ bụ nri, i gude azụ onwoghu.

⁷ Ba angabẹjekwa nchị lẹ mkpọkoro akọ-iwhe, l'adụa iwhe bụ ọkpobe-okfu, dụ iya nụ ilile, mbụ akọ, tụkoru bụkotaru iwhe mmaanụ. Iwhe l'ii-mechia bụ t'ị hụjee onwoghu ahụhu nke ọwhu l'ii-gude nno nọdu ndzụ, dụ Chileke ree.

⁸ O nweru ndu l'anọje àhụ̀ ẹhu whẹ àhụ̀hù nke ọwhu whẹ l'e-shihu ike. Àhụ̀hù ono, l'aahụ̀ ogwẹhu bẹ urwu dụkwa, ọle urwu ọbu dụ iya nụ ta abadụ nwishi. Ọle ọwhu urwu gbarụ mgburumgburu bụ lẹ madzụ bẹ hụ̀rù obu iya àhụ̀hù nke ọwhu obu iya ono l'a-nọ etso Chileke. O noo lẹ Chileke kweru ụkwa lẹ ndu l'eme nno bẹ ya l'e-meru eze-iwhe-ọma lẹ ndzụ ọwhu whẹ nọ ntaa, meru whẹ iya lẹ ndzụ, whẹ l'a-nọ lẹ mgbe l'iwhu.

⁹ Okfu-a bẹ bụ okfu, e gude ẹka, mbụ okfu gbarụ tẹ madzụ lile gbobe ẹka labọ nata iya.

¹⁰ O noo iwhe meru anyi l'ekebeje ẹhu ese anya eseshi iya ike nkele anyi l'ele ẹnya Chileke ono, nọ ndzụ, mbụ Chileke bụ onye ndzọta ndiwhe l'owhu, kelekele nke ndu woru onwowhe ye iya l'ẹka.

¹¹ Kfuru whẹ iwhe ono kfushiaru whẹ iya ike, gụ ezhikwaa ya who ezhi.

¹² Be ekwekwa tọ dụ onye l'a-nọ eko ghu ọkpa l'ishi nkele ọo l'ị bụkwadu nwata. Iwhe l'ii-mechia bụ t'i meje umere, l'a-nọ egoshi ndu ọdo gẹ whẹ l'a-nọ eme iwhe ono, l'eezhi whẹ mẹkota iwhe ọwhu l'iime eme. Gụ emejekwawho umere, l'e-goshi ndu ọdo gẹ whẹ l'e-shi ye ibe whẹ obu lẹge gụbedua yeru whẹ iya. Umere ghu emekwaawho tẹ whẹ kweta nke Chileke lẹge gụbedua kwetaru iya. Whẹ edobekwawho onwowhe ọ̀gà lẹge gụbedua doberu onwoghu.

¹³ Iwhe l'iị-nọ-zhiawho eme jeye nteke mu l'a-bya bụkwa: t'ị gụjeeru chọchi ẹkwo-okfu Chileke, gụ emejee t'obu shihu whẹ ike, gụ atụkashijeru whẹ okfu Chileke t'o doo whẹ ẹnya.

¹⁴ Ba akwaswekwaru ẹnya l'iwhe ọma ono, Chileke meru ghu nteke ono, ndu nkfuchiru Chileke gude ike, Chileke nụru whẹ kfuchiaru iya, mbụ nteke ono, ndu e meru ọgurenya chọchi byabẹru ghu ẹka l'ishi.

¹⁵ Kebelekwawho ẹhu meje iwhe ono, whuberu iya iwhu ewhuberu nke ọwhu madzụ lile l'a-whụ lẹge i gude ejelewho l'iwhu l'iwhu.

¹⁶ Kwakwaarụ umere ghu ẹnya; gụ akwakwaa whọ ẹnya l'iwhe ono l'ịinoje ezhi ndu ọdo. Mejelekwawho iwhe ono g'ọ ha, o noo lẹ nteke l'i -mewa nno, gụ a-dzọo onwoghu ndzụ, dzọkwaawho ndu l'anọje anụ iwhe l'iikfu ndzụ.