1 Tímoti 3 - BAYỊBURU Ẹzaa

Ndu ishi chọchi

¹ Okfu-a bẹ kwa okfu, e gude ẹka, kfuru sụ: “Ọ -bụru l'o nweru onye ẹnya dụ tẹ ya bụru onye ishi chọchi, onye ono bụkwa ọkpobe iwhe bẹ l'agụ iya nụ.”

² Onye ishi chọchi bẹ bụfutajekwa onye l'ẹte amarụ ejo ẹka. Ọ bụfutaje nwoke, l'alụ nwanyị lanụ kpụ, ya abụkwaruwho onye l'esedeje onwiya. Ọ bụfutaje onye nweru uche, ọ bụfutaje onye l'emeje umere, gbarụ onye ishi chọchi. Onye ono bụfutaje onye l'oowhe uwhere tẹ ya kwaarụ ndu batarụ ibe iya ẹbyii ree-ree-ree. Ọ bụfutaje onye l'a-dụ ike ezhi ndu ọdo iwhe.

³ T'onye ono ba abụkwa onye l'angụtaje mmẹe, ya eme iya l'ẹnya; onye ono ta abụhunu o-chi-gbaa. T'onye ono bụ-chiaru onye l'eme odoo; onye l'ẹte aswọje ụswo; onye ọbu bụfutaje onye l'ete eyee ẹnya l'okpoga.

⁴ Onye ono bụjekwa onye dụ ike eleta ibe iya ẹnya ree; ya abụru onye ụnwegirima iya l'anụru okfu; akwabẹkwa iya whọ ugvu.

⁵ Lẹ nteke ọ -bụ lẹ madzụ ta adụdu ike bụru onye ishi l'ibe iya, ?ndẹhunu g'onye ọbu l'e-me dụ ike letakota chọchi Chileke ẹnya?

⁶ T'onye ono ba abụkwa onye bụ-wokwadua b'ọ bya abụru onye nke Chileke nke ọwhu onye ọbu l'ẹte awata ome nwọ-ha-g'iya ọ-ha-g'iya, shi nno Chileke anma iya ikpe, g'ọ nmarụ iya Sétanu bụ iya bụ Oshifutuswe.

⁷ Onye ishi chọchi l'a-bụkwawho onye l'ete evua ejo ẹwha l'ẹka ndu l'ẹte abụa ndu chọchi nọ, ọo ya bụkwanu t'ọ bọ dụ onye l'a-sụ l'ọ whụru iwhe onye ishi meru, a nọnyadaawho, Oshifutuswe gude ẹgube iwhe ono nmata onye ishi ono l'ọnya.

Ndu l'ejeru chọchi ozhi

⁸ Ndu l'ejeru chọchi ozhi bẹ bụfutaje ndu l'eeyeru ugvu; whẹ abụkwaruwho ndu l'abụje whẹ kfua okfu; a marụ lẹ whẹ kfuwaru obu whẹ, tẹ whẹ ba abụkwa ndu l'angụnuka mmẹe, tẹ whẹ ba abụkwa ndu l'anọje achọ urwu l'ụzo, l'akfụaru nhamụnha.

⁹ Tẹ whẹ gude obu whẹ g'ọ ha gudepyabe ọkpobe-okfu ono whẹ kwetaru ono, bụ ọkpobe-okfu, Chileke goshiru anyi, t'obu whẹ ba atajẹ whẹ ụta.

¹⁰ T'e vujeekwaru ụzo letaada whẹ eleta, nteke e letageeru whẹ, tọ dụ ẹka ọnu bọru whẹ ẹbo; ọo ya bụ, e yewa whọ ro ọbu tẹ whẹ jejeru chọchi Kuráyisutu ozhi.

¹¹ Tẹ nyee onye l'ejeru chọchi ozhi bụkwaru onye l'eeyeru ugvu. T'ọ bụkwaru onye l'ẹte asụ asụlasu. Ya abụkwaruwho onye l'esedeje onwiya, ya abụru onye goshiwaru lẹ ya gbarụ nke t'e gude ire iya ẹka l'iwhe lile l'oome.

¹² T'onye l'ejeru chọchi ozhi bụkwaru nwanyị lanụ kpụ bẹ l'ọo-nọ alụ. Ya abụru onye l'a-dụ ike leta ụnwu iya ree-ree-ree, eletakwawho ibe iya ẹnya ree.

¹³ O noo l'ọ -bụru lẹ ndu l'ejeru chọchi ozhi bẹ l'ejerwe iya ejerwe b'ọ gbakwarụ nke t'a kwabẹ whẹ ugvu, ka l'ugvu. Whẹ akakwanụ adụ ike gude obu oshihu ike aasa iwhe ono, anyi kweru ono kaa kaa, mbụ iwhe ono, anyi kweru nke l'ọo l'anyi lẹ Jisọsu Kuráyisutu tụgbaru bụru nnanụ.

Iwhe Chileke shi domia edomi

¹⁴ Mu l'elekwa ẹnya lẹ mu ta anọhedu ọdu ntaa mu abya agbawhee ghu.

¹⁵ Ọle mu l'edekwaru ghu-a ẹkwo-ozhi-a; o noo lẹ mu ta amadụ gẹ l'oo-me, ya e nweru iwhe l'a-kpata mu akpọde ukfu. Iwhe meru mu l'ederu ghu iya bụ t'i gude iya marụ iwhe gbarụ ndibe Chileke l'ememe. Chọchi b'ị maanarụ-a l'ọo ya bụ ibe Chileke, mbụ Chileke ono, nọ ndzụ. Sụa, ọ kwa gẹ itso yẹle ukfu-ụlo l'egudeshije ụlo ike bụ gẹ chọchi gudeshi ọkpobe-okfu ono ike.

¹⁶ A tụkoru kwetakota l'ọkpobe-okfu ono, Chileke shi domia edomi bẹ kwatarụ paa ẹka mebyi apaa. Chileke goshiru iya anyi, anyi kwetakwa iya whọ. Ọkpobe okfu ọbu bẹ kfuru sụ: Jisọsu bẹ byarụ lẹ mgboko-o bya abụru madzụ, Ume Chileke goshi l'ọ bụ onye dụ chịriri. Ndu-ojozhi-imigwe gudekwa ẹnya whẹ, whụa ya. E kfukotaru ndu mba lile, dụ lẹ mgboko-o okfu ẹhu iya. Ndiwhe kweta nkiya, Chileke bya ekuta iya kuba l'imigwe, Je akwabẹ iya ugvu, ka l'ugvu.