1 Tímoti 2 - BAYỊBURU Ẹzaa

Gẹ chọchi l'e-gudeje abarụ Chileke ẹja

¹ Iwhe mbụ, mu l'ekfu ekfushi iya ike bụru, t'e kfujeru nụ Chileke sụ iya t'o yeru ndu ọdo ẹka, e kfujekwaru iya whọ sụ iya: t'o mejeeru whẹ iwhe mkpa iya dụ whẹ. T'e kfujekwaruwho nụ iya l'iswi madzụ lile g'a ha, e kelejekwa iya who ekele.

² T'e kfujeru nụ Chileke l'iswi ẹhu ndu eze mẹwaro ndu lile, bụkota ndu ishi, l'achị nụ. Ọo ya bụkwanu nke ọwhu nchị l'a-dụ anyi ndoo, anyi eburu guu mẹe nke ọwhu anyi l'a-nọ anụru Chileke okfu mẹkwawho nke ọwhu anyi l'a-nọ eme umere, gbarụ anyi l'iwhe lile anyi l'eme eme.

³ Sụa, o nokwa iwhe dụ ree ndono. Tẹmenu ọ bụkwaru iya whọ bụ iwhe dụ Chileke ree, mbụ Chileke ono, bụ onye ndzọta anyi ono.

⁴ Ọ dụ Chileke l'uche tẹ ya tụko madzụ lile dzọo. Ọ dụkwa iya whọ ?ọ dụ g'e shi madzụ lile byakọta bya amarụ iwhe ono, bụ ọkpobe-okfu ono.

⁵ O noo l'ọo Chileke lanụ kpụ bẹ dụ nụ, ọ bụkwaruwho onye lanụ kpụ bẹ bụ onye l'akfụjeru lẹ mgbakụ Chileke yẹle madzụ. Onye ọbu bụ Kuráyisutu Jisọsu, bụkwawho madzụ l'onwiya.

⁶ Jisọsu ono gude onwiya, gbaa ẹja nụ Chileke l'iswi ẹhu madzụ l'owhu, t'ọ bụru iwhe ya l'e-gude gbata whẹ. Ya eshi nno goshi l'iwhe dụ iya l'uche bụ tẹ ya dzọfuta ndiwhe l'owhu. Iwhe ono bụru iwhe meru nụ; nteke Chileke l'onwiya sụru l'o noo nteke l'oo-me.

⁷ O noo iwhe meru ọ họta mu, mee mu tẹ mu bụru onye-ishi-ozhi nkiya nke ọwhu mu l'e-gude ozhi-ọma ono je aryaa arya l'alị ndu l'ẹte abụa ndu Ju, mu ryaa ya arya, mu ezhia ya ezhi nke ọwhu whẹ l'e-kwetakota ọkpobe-okfu ono. Ọ kwa ezhi-okfu bẹ mu l'ekfu ẹgube-ẹ. Ọ tọ kwa ejire bẹ mu l'adzụ.

⁸ Sụa, iwhe ẹnya dụ mu bụ t'unwoke kfujezhiawho nụ Chileke l'ẹka lile. Tẹ whẹ chilijee ẹka whẹ, gudeje obu-iwhoro kfuje nụ Chileke. T'ẹhu be eghujekwa whẹ eghu, tẹ whẹ ba abọjekwa obu ẹbo mẹ whẹ l'ekfu anụ Chileke.

⁹ A bya abya l'ụnwanyi, iwhe ẹnya dụ mu bụ t'ụnwanyi rịkwaawho ọriri marụ ẹgube uwe whẹ l'e-yeje l'ẹhu. T'ụnwanyi yejee uwe, gbarụ whẹ nụ. T'iwhe whẹ l'e-gudeje emema onwowhe emema bụru iwhe l'e-goshi lẹ whẹ doberu onwowhe ọga, whẹ sedekwawho onwowhe. T'ọ bọ bụkwa ome ẹgbushi t'ọ bụru iya bụ ẹka ẹnya l'a-nọ eje. T'ụnwanyi be egudejekwa mkpọla-ododo yẹle aka emema onwowhe, tọ bụhunu oye uwe, vu oke aswa bẹ whẹ l'e-gude emema onwowhe ọbu.

¹⁰ Iwhe ụnwanyi l'e-mejechia bụ tẹ whẹ meje iwhe-ọma, bụkwanu iya bụ iwhe gbarụ ụnwanyi, sụru lẹ Chileke dụru whẹ lẹ nsọ l'ememe.

¹¹ T'ụnwanyi wozeje onwowhe alị ọkpobe ewoze, nọduje nwanggujingguji nwụje iwhe l'eezhi whẹ.

¹² Mu te ekwekwa t'ụnwanyi zhije iwhe. Mu te ekwekwawho tọ dụ nwanyị, l'a-nọ atụru unwoke iwhe whẹ l'a-nọ eme. T'ụnwanyi jipyajelekwawho onwowhe nwandoo.

¹³ L'ọ kwa Ádamu bẹ Chileke vu ụzo mee, tẹmenu ọ bya eme Iifu.

¹⁴ Ọ tọ bụkwa Ádamu bẹ Sétanu ghọru ụgho, ọ kwa ọwhube nwanyị b'ọ ghọru iya, mee ya: o mebyia iwu, Chileke tụru.

¹⁵ Ọle iwhe Chileke l'e-gude dzọo nwanyị bụ ọnwushi ụnwu, m'ọ -bụ-zhiaru-a lẹ yẹbe nwanyị ono nọshiru ike l'ekwekwe o kweru nke Kuráyisutu, whẹ eyekwawho ndu ọdo obu, whẹ abụru ndu nke Chileke ọkpobe abụbu, whẹ edobe onwowhe ọga.