1 Iwhe e meru l'oge ndu eze 7 - BAYỊBURU Ẹzaa

Ẹpa Ísaka

¹ Ụnwu Ísaka bụ Tola, Puwa, Jashubu ọwaa Shimurọnu, whẹ dụ ụmadzu ẹno.

² Ụnwu nke Tola bụ Uzi, Refaya, Jeriyẹlu, Jahumayi, Ibusamu ọwaa Sámuwẹlu. Whẹ bụ ndu ishi l'ibe nna whẹ ono, l'aza Tola. Whẹ bụru ndu ojọgu l'ọgbo nkewhe. L'oge nke Dévidi bẹ whẹ dụ ụkporo ụnu ugbo labọ l'ụnu madzụ ugbo iri l'ishii l'ụkporo iri.

³ Nwa nke Uzi bụ Izurahiya. Ụnwu nwoke Izurahiya bụ Máyikelu, Obedaya, Jowelu ọwaa Ishiya. Iwhe whẹ dụ bụ ise. Whẹ ise bụkota ndu ishi l'ẹhu l'ẹhu.

⁴ Whẹ lụshiru igwe nwanyị; nwụshia ụnwu l'igweligwe; o-shi-l'ẹhu whẹ b'e nweru ụkporo ụnu ugbo ẹno l'ụnu madzụ iri, bụ ndu sụwaru oje ọgu.

⁵ Ikfu Ísaka l'owhu, mbụ ẹnya-uwhu whẹ mẹe abụbu whẹ bẹ ndu bụ iya ndu ojọgu dụkota ụkporo ụnu ugbo iri, l'ụnu madzụ ugbo iri l'ẹsaa l'ụkporo iri, lẹ g'e deru iya l'ẹkwo e deshiru g'e shi nwụa whẹ.

Ẹpa Bénjaminu

⁶ Ụnwu Bénjaminu bụ Bela, Beka ọwaa Jediyẹlu. Iwhe whẹ dụ bụ ụmadzu ẹto.

⁷ Ụnwu nke Bela bụ Ezubọnu, Uzi, Úziyẹlu, Jeremotu ọwaa Iiri. Iwhe whẹ dụ bụ ụmadzu ise. Whẹ ise ono bụkota ndu ishi l'ibe nna whẹ, bya abụru dike-ọgu. L'ẹkwo, e deru lẹ g'e shi nwụa whẹ bẹ whẹ dụkota ụkporo ụnu ugbo labọ, l'ụnu ugbo iri l'ise, l'ụkporo l'iri l'ẹno.

⁸ Ụnwu nke Beka bụ Zemira, Jowashi, Eliyéza, Eliyowenayi, Omiri, Jeremotu, Abáyija, Anatotu ọwaa Alemetu. Whẹ bụkota ụnwu Beka gẹ whẹ ha.

⁹ L'ẹkwo, e deru lẹ g'e shi nwụa whẹ bẹ whẹ dụkota ụkporo ụnu ugbo labọ l'ụnu iri l'ụkporo iri. Whẹ bụ ndu ishi l'ibe nna whẹ bya abụru ndu ojọgu.

¹⁰ Nwa Jediyẹlu bụ Byilihanu. Ụnwu nke Byilihanu bụ Jewushi, Bénjaminu, Ehudu, Kenana, Zetanu, Tashishi mẹe Ahishaha.

¹¹ Ẹpa Jediyẹlu gẹ whẹ ha bụ ndu ishi l'ibe nna whẹ, bya abụru ndu ojọgu. Ndu sụwaru oje ọgu dụ ụkporo ụnu ugbo labọ l'ụnu ugbo ẹto.

¹² Shupimu mẹe Hupimu bẹ bụ ụnwu Ịru; Hushimu bụru nwa Aha.

Ẹpa Náfutali

¹³ Ụnwu Náfutali bụ Jahaziyẹlu, Guni, Jeza ọwaa Shalumu. Whẹbedua bụ ẹpa Byiliha.

Ẹpa Manáse

¹⁴ Ọ waa bụ ụnwu Manáse. Nwanyị Arámu, l'ẹte ọlua l'ọkpoku nwanyị bẹ nwụtaru iya Asiriyẹlu mẹe Makiru, bụ nna Giledu.

¹⁵ Makiru bya alụaru Hupimu yẹle Shupimu nwanyị. Ẹwha nwune Makiru nke nwanyị bụ Maaka. Ẹwha onye nke ẹbo bụ Zelofehadu. Zelofehadu bẹ bụ ụnwanyi b'ọ nwụshiru.

¹⁶ Nyee Makiru ono, ẹwha iya bụ Maaka bẹ nwụtaru nwa nwoke, ọ gụa onye lanụ Pereshi. Ẹwha nwune iya bụ Shereshi. Ụnwu Pereshi bụ Ulamu mẹe Rakemu.

¹⁷ Nwa nke Ulamu bụ Bedanu. Ndu ono bụ ẹpa Giledu. Giledu bụru nwa Makiru, Makiru bụru nwa Manáse.

¹⁸ Nwune iya nwanyị, bụ Hamoleketu bẹ nwụtaru Ishodu, Abyiyeza ọwaa Mahula.

¹⁹ Ụnwu nke Shemida bụ Ahiyanu, Shékemu, Likihi ọwaa Aniyamu.

Ẹpa Ífuremu

²⁰ Ífuremu bụ nna Shutela, Shutela bụru nna nke Berẹdu, Berẹdu bụru nna Tahatu, Tahatu bụru nna Eleyada, Eleyada bụru nna Tahatu,

²¹ Tahatu bụru nna Zabadu, Zabadu bụru nna Shutela. Unwoke labọ ọdo, Ífuremu nwụtaru bụ Ẹ́za yẹle Eleyadu. Ụmadzu labọ ono bẹ jeru oshi élwù lẹ mkpụkpu Gatu. Ndu Gatu, bụ ndu a nwụru l'alị ono gude whẹ gbua.

²² Nna whẹ, bụ Ífuremu tsọo áwhụ whẹ nọo ọdu; ụnwunna iya whẹ byarụ iya imiko anwụhu.

²³ Ífuremu bya ejekfu nyee ya azẹe, ọ tsuta ime nwụa nwa nwoke. Ẹwha ọ gụru iya bụ Beríya iswi ejo-iwhe ono, nwụru l'ibe iya.

²⁴ Ífuremu bẹ nwụtaru nwa nwanyị, ẹwha iya bụ Sheera. Sheera bụ iya tụru mkpụkpu Betu-horonu ono, dụ lẹ nsụda yẹle ọwhu dụ l'ugvu, tụa mkpụkpu Uzenu-sheera.

²⁵ Onye nwoke ọdo, Ífuremu nwụtaru bẹ Rafa. Rafa bụ nna Rẹshefu, Rẹshefu bụru nna Tela, Tela bụru nna Tahanu,

²⁶ Tahanu bụru nna Ladanu, Ladanu bụru nna Amihudu, Amihudu bụru nna Elishama,

²⁷ Elishama bụru nna Nunu, Nunu bụru nna Jóshuwa.

²⁸ Alị, bụ nkewhe, mbụ ẹka whẹ bu ebubu bụ: Bẹtelu, mẹe mkpụkpu, dụkota iya mgburumgburu je akpa lẹ mkpụkpu Naaranu, dụ l'ụzo ẹnyanwu-awata mẹe mkpụkpu Gaza, dụ l'ụzo ẹnyanwu-arịba yẹle mkpụkpu, dụkota iya mgburumgburu mẹwaro mkpụkpu Shékemu, mẹe mkpụkpu, dụkota iya mgburumgburu, ọwaa mkpụkpu Aya, mẹe mkpụkpu, dụkota iya mgburumgburu.

²⁹ Ikfu Manáse bụ whẹ shi gude mkpụkpu Betu-shanu, Tanaku, Megido ọwaa Dọ́ru mẹe iwhe bụ mkpụkpu dụkota iya mgburumgburu. Mkpụkpu ono g'ọ ha bụ ndu ẹpa Jósẹfu, bụ nwa Ízurẹlu bukota iya.

Ẹpa Asha

³⁰ Ụnwu nwoke Asha bụ: Imuna, Ishiva, Ishivi ọwaa Beríya. Nwune whẹ nwanyị bụ Séra.

³¹ Ụnwu Beríya bụ Heba mẹe Malukiyẹlu, bụ nna mkpụkpu Byiruzayitu.

³² Heba bụ nna Jafuleti mẹe Shoma mẹe Hotamu. Nwune whẹ nwanyị bụ Shuwa.

³³ Ụnwu nwoke Jafuleti bụ: Pasaku, Byimuhalu ọwaa Áshuvatu. O noo ụnwu Jafuleti.

³⁴ Ụnwu Shemeru bụ Ahi, Rohuga, Huba ọwaa Arámu.

³⁵ Ụnwu nwoke nke Helẹmu bụ Zofa, Imuna, Shelẹshi ọwaa Amálu.

³⁶ Ụnwu Zofa bụ Suwa, Hanẹfa, Shuwalu, Beri, Imura,

³⁷ Beza, Hodu, Shama, Shilisha, Ituranu ọwaa Bera.

³⁸ Ụnwu Jeta bụ Jefune, Pisupa ọwaa Ara.

³⁹ Ụnwu Ula nke nwoke bụru Ara, Haniyẹlu ọwaa Riziya.

⁴⁰ Ndu ono gẹ whẹ ha bụkota eri Asha. Whẹ bụ ndu ishi l'ibe nna whẹ bụru mkparawa, bya abụru ndu ojọgu. Whẹ bụ ndu ishi ndu bụ ishi. L'ẹkwo, e deru g'e shi nwụa whẹ bẹ whẹ dụkota ụkporo ụnu ugbo ẹto l'ụnu ise, bụ ndu sụwaru oje ọgu.