1 Iwhe e meru l'oge ndu eze 5 - BAYỊBURU Ẹzaa

Ẹpa Rúbẹnu

¹ Ọ waa bụ ụnwu Rúbẹnu, bụ ọkpara Ízurẹlu. Rúbẹnu bụ ọkpara, ọle o jekfuru nyee nna iya azẹe, shi nno merwua iwhe-azẹe nna iya; e gude iswi iya woru ọnodu ọkpara ono, ọ bụ nụ ụnwu Jósẹfu, bụkwawho nwa Ízurẹlu. Ọo ya meru t'e de l'ọ bụ ọkpara l'ẹkwo e deshiru lẹ g'e shi nwụa whẹ.

² E kfude iya ekfu bụ Juda kagezhia ike l'ụnwunna iya, tẹmenu ọ bụru l'ẹhu iya bẹ onye ishi ọchichi shi fụta, obenu l'ọnodu ọkpara bẹ bụ Jósẹfu b'ọ larụ.

³ Ndu ọwaa bụ ụnwu Rúbẹnu, bụ ọkpara Ízurẹlu: Hanọku, Palu, Hẹzuronu, Kami.

⁴ Ọ waa bụ ẹpa Jowelu: Jowelu bụ nna Shemaya, Shemaya bụru nna Gọgu, Gọgu bụru nna Shimeyi,

⁵ Shimeyi bụru nna Mayịka, Mayịka bụru nna Reyaya, Reyaya bụru nna Bálu,

⁶ Bálu bụru nna Bera. Bera bẹ Tigulatu-pyilesa, bụ eze ndu Asiriya kpụru lẹ ndzụ. Ọ bụkwaru iya whọ shi bụru ishi l'ikfu Rúbẹnu.

⁷ Ndu ọwaa bụ abụbu whẹ l'ẹnya-uwhu whẹ l'ẹnya-uwhu whẹ mẹe lẹ g'e shi dee ẹwha whẹ l'ẹkwo e deshiru g'e shi nwụa whẹ. Onye ishi whẹ bụ Jeyẹlu, ndụ ọdo bụ Zakaráya,

⁸ mẹe Bela nwa Azazu. Azazu bụ nwa Shema, Shema bụru nwa Jowelu. Ẹka o bu bụ lẹ mkpụkpu Arowa. O bua nno je akpaa lẹ mkpụkpu Nebo mẹe lẹ mkpụkpu Bálu-meyọnu.

⁹ O bukwawho je akpaa l'ụzo ẹnyanwu-awata, bua jeye ẹka l'eeshije abahụ l'echi-ẹgu, l'azụ ẹnyimu Yufurétisu azụ iya ọwa. O noo nkele élwù whẹ zụshiru kabaa l'igwe l'alị Giledu.

¹⁰ L'oge nke Sọlu bẹ ikfu Rúbẹnu lwụshiru ndu Hega ọgu lwụ-gbua whẹ, buchia ụlo-ẹkwa eri Hega ono l'alị, dụkota l'ụzo ẹnyanwu-awata alị Giledu gbaa mgburumgburu.

Ẹpa Gadu

¹¹ Ụnwu Gadu bẹ bu cheeru ụnwu Rúbẹnu iwhu l'alị Báshanu, bua jeye lẹ mkpụkpu Saleka.

¹² Jowelu bụ onye ishi whẹ. Shafamu bụru otsota. Ndu ọdo bụ Jánayi ọwaa Shafatu lẹ ndu bu l'alị Báshanu.

¹³ Ndu bụ abụbu whẹ l'ẹnya-uwhu whẹ l'ẹnya-uwhu whẹ bụ: Máyikelu, Meshulamu, Sheba, Jorayi, Jakanu, Ziya ọwaa Iba. Whẹ dụ ẹsaa.

¹⁴ Ọ waa bụ ẹpa Abyihelu nwa Huri. Huri bụ nwa Jarowa, Jarowa bụru nwa Giledu, Giledu bụru nwa Máyikelu, Máyikelu bụru nwa Jeshishayi. Jeshishayi bụru nwa Jahudo, Jahudo bụru nwa Buzu.

¹⁵ Ahi, bụ nwa Abudiyẹlu bya abụru nwanwa Guni bẹ shi bụru ishi l'ẹnya-uwhu ibe nna iya.

¹⁶ Whẹ bu l'alị Giledu mẹe l'alị Báshanu mẹe lẹ mkpụkpu, dụkota iya nụ, bya enwekotaru alị ẹka élwù whẹ l'atajẹ nri l'alị Sharọnu je akpaa l'ẹka o jeberu.

¹⁷ Ndu ono gẹ whẹ ha b'e dekotaru ẹwha whẹ l'ẹkwo e deshiru lẹ g'e shi nwụa whẹ. Nteke e deru iya bụ nteke Jótamu shi bụru eze ndu Juda, bụkwawho nteke Jerobowamu shi bụru eze ndu Ízurẹlu.

¹⁸ Ndu ikfu Rúbẹnu mẹe ndu ikfu Gadu mẹe nkerẹbo ikfu Manáse bẹ nweru ndu mkparawa ojọgu, mbụ ndu l'apajẹ iwhe l'eegudeje egbobuta onwonye mẹe ogu-ịgba; bya abụru ndu l'agba akfụ. Whẹ bụ ndu ọgu doru ẹnya ree. Iwhe whẹ dụ bụ ụkporo ụnu ndu ojọgu ugbo ise l'ụnu iri lẹ nnanụ l'ụkporo ugbo iri l'ẹsato; gẹ whẹ ha bụkota ndu ẹka l'atsụ nkọ l'ọgu.

¹⁹ Whẹ lwụshiru ndu Hega mẹe ndu Jeturu mẹe ndu Nafishi mẹe ndu Nodabu ọgu.

²⁰ Chileke bya eyetaru whẹ ẹka mee tẹ ndu Hega mẹe ndu whẹ lẹ ndu Hega tụgbaru lwa whẹ l'ẹka, nkele whẹ ryakuru Chileke l'ọgu ono, bya akpọru obu yeru iya, o meeru whẹ iwhe whẹ sụru t'o meeru whẹ.

²¹ Whẹ rwukoo élwù ndu Hega. Ịnya-kamẹlu, whẹ kpụtaru bẹ dụ ụkporo ụnu ugbo ishii l'ụnu ugbo ise. Atụru, whẹ kpụkoru dụ ụkporo ụnu ugbo ụkporo l'iri lẹ nnanụ l'ụnu ise. Nkakfụ-ịgara, whẹ kpụkoru dụ ụnu ise. Madzụ, whẹ kpụru lẹ ndzụ dụ ụkporo ụnu ugbo iri l'ẹbo l'ụnu iri.

²² Ikpoto b'e gburu egbu nkele ọgu ono bẹ shi l'ẹka Chileke. Ndu Rúbẹnu buchia ẹka ono jeye nteke a kpụru whẹ lwaa alị ọdo.

Nkerẹbo ikfu Manáse

²³ Nkerẹbo ikfu Manáse bụ ikpoto; tẹmenu ọ bụru whẹ bu l'alị ono. Whẹ shi l'alị Báshanu bua jeye lẹ mkpụkpu Bálu-hamọnu mẹe l'ugvu Seniru, mbụ ugvu Hemọnu.

²⁴ Ọ waa bụ ndu bụ ishi l'ibe nna whẹ ndọwa: Ifaru, Íishi, Eliyẹlu, Azuriyẹlu, Jeremáya, Hodavaya ọwaa Jahudiyẹlu. Ndu ono bụ ndu ojọgu, ọkpehu dụ, bụru ndu a ma ama, bya abụru ishi l'ibe nna whẹ.

²⁵ Ọle whẹ te egoshidu l'ọ gbarụ tẹ Chileke nke nna whẹ gude ire whẹ ẹka, whẹ balahaaru agwa ndu alị ọdo ẹja, ọ bụru whẹ ori ogori, mbụ ndu alị ono, Chileke mebyishiru l'atatiwhu whẹ.

²⁶ Tọ dụ iya bụ, Chileke nke Ízurẹlu bya akpalia obu Pulu, bụ eze ndu Asiriya bụ iya bụ Tigulatu-pyilesa, bụ eze ndu Asiriya, ọ bya akpụa ikfu Rúbẹnu, mẹe ikfu Gadu, mẹe nkerẹbo ikfu Manáse lẹ ndzụ, kpụru lashia mkpụkpu Hala mẹe Habọ mẹe Hara mẹe ẹnyimu mkpụkpu Gozanu. Whẹ nọ l'ẹka ono jeye oge, dụ g'ọo ntanụ.