1 Iwhe e meru l'oge ndu eze 4 - BAYỊBURU Ẹzaa

Ẹpa Juda

¹ Ụnwu Juda bụ: Pẹ́rezu, Hẹzuronu, Kami, Họru ọwaa Shobalu.

² Shobalu bụ nna Reyaya. Reyaya bụru nna Jahatu. Jahatu bụru nna Ahumayi mẹe Lahadu. Ndu ono bụ ẹnya-uwhu, whẹ buru lẹ mkpụkpu Zora.

³ Ọ waa bụ ndu metaru ndu mkpụkpu Étamu: Jezerẹlu mẹe Ishima mẹe Idubashi. Ẹwha nwune whẹ nke nwanyị bụ Hazeleluponi.

⁴ Penuwẹlu bụ nna mkpụkpu Gedọ. Ẹ́za bụru nna mkpụkpu Husha. Ọ waa bụ ụnwu Họru ndọwa. Họru l'onwiya bụ ọkpara nwanyị ono, l'aza Ifurata, bya abụru nna mkpụkpu Bẹ́tulehemu.

⁵ Ashuru, bụ nna mkpụkpu Tekowa. Ọ lụru ụnwanyi labọ; ẹwha whẹ bụ Hela mẹe Naara.

⁶ Naara bẹ nwụtaru iya Ahụzamu, Hefa, Temeni mẹe Haahashutari. Ndu ono bụ ụnwu Naara.

⁷ Ụnwu nke Hela bụ Zeretu, Zoha mẹe Etinanu.

⁸ Kozu bụ nna Anubu mẹe Zobyiba, bya abụkwaruwho nnajị ndu ẹnya-uwhu Ahahẹlu, bụ nwa Harumu.

⁹ Jabẹzu b'a ka ọkwabe ugvu karụ unwune iya nke nwoke ọdo. Ne iya bẹ gụru iya Jabẹzu sụ: “Mu jeru iwhe-ọtsulanu tẹmenu mu nwụa.”

¹⁰ Jabẹzu bya akpoku Chileke nke Ízurẹlu sụ iya: “Byiko, gọnuru ọnu-ọma nụ mu, gụ emenu-a t'alị mu saa ọsa. Tẹ gụbe Chileke gude ẹka ghu hee mu, gụ ewofuru mu ejo-iwhe, nke ọwhu l'ooto merwu mu ẹhu.” Ọo ya bụ, Chileke meeru iya iwhe ọ sụru t'o meeru iya.

¹¹ Kelubu, bụ nwune Shuha bẹ bụ nna Mehiru. Mehiru bya abụru nna Eshutonu.

¹² Eshutonu bụru nna Betu-rafa, mẹe Paseya, mẹe Tehina onye bụ nna mkpụkpu Ịru-nahashi. Ndu ono bụ whẹ bụ unwoke mkpụkpu Rika.

¹³ Ụnwu Kenazu bụ Ọtuniyelu mẹe Seraya. Ụnwu nke Ọtuniyelu bụru Hatatu mẹe Meyonotayi.

¹⁴ Meyonotayi ono bụru nna Ọfura. Seraya bụ nna Jowabu, onye bụ nna ndu mkpụkpu Ge-harashimu. Mkpụkpu ono l'aza Ge-harashimu nkele ndu bu iya nụ bụ ndu l'eme nka.

¹⁵ Ụnwu Kálẹbu, bụ nwa Jefune bụ Iru mẹe Ela mẹe Naamu. Nwa nke Ela bụ Kenazu.

¹⁶ Ụnwu Jehalelelu bụ: Zifu, Zifa, Tiriya ọwaa Asarẹlu.

¹⁷ Ụnwu Ẹzura bụ Jeta, Meredu, Ifaru ọwaa Jalọnu. Nyee Meredu bẹ nwụru Miriyamu mẹe Shamayi mẹe Ishuba, bụ nna mkpụkpu Eshitemowa.

¹⁸ Nwanyị ọdo, Meredu lụru l'ikfu Juda bẹ nwụtaru iya Jeredi, bụ nna mkpụkpu Gedọ. Bya anwụta Heba, bụ nna mkpụkpu Soko, tẹmenu ọ nwụtakwawho Jekutiyẹlu, bụ nna mkpụkpu Zanowa. Ndu ono bụkota ụnwu Byitiya, bụ nwada Fero, ọ lụru mbụ onye Meredu.

¹⁹ Ụnwu nyee Hodiya, bụ nwune Nahamu nke nwanyị bẹ bụ whẹ bụ nna Keyila onye Gami mẹe nna Eshitemowa onye Maaka.

²⁰ Ụnwu Shimọnu bụ: Amụnonu, Rina, Benu-hananu ọwaa Tilọnu. Ụnwu Íishi bụ: Zohetu mẹe Benu-zohetu.

²¹ Ndu ọwaa bụ ụnwu Shela, bụ nwa Juda: Ẹru onye bụ nna ndu mkpụkpu Lika, mẹe Laada onye bụ nna ndu mkpụkpu Maresha, bya abụkwaru iya whọ metaru ndu ẹnya-uwhu ndu ono, l'anọje akpa ẹkwa-ọcha lẹ mkpụkpu Betu-ashubayi,

²² mẹe Jokimu, mẹe unwoke Koziba, mẹe Jowashi, mẹe Sarafu onye ono shi achị l'alị Moabu, mbụ onye ono, megeeru lwa mkpụkpu Jashubu-lehemu. Iwhe ono bụ oshi lẹ ndụ-ichee.

²³ Ọo whẹ bụ ndu l'akpụ ite, bu lẹ mkpụkpu Netayimu mẹe lẹ mkpụkpu Gedera. Whẹ bu l'ẹka ono arwụru eze whẹ ọrwu.

Ẹpa Símiyọnu

²⁴ Ụnwu Símiyọnu bụ: Nemuwẹlu, Jaminu, Jaribu, Zera ọwaa Shawulu.

²⁵ Shalumu bụ nwa Shawulu; Mibusamu bụru nwa Shalumu, Mishuma bụru nwa Mibusamu.

²⁶ Nwa nke Mishuma bụ Hamuwẹlu, Zakuru bụru nwa Hamuwẹlu, Shimeyi bụru nwa Zakuru.

²⁷ Shimeyi nwụtaru unwoke iri l'ishii, nwụta ụnwanyi ishii. Ọle unwune iya nwoke ta anwụshidu ụnwu l'igwe. Ndu ẹnya-uwhu whẹ ta akwata saa ọsa ẹgube ndu Juda sarụ.

²⁸ Ẹka whẹ bugbabe bụ lẹ mkpụkpu Byiyesheba mẹe lẹ mkpụkpu Molada, mẹe lẹ mkpụkpu Hazaru-shuwalu,

²⁹ mẹe lẹ mkpụkpu Byiliha, mẹe lẹ mkpụkpu Ezẹmu, mẹe lẹ mkpụkpu Toladu,

³⁰ mẹe lẹ mkpụkpu Betuwẹlu, mẹe lẹ mkpụkpu Họruma, mẹe lẹ mkpụkpu Zikulagu,

³¹ mẹe lẹ mkpụkpu Betu-makabọtu, mẹe lẹ Hazarụ-susimu, mẹe lẹ Betu-byiri, mẹe lẹ mkpụkpu Shaarayimu. Ọo lẹ mkpụkpu ono g'ọ ha bẹ whẹ shi bukotaru jeye nteke Dévidi bụ eze.

³² Ụnwu mkpụkpu mkpụkpu whẹ bụ: Étamu, Ayinu, Rimọnu, Tokenu mẹe Ashanu. Mkpụkpu ise bẹ whẹ dụkota

³³ yeru iya ụnwu mkpụkpu mkpụkpu, dụ-wheru mkpụkpu ono mgburumgburu je akpaa lẹ mkpụkpu Bálu. O noo bụ ẹka whẹ bugbabe ndono. Whẹ nwekwaruwho ẹkwo, l'akọ g'e shi nwụshia whẹ.

³⁴ Meshobabu, Jamuleku, Josha nwa Amazíya,

³⁵ Jowelu, Jehu nwa Joshibyiya. Joshibyiya nwa Seraya, Seraya nwa Asiyẹlu.

³⁶ Eliyowenayi, Jaakoba, Jeshohaya, Ayizáya, Ádiyelu, Jesimẹlu, Benaya,

³⁷ Ziza nwa Shifi, Shifi nwa Alọnu, Alọnu nwa Jedaya, Jedaya nwa Shimiri, Shimiri bụru nwa Shemaya.

³⁸ Ndu ono, a gụshiru ẹwha whẹ bụ ndu ishi l'ẹnya-uwhu whẹ. Ọzo-ụlo nna whẹ bẹ furu efu mịa ọkpobe amịmi.

³⁹ Whẹ bu je akpaa l'ọnu ẹka l'eeshije abahụ lẹ mkpụkpu Gedọ; bua jeye l'ụzo ẹnyanwu-awata nsụda ono l'ẹka whẹ l'achọ nri, élwù whẹ l'a-nọ eri.

⁴⁰ Ọ bụru ẹka ono bẹ whẹ chọ-vuru ọkpobe nri mẹe nri, dụ ree, élwù whẹ l'a-nọ eri. Alị ọbu bụ alị sarụ ọsa shii, bya ejia oyi, nchị dụ ndoo l'ẹka ono. Ndu shi buru l'ẹka ono bụ ndu shi l'eri Hamu.

⁴¹ Ndu-a, e deshiru ẹwha whẹ bẹ byarụ mkpụkpu Gedọ nteke Hezekáya shi bụru eze ndu Juda bakfu o-shi-l'eri Hamu ono gbugbushia, gbugbushikwaawho ọgbo Meyunimu, whẹ whụru l'ẹka ono. Whẹ gbugbushikotaru whẹ kpamụ kpamụ shi nno woru whẹ nụ Chileke jeye oge dụ g'ọo ntanụ, bya ebuchia l'ọnodu whẹ nkele nri dụru élwù whẹ l'ẹka ono.

⁴² Ụwhodu l'ime whẹ bụ iya bụ ẹpa Símiyọnu tụgburu jeshia l'ugvu Siye. Iwhe whẹ dụ bụ ụnu unwoke l'ụkporo ise. Ndu bụ ishi whẹ bụ: Pelatiya, Neyariya, Refaya ọwaa Úziyẹlu. Whẹ bụ ụnwu Íishi.

⁴³ Whẹ gbushia ndu whọduru nụ lẹ ndu Amalẹ́ku ono, gbarụ ọso buru l'ẹka ono jeye oge dụ g'ọo ntanụ.