1 Iwhe e meru l'oge ndu eze 3 - BAYỊBURU Ẹzaa

Ẹpa Dévidi

¹ Ọ waa bụ ụnwu Dévidi, mbụ ndu a nwụshiru iya lẹ mkpụkpu Hiburọnu: Ọkpara iya bụ Amụnonu. Onye o shi l'ẹka iya nwụta iya bụ Ahinowamu, nwanyị Jezerẹlu. Nwa iya nke ẹbo bụ Daníyelu. Onye o shi l'ẹka iya nwụta iya bụ Abyigelu, nwanyị Kamẹlu.

² Nwa iya nke ẹto bụ Abụsalomu. Onye o shi l'ẹka iya nwụta iya bụ Maaka, nwa nwanyị Talumayi, bụ eze ndu Geshuru. Nwa iya nke ẹno bụ Ádonayija. Onye o shi l'ẹka iya nwụta iya bụ Hagitu.

³ Nwa iya nke ise bụ Shefataya. Onye o shi l'ẹka iya nwụta iya bụ Abyitalu. Nwa iya nke ishii bụ Ituremu. Onye o shi l'ẹka iya nwụta iya bụ nyee ya ọwhu l'eeku Egula.

⁴ Ụmadzu ishii b'a nwụtaru Dévidi lẹ mkpụkpu Hiburọnu, bụ ẹka ọ nọdu chịa awha ẹsaa l'ọnwa ishii. Ọ chịkwaawho ụkporo awha l'awha iri l'ẹto lẹ Jerúsalẹmu.

⁵ Ọ waa bụ ndu a nọ lẹ Jerúsalẹmu nwụshiru iya: Shimeya, Shobabu, Nétanu ọwaa Sólomọnu. Onye o shi l'ẹka iya nwụta ụmadzu ẹno ono bụ Betu-sheba, nwada Amiyẹlu.

⁶ Ụnwu iya ọdo bụ Ibuha, Elishama, Elifẹletu,

⁷ Noga, Nefegu, Jafiya,

⁸ Elishama, Ẹliyada ọwaa Elifẹletu; ụmadzu tete ono.

⁹ Ndu lile ono bụkota ụnwu Dévidi nke nwoke, t'a gụfukwa unwoke, o shi l'ẹka ụnwanyi, l'ọoto ọlua l'ọkpoku nwanyị nwụshia. Tama bụ nwune whẹ nke nwanyị.

Ẹpa Sólomọnu

¹⁰ Nwa Sólomọnu bụ Rehobówamu, Abáyija bụru nwa Rehobówamu, Asa bụru nwa Abáyija, Jehóshafatu bụru nwa Asa.

¹¹ Jóramu bụru nwa Jehóshafatu, Ahazaya bụru nwa Jóramu, Jowashi bụru nwa Ahazaya,

¹² Amazíya bụru nwa Jowashi, Azaríya bụru nwa Amazíya, Jótamu bụru nwa Azaríya,

¹³ Éhazu bụru nwa Jótamu, Hezekáya bụru nwa Éhazu, Manáse bụru nwa Hezekáya,

¹⁴ Amọnu bụru nwa Manáse, Josáya bụru nwa Amọnu.

¹⁵ Ọ waa ụnwu Josáya ndọwa: Johananu bụ ọkpara iya, Jehoyakimu bụru otsota, Zedekaya bụru onye nke ẹto, Shalumu bụru onye nke ẹno.

¹⁶ Ẹpa Jehoyakimu ndọwa: Jekoniya bụ nwa Jehoyakimu, Zedekaya bụru nwa Jekoniya.

Ẹpa Jekoniya

¹⁷ Ọ waa bụ ụnwu Jekoniya, mbụ nwoke ono, a kpụru lẹ ndzụ: Sheyalutiyẹlu,

¹⁸ Malukiramu, Pedaya, Shenaza, Jekamiya, Hoshama ọwaa Nedabaya.

¹⁹ Ụnwu Pedaya bụ Zerúbabelu mẹe Shimeyi. Ụnwu Zerúbabelu bụru Meshulamu mẹe Hananiya. Shelomiti bụ nwune whẹ nke nwanyị.

²⁰ Ọ nwụtakwaruwho ụmadzu ise ọdo, ẹwha whẹ bụ Hashuba mẹe Ohẹlu mẹe Berekaya mẹe Hasadiya mẹe Jushabu-hesedu.

²¹ Ọ waa bụ ẹpa Hananiya: Pelatiya, mẹe Jeshaya, mẹe ụnwu Refaya, mẹe ụnwu Ananu, mẹe ụnwu Obedaya, mẹe ụnwu Shekanaya.

²² Ọ waa bụ ẹpa Shekanaya: Shemaya mẹe ụnwu iya, bụ Hatushi mẹe Igalu mẹe Bariya mẹe Neyariya mẹe Shafatu. Whẹ tụko dụ ishii.

²³ Ụnwu Neyariya bụ Eliyowenayi mẹe Hezekáya mẹe Azurikamu. Whẹ tụko dụ ẹto.

²⁴ Ụnwu Eliyowenayi bụ: Hodavaya, Ẹliyashibu, Pelaya, Akubu, Johananu, Delaya ọwaa Anani. Whẹ tụko dụ ẹsaa.