1 Iwhe e meru l'oge ndu eze 29 - BAYỊBURU Ẹzaa

Iwhe a nụru t'e gude tụa eze-ụlo Chileke

¹ Dévidi bya ekfuru yeru ndzuko ono l'owhu sụ: “Sólomọnu, bụ nwa mu, onye ono bụ iya bẹ Chileke họtaru kpụ bụ nwata uke, l'adụa iwhe ọ marụ. Ozhi ono bụru ozhi, parụ ẹka nkele eze-ụlo-ọ, l'eekfu okfu iya ta abụdu madzụ mmaanụ bẹ l'aatụru iya; onye l'aatụru iya bụ Onye-Nwe-Ọha, bụ Chileke.

² Mu dobewaru iwhe l'ee-gude mee ụlo Chileke ono g'ike beru mu. Mu dobewaru mkpọla-ododo, l'ee-gude mee iwhe l'eeme lẹ mkpọla-ododo, dobewaa mkpọla-ọcha, l'ee-gude mee iwhe l'eeme lẹ mkpọla-ọcha, dobewaa ope, l'ee-gude mee iwhe l'eeme l'ope, dobewaa mkpụrumkpu-igwe, l'ee-gude mee iwhe l'eeme lẹ mkpụrumkpu-igwe, dobewaa oshi, l'ee-gude mee iwhe l'eeme l'oshi. O nokwawho gẹ mu kụberu ikpoto ẹwhuru onikusu, mẹe ẹwhuru, l'aa-swọbe l'iwhe, mẹe ẹwhuru, l'egbukaa ngerengere, mẹwaro ẹwhuru, dụ l'iche l'iche, vukota ọnu aswa, mẹe ẹwhuru-egbe mabụlu.

³ Ọdo bụ lẹ mu l'anụ mkpọla-ododo mẹe mkpọla-ọcha ẹka mu gẹdegede t'e yekobe l'ono gude mee nke ụlo nsọ ono, o noo nkele okfu ụlo Chileke mu ono bẹ l'awhọshi mu ike l'obu.

⁴ Mu l'anụ mkpọla-ododo, ẹrwa iya dụ ụnu talẹntu ugbo ẹsaa l'ụkporo iri l'ime mkpọla-ododo, shi alị Ofi; mu anụ mkpọla-ọcha, ẹrwa iya dụ ụnu talẹntu ugbo iri l'ẹsaa l'ụkporo iri, bụ ọwhu a nụcharu anụcha, l'aa-wụkota lẹ mgbodo ụlo ono.

⁵ Mkpọla-ododo ono bẹ l'ee-gude mee iwhe l'eeme lẹ mkpọla-ododo, gude mkpọla-ọcha mee iwhe l'eeme lẹ mkpọla-ọcha mẹe iwhe lile, ndu l'eme nka l'eme. Mu nọdu l'eli iya ajị sụ: Oo onye bẹ l'oowhe uwhere t'o woru onwiya ye l'ozhi Onye-Nwe-Ọha ntanụ?”

⁶ O noo ya, ndu ishi l'ẹnya-uwhu nọnu bya anụ iwhe g'ọ zụru whẹ nkwe l'obu. O nokwawhọ gẹ ndu bụ ishi l'ikfu, mẹe ndu ishi ụnu ndu ojọgu ugbo labọ l'ụkporo iri, mẹe ndu ishi ndu ojọgu ụkporo ugbo ise, mẹe ndu ishi ozhi eze nụru iwhe zụru whẹ nkwe l'obu.

⁷ Iwhe whẹ nụru t'e gude mee nke ụlo Chileke ono bụ: mkpọla-ododo, ẹrwa iya dụ ụnu talẹntu iri l'ẹbo l'ụkporo iri, mẹe ụkporo ụnu dariku l'ụnu ise, mẹe mkpọla-ọcha, ẹrwa iya dụ ụkporo ụnu talẹntu l'ụnu ise, mẹe ope, ẹrwa iya dụ ụkporo ụnu talẹntu ugbo labọ l'ụnu ise, mẹe mkpụrumkpu-igwe, ẹrwa iya dụ ụkporo ụnu talẹntu ugbo iri l'ẹbo l'ụnu iri.

⁸ Iwhe bụ onye nweru ẹwhuru, vu ọnu aswa bẹ nụru iya t'e dobe l'ụlo ẹku eze-ụlo Onye-Nwe-Ọha ono. Onye ọ dụ l'ẹka bụru Jehiyẹlu o-shi-l'eri Gẹshonu.

⁹ Ọo ya bụ, ndu Ízurẹlu tekota ẹswa, nkele ndu ono gude obu whẹ g'ọ ha bya anụ Onye-Nwe-Ọha iwhe g'ọ zụru whẹ nkwe l'obu. Eze, bụ Dévidi tekwaawho ẹswa shii.

Dévidi l'ekfu anụ Chileke

¹⁰ Tọ dụ iya bụ, Dévidi wata ọja Onye-Nwe-Ọha l'iwhu edzudzu-ọha ono asụje: “T'ajaja bụru nkeghu, gụbe Onye-Nwe-Ọha, bụ Chileke nke nna anyi, bụ Ízurẹlu, shi lẹ gbururu jeye lẹ gbururu.

¹¹ Gụbe Onye-Nwe-Ọha bẹ parụ ẹka apaa, ike, mẹe ugvu, mẹe ọdu-biribiri bụkota nkeghu. Iwhe lile, dụ l'igwe mẹe ọwhu dụ l'ụwa bẹ bụru nkeghu. Ọo ghu bụ eze gụbe Onye-Nwe-Ọha, ọ bụru ghu bụ ishi iwhe lile.

¹² Ẹku yẹle ọkwabe ugvu bụ l'ẹka ghu b'o shikota. Ọ bụru ghu bụ onye ishi, l'achị iwhe lile. Ọo ghu bẹ ike yẹle ọkpehu kwarụ l'ẹka. Ọ bụru ghu b'ọ dụ l'ẹka ome madzụ t'ọ bụru oke amadụ, bụru ghu l'agbẹ madzụ l'owhu ọkpu-ike.

¹³ Ntaa bẹ anyi l'ekele ghu ekele, gụbe Chileke anyi, anyi l'aja ẹwha ghu ono, dụ ugvu ajaja.

¹⁴ “Ọle ọbu, ?oo onye bẹ mu bụ, tọo gụnu bẹ ndibe mu bụ? nke t'anyi dụ ike nụ iwhe zụru anyi nkwe l'obu ẹgube-ẹ. Iwhe lile bẹ shikota ghu l'ẹka, ọ bụru iwhe shi ghu l'ẹka bẹ anyi wotaru bya anụ ghu.

¹⁵ L'atatiwhu ghu bẹ anyi bụ ndu mbyambya, bụru ndu byarụ ije ẹgube ono, nna anyi whẹ shi bụru. Ndzụ anyi nọ l'eliwhe bẹ dụa g'ọo inyonyo nkele ọ tọo dụgbuduru.

¹⁶ Gụbe Onye-Nwe-Ọha, bụ Chileke anyi, ikpoto iwhe ọwa, anyi wofutaru t'e gude tụaru ghu ụlo, bụ ẹka ẹwha nsọ ghu l'a-nọ eme ire bẹ kwa l'ẹka ghu b'o shi bya, ọ bụkwaru ghu whọ bẹ nwe iya g'ọ ha.

¹⁷ Chileke mu, mu marụ l'ịida-leje obu, mu marụ l'obu, gụru iwhoro dụ ghu ree. Ọo obu gụru iwhoro bẹ mu gude nụkota ghu iwhe-e g'ọ ha g'ọ zụru mu nkwe l'obu. Ntaa bẹ mu whụwaru lẹ gẹ ndu nkemu, bụ ndu ọwhu nọ l'ẹka-a nụru ghu iwhe zụru whẹ nkwe l'obu l'ẹhu-ụtso.

¹⁸ Byiko Onye-Nwe-Ọha, bụ Chileke nke nna anyi whẹ, bụ Ébirihamu mẹe Áyiziku mẹe Ízurẹlu, mekwaa tẹ ndibe ghu dobegburu ụdu obu ono mẹe ụdu ọriri ono jeye lẹ gbururu, gụ edozhia obu whẹ t'ọ ghaa l'ụzo ẹka ị nọ.

¹⁹ Mee tẹ nwa mu Sólomọnu gude obu iya g'ọ ha dobe iwu ghu mẹe iwhe ị sụru t'e mee mẹe iwhe ị tọru ọkpa iya t'e meje. T'o mekotaje iwhe lile ono g'ọ ha, ya atụa eze-ụlo ono, mu doberu iya iwhe l'oo-gude tụa ya ono.”

²⁰ O noo ya, Dévidi bya asụ edzudzu-ọha ono: “Unu jaa Onye-Nwe-Ọha, bụ Chileke unu ajaja.” Edzudzu-ọha ono tụko jaa Onye-Nwe-Ọha, bụ Chileke nke nna whẹ ajaja. Whẹ whuzeta ishi baarụ Onye-Nwe-Ọha ẹja, bya ewhuzetaru eze ishi l'alị.

Eeme Sólomọnu eze

²¹ O be echile iya; whẹ gbaarụ Onye-Nwe-Ọha ngwo-ẹja, bya agbakwaaru iya whọ ẹja ọkpokota-iwhe-ọku. Whẹ gburu oke-eswi dụ ụnu ugbo labọ l'ụkporo iri, gbua ebyila, dụ ụnu ugbo labọ l'ụkporo iri mẹe ụnwu atụru, dụ ụnu ugbo labọ l'ụkporo iri yẹle ngwo-ẹja mmẹe, l'etsoje iya nụ. Whẹ gbaa ikpoto ngwo-ẹja l'ẹwha ndu Ízurẹlu.

²² Whẹ gude ẹhu-ụtso ria ngụa l'iwhu Onye-Nwe-Ọha mbọku ono. Whẹ bya emee Sólomọnu nwa Dévidi eze nke ugbo labọ. Whẹ wụa ya mmanụ l'atatiwhu Onye-Nwe-Ọha t'ọ bụru onye ishi; Zédọku bụru onye l'agbajẹ ẹja nụ Chileke.

²³ Ọo ya bụ, Sólomọnu nọdu l'oshi-eze Onye-Nwe-Ọha l'ọzori nna iya, bụ Dévidi. Iwhe kweru iya, ndu Ízurẹlu l'owhu l'emeje iwhe ọ sụru tẹ whẹ mee.

²⁴ Iwhe bụ ndu ishi mẹe ndu ojọgu, ụnwu Dévidi gẹ whẹ ha tụru ike yeru eze Sólomọnu.

²⁵ Onye-Nwe-Ọha mee tẹ Sólomọnu bụru oke amadụ l'ẹnya ndu Ízurẹlu l'owhu, bya eworu ọdu-biribiri onye eze ye iya l'ẹhu, mbụ ụdu iya ọwhu l'adụa onye eze, vu iya ụzo nwejeru iya nụ.

Anwụhu Dévidi

²⁶ O noo gẹ Dévidi nwa Jesi shi bụru eze ndu Ízurẹlu.

²⁷ Ọ bụ eze ndu Ízurẹlu ụkporo awha ugbo labọ. Ọ chịru awha ẹsaa lẹ Hiburọnu, chịa ụkporo awha l'awha iri l'ẹto lẹ Jerúsalẹmu.

²⁸ Ọ nwụhuru nteke ọ kahụru ọkpobe akahụ. Ọ nọru igweligwe awha bụru onye nweru ẹku mẹe ugvu. Nwa iya, bụ Sólomọnu bya abụru eze nọ-chia ẹnya iya.

²⁹ Iwhe lile, eze Dévidi megbaberu, watazhiawho l'ishi rwua lẹ ngvụcha b'e dekotaru l'ẹkwo, whẹ deshiru iwhe meru nụ. Ndu deru iya nụ bụ Sámuwẹlu onye l'awhụ awhụ, mẹe Nétanu onye nkfuchiru Chileke, mẹe Gadu onye l'awhụ awhụ.

³⁰ E dekotaru lẹ g'o shi chịa ọchichi, mẹe lẹ g'o shi kpaa ike, mẹe iwhe dakfutaru iya nụ, mẹe ọwhu dakfutaru ndu Ízurẹlu, mẹe iwhe dakfutaru alị-eze ono l'owhu.