1 Iwhe e meru l'oge ndu eze 28 - BAYỊBURU Ẹzaa

Ọkwa, Dévidi nmarụ l'okfu ọtu ụlo Onye-Nwe-Ọha

¹ Dévidi bya ekua ndu ishi ndu Ízurẹlu ndzuko lẹ Jerúsalẹmu. O kuru ndu bụ ishi l'ikfu, kua ndu bụ ishi ojọgu, a gbarụ agbagba, l'ejeru eze ozhi, mẹe ndu ishi ụnu ndu ojọgu ugbo labọ l'ụkporo iri, mẹe ndu ishi ndu ojọgu ụkporo ugbo ise, bya ekua ndu e yeru tẹ whẹ leta iwhe eze yẹle nke ụnwegirima iya ẹnya, mẹe ndu ishi, l'eleta élwù eze mẹe nke ụnwegirima iya ẹnya, mẹkwawho ndu bụ ishi l'ibe eze, mẹe ndu ojọgu, mẹe ndu marụ ẹnya ọgu.

² Eze Dévidi gbalihu kfụru l'ọkpa iya labọ sụ whẹ: “Unu ngabẹru mu nchị, unubẹ ụnwunna mu mẹe ndu nkemu. O shi dụ mu l'obu tẹ mu tụa ụlo ẹka igbe-ọgbandzu Onye-Nwe-Ọha l'a-dụ, mbụ ẹka Chileke l'a-chịjeru ọkpa wukobe. Mu kwakọbewaa iwhe mu g'egude tụa ụlo ono.

³ Ọle Chileke bẹ sụru mu l'ọ tọ bụdu mbẹdua l'a-tụru iya ụlo ono, nkele mu bụ ojọgu, tẹhenu mu gbuwaa ọchi.

⁴ Ọle Onye-Nwe-Ọha, bụ Chileke nke Ízurẹlu bẹ họtaru mu l'ọzo-ụlo nna mu l'owhu tẹ mu bụru eze ndu Ízurẹlu jeye lẹ gbururu. Onye-Nwe-Ọha bẹ họtaru ikfu Juda tẹ whẹ bụru ndu ishi. Ọ bya eshi l'ụlo Juda họta ọzo-ụlo nke nna mu. A bya l'ụnwunna mu, ọ bụru mbẹdua bẹ dụ iya ree tẹ ya mee mu eze ndu Ízurẹlu gẹ whẹ ha.

⁵ Ọ nụru mu ụnwegirima l'igweligwe. A bya l'ụnwu mu ono, ọ bụru nwa mu Sólomọnu b'ọ họtaru t'ọ nọdu l'oshi-eze alị-eze ndibe Onye-Nwe-Ọha ono, bụ ndu Ízurẹlu.

⁶ “Ọ sụru mu agha: ‘Ọo nwa ghu Sólomọnu l'a-tụru mu ụlo mẹe ogboduwhu, nkele mu họtawaru iya t'ọ bụru nwa mu, mbẹdua abụru nna iya.

⁷ Mu l'e-me t'eze ono, ọ bụ keru jịngu jịngu jeye lẹ gbururu m' ọ -bụru-a l'o dobegburu iwhe mu tụru l'iwu mẹe nsọ mu, ẹgube ono, l'oome iya ntaa.’

⁸ “Iwhe mu l'eme tẹ mu kfuru unu l'atatiwhu ndu Ízurẹlu l'owhu bụ iya bụ edzudzu-ọha ndu nke Onye-Nwe-Ọha, mbụ l'iwhe mu l'ekfu tẹ Onye-Nwe-Ọha nụa ya bụkwa t'unu doo ẹnya unu ndo meje iwhe Onye-Nwe-Ọha tụru l'iwu, nke ọwhu unu l'e-nweru alị ọma-a; ya eshi unu l'ẹka sweru ụnwegirima unu, bụ ndu ọwhu l'etso unu etsotso, ya abụru oke-iwhe whẹ jeye lẹ tututu-mịmimi.

⁹ “Gụbedua, bụ nwa mu Sólomọnu, hụbekwa Chileke nke nna ghu ama. Gụ egude obu ghu g'ọ ha mẹe uche ghu ejeru iya ozhi. Ọ kwa Onye-Nwe-Ọha l'enyocha obu, iwhe madzụ rịru l'ọriri l'edoketaja iya ẹnya. Ị -chọo ya bẹ l'ịi-whụkwa iya. Ọle ọ -bụru l'ị harụ iya bẹ l'oo-buhakwa ghu jeye lẹ tututu-mịmimi.

¹⁰ T'ẹnya kwatakwa doo ghu ndo, o noo nkele Onye-Nwe-Ọha bẹ họtawaru ghu t'ị tụaru iya ụlo, l'a-bụru ụlo-nsọ. Shihukwa ike jee ozhi ono.”

¹¹ Tọ dụ iya bụ, Dévidi woru ụgbugba nwụlo, l'aa-tụ gbakfube l'ọnu eze-ụlo ono nụ nwa iya Sólomọnu. Ọ nụkwa iya whọ ụgbugba ụlo ono, l'a-dụkota iya mẹe ụgbugba mkpu ẹka l'aa-kwakọbeje iwhe l'ụlo ono, mẹe nke ụlo-eli iya, mẹe nke ụlo ime iya, mẹe nke ẹka l'aa-nọje akfụ ụgwo iwhe-dụ-ẹji, onye meru Chileke.

¹² Ọ bya eworu ụgbugba ogboduwhu ụlo Onye-Nwe-Ọha ono nụ iya, mẹe nke mkpu, l'a-gba iya mgburumgburu, bya anụ iya nke ụlo ẹku ụlo Chileke, mẹe ụlo ẹku, bụ ẹka l'aa-kwakọbeje iwhe e doberu nsọ. Iwhe lile ono b'ọ nụru lẹ g'ọ dụ iya l'uche t'a tụa ya.

¹³ Ọ bya ekfua lẹge l'aa-gba ọgbo ndu l'agbajẹ ẹja nụ Chileke mẹe ọgbo ndu Lívayi, kfua nke ozhi lile, l'eeje l'ụlo Onye-Nwe-Ọha, mẹe nke arya lile, e gude eje ozhi l'ụlo Onye-Nwe-Ọha ono.

¹⁴ Ọ bya atụa ẹka l'ẹrwa mkpọla-ododo, l'e-dzu ome arya, l'eeme lẹ mkpọla-ododo, mẹe ẹrwa mkpọla-ọcha, l'e-dzu ome arya, l'eeme lẹ mkpọla-ọcha, mbụ ọwhu l'ee-gude eje ozhi, dụ l'iche l'iche.

¹⁵ Ọ tụa ẹka l'ẹrwa mkpọla-ododo, l'e-dzu ome iwhe l'aatukobeje oryọku, mẹe nke oryọku l'onwiya; tụa ẹka l'ẹrwa mkpọla-ọcha, l'e-dzu ome iwhe l'aatukobeje oryọku mẹe oryọku l'onwiya.

¹⁶ Ọ tụa ẹka l'ẹrwa mkpọla-ododo, l'e-dzu ome teburu, l'eedobeje buredi, dụ nsọ; tụa ẹka l'ẹrwa mkpọla-ọcha l'e-dzu ome teburu mkpọla-ọcha.

¹⁷ Ọ tụa ẹka l'ẹrwa mkpọla-ododo, guru egugu, l'e-dzu ome oleji, mẹe ọwhu, l'e-dzu ome efere, mẹe omogo, mẹe ọkwa mkpọla-ododo. Ọ tụa ẹka l'ẹrwa mkpọla-ọcha, l'e-dzu ome ọkwa mkpọla-ọcha.

¹⁸ Ọ tụa ẹka l'ẹrwa mkpọla-ododo, a nụcharu anụcha, l'e-dzu ome ẹnya ẹka l'aakpọje isẹnsu ọku. Ọ nokwawho lẹ g'o goshiru ụgbugba ụgbo-ịnya, e meru lẹ mkpọla-ododo, l'ee-me doberu cherubu, akwẹka iya sachiru asachi gude gbobuta igbe-ọgbandzu Onye-Nwe-Ọha.

¹⁹ Iwhe ono g'ọ ha bẹ Dévidi sụru l'ọo Onye-Nwe-Ọha bẹ goshiru iye ya; ya dee ya nno. Mbụ l'ọo ya meru o doo ya ẹnya g'ụgbugba iwhe ono l'a-dụkota.

²⁰ Dévidi bya asụ nwa iya Sólomọnu: “Shihukwa ike, ume eshia ghu ike l'ozhi ono. Ba atsụkwa egvu, tẹ meji ba atọfukwa ghu nkele Onye-Nwe-Ọha, bụ Chileke, mbụ Chileke nke mbẹdua bẹ swiru ghu eswiru. Ọ tọ byadụ l'aghafụ l'ẹka ị nọ, t'ọ bya l'aha ghu jeye nteke ozhi lile, dụ l'ụlo Onye-Nwe-Ọha ono l'a-gvụkota.

²¹ Ọgbo ndu l'agbajẹ ẹja nụ Chileke, mẹe ọgbo ndu Lívayi bẹ nọwa anọno tẹ whẹ jee ozhi lile, l'eje l'ụlo Chileke ono. Ndu gụ lẹ whẹ l'a-gba mgba jee ozhi ono bẹ bụ ndu l'eme nka l'ọrwu, dụ iche iche, bụ ndu uwhere ozhi l'ewhe. O nokwawho gẹ ndu bụ ishi mẹe ndu Ízurẹlu l'owhu l'a-nọ ghu lẹ mgburẹku eme iwhe ị sụru tẹ whẹ mee.”