1 Iwhe e meru l'oge ndu eze 27 - BAYỊBURU Ẹzaa

Ọgbo ndu ojọgu

¹ Ọ waa bụ ẹwha ndu Ízurẹlu, mbụ ndu bụ ishi l'ẹnya-uwhu, mẹe ndu ishi ụnu ndu ojọgu ugbo labọ l'ụkporo iri, mẹe ndu ishi ndu ojọgu ụkporo ugbo ise, mẹe ndu ishi, bụ ndu l'ejeru eze ozhi l'ọgbo l'ọgbo. Ndu l'anọje eje eje ndu alwa alwa l'ọnwa l'ọnwa jeye awha akụgba ishi. Ọgbo nọnu lẹ ndu ojọgu ono bẹ dụ ụkporo ụnu ugbo ẹto.

² Onye nọ l'ishi ọgbo ndu ojọgu ivurụzo, mbụ ndu nke ọnwa mbụ bụ Jashobeyamu nwa Zabudiyẹlu. Ọgbo ndu ojọgu nkiya b'a dụ ụkporo ụnu ugbo ẹto.

³ Jashobeyamu bẹ shi l'eri Pẹ́rezu. Ọ bụru iya bụ onye ishi ọgbo ndu ojọgu ivurụzo, mbụ ndu nke ọnwa mbụ.

⁴ Onye nọ l'ishi ọgbo ndu ojọgu nke ọnwa ẹbo bẹ bụ Dodayi o-shi-l'eri Ahowa. Mikulotu bẹ tsokwawho bụru ishi l'ọgbo ọgu ono. Ọgbo ọgu nkiya b'a dụkota ụkporo ụnu ugbo ẹto.

⁵ Onye ishi ndu ọgbo ndu ojọgu nke ẹto, mbụ ndu nke ọnwa ẹto bẹ bụ Benaya nwa Jehoyada, bụ onye l'agbajẹ ẹja nụ Chileke. Ọgbo ọgu nkiya b'a dụkota ụkporo ụnu ugbo ẹto.

⁶ Ọo yẹbedua bụ Benaya ono, tso lẹ ndu ojọgu ụkporo l'iri whọ, bụru iya bụ onye ishi ndu ojọgu ụkporo l'iri ono. Nwa iya, bụ Amizabadu bẹ tsotaru iya l'ọbu onye ishi ọgbo ndu ojọgu ono.

⁷ Onye ishi ndu ọgbo ndu ojọgu nke ẹno, mbụ ndu nke ọnwa ẹno bẹ bụ Asahẹlu nwune Jowabu. Nwa iya, bụ Zebadaya bẹ megeeru bụru onye ishi ọgbo ndu ojọgu ono l'ọzori iya. Ọgbo ọgu nkiya b'a dụkota ụkporo ụnu ugbo ẹto.

⁸ Onye ishi ọgbo ndu ojọgu nke ise, mbụ ndu nke ọnwa ise bẹ bụ Shamuhutu o-shi-l'eri Yịzura. Ọgbo nkiya b'a dụkota ụkporo ụnu ugbo ẹto.

⁹ Onye ishi ọgbo ndu ojọgu nke ishii, mbụ ndu nke ọnwa ishii bẹ bụ Ira nwa Ikeshi nke eri Tekowa. Ọgbo ọgu nkiya b'a dụkota ụkporo ụnu ugbo ẹto.

¹⁰ Onye ishi ọgbo ndu ojọgu nke ẹsaa, mbụ ndu nke ọnwa ẹsaa bẹ bụ Helezu o-shi-l'eri Pelọnu; onye ikfu Ífuremu. Ọgbo ọgu nkiya b'a dụkota ụkporo ụnu ugbo ẹto.

¹¹ Onye ishi ọgbo ndu ojọgu nke ẹsato, mbụ ndu nke ọnwa ẹsato bẹ bụ Sibekayi nke Husha; bụru onye ẹnya-uwhu ibe Zera. Ọgbo ọgu nkiya b'a dụkota ụkporo ụnu ugbo ẹto.

¹² Onye ishi ọgbo ndu ojọgu nke tete, mbụ ndu nke ọnwa tete bẹ bụ Abyiyeza nke Anatotu; onye ikfu Bénjaminu. Ọgbo ọgu nkiya b'a dụkota ụkporo ụnu ugbo ẹto.

¹³ Onye ishi ọgbo ndu ojọgu nke iri, mbụ ndu nke ọnwa iri bẹ bụ Maharayi nke Netofa; onye ẹnya-uwhu ibe Zera. Ọgbo ọgu nkiya b'a dụkota ụkporo ụnu ugbo ẹto.

¹⁴ Onye ishi ọgbo ndu ojọgu nke iri lẹ nnanụ, mbụ ndu nke ọnwa iri lẹ nnanụ bẹ bụ Benaya nke Pyịratonu; onye ikfu Ífuremu. Ọgbo ọgu nkiya b'a dụkota ụkporo ụnu ugbo ẹto.

¹⁵ Onye ishi ọgbo ndu ojọgu nke iri l'ẹbo, mbụ ndu nke ọnwa iri l'ẹbo bẹ bụ Heludayi nke Netofa; onye ẹnya-uwhu ibe Ọtuniyelu. Ọgbo ọgu nkiya b'a dụkota ụkporo ụnu ugbo ẹto.

Ndu e doberu tẹ whẹ bụru ishi l'ikfu ndu Ízurẹlu

¹⁶ Ọ waa bụ ndu bụ ishi l'ikfu ndu Ízurẹlu: Onye bụ ishi l'ikfu Rúbẹnu bẹ bụ Eliyéza nwa Zikiri. Onye bụ ishi l'ikfu Símiyọnu bụru Shefataya nwa Maaka.

¹⁷ Onye bụ ishi l'ikfu Lívayi bụru Hashabyiya nwa Kemuwẹlu. Onye bụ ishi l'ẹnya-uwhu ibe Érọnu bẹ bụ Zédọku.

¹⁸ Onye bụ ishi l'ikfu Juda bẹ bụ Elihu nwune Dévidi. Onye bụ ishi l'ikfu Ísaka bụru Omiri nwa Máyikelu.

¹⁹ Onye bụ ishi l'ikfu Zébulọnu bụru Ishumaya nwa Obedaya. Onye bụ ishi l'ikfu Náfutali bụru Jeremotu nwa Azuriyẹlu.

²⁰ Onye bụ ishi l'ikfu Ífuremu bụru Hoshiya nwa Azazíya. Onye bụ ishi lẹ nkerẹbo ikfu Manáse bụru Jowelu nwa Pedaya.

²¹ Onye bụ ishi nke nkerẹbo ikfu Manáse ọwhu bu l'alị Giledu bụru Ido nwa Zakaráya. Onye bụ onye ishi l'ikfu Bénjaminu bụru Jasiyẹlu nwa Abụna.

²² Onye bụ ishi l'ikfu Danu bụru Azarẹlu nwa Jerohamu. O noo ndu bụ ishi l'ikfu ndu Ízurẹlu ndono.

²³ Dévidi ta agụdu ndu l'ete erwua ụkporo awha l'ọnogu, nkele Onye-Nwe-Ọha bẹ kweru ụkwa l'iya l'e-me tẹ ndu Ízurẹlu zụ̀a azụ̀zù ha l'igwe g'ọo kpokponde, dụ l'igweli.

²⁴ Jowabu nwa Zeruya bẹ watarụ ọgu ọgu ono, ọle ọ tọ gụfudu iya l'ishi. Onye-Nwe-Ọha tukoshi ndu Ízurẹlu oke ẹhu-eghughu iya l'ọo l'a gụru ọgu ono. Ọgu ono ta abadụ l'ẹkwo e deshiru iwhe e meru l'oge nke Dévidi.

Ndu bụ ishi l'ibe eze

²⁵ Onye ishi ụlo ẹku eze bẹ bụ Azụmavetu nwa Ádiyelu. Onye ishi ụlo, l'aakwakọbeje ẹku obodo bụru Jonatanu nwa Uzáya, mbụ ụlo ẹku, dụ lẹ mkpụkpu lẹ mkpụkpu mẹe l'ọnu-ẹgu l'ọnu-ẹgu mẹe l'ụlo-eli l'ụlo-eli.

²⁶ Onye ishi ndu l'eje ozhi l'ẹgu bẹ bụ Ezuri nwa Kelubu, ọ ya bụ onye ishi ndu l'akọ okfu.

²⁷ Onye ishi mgbabu vayịnu bẹ bụ Shimeyi nke mkpụkpu Rama. Onye ishi, l'eleta ndu l'arwụ ọrwu lẹ mgbabu vayịnu ẹnya, mbụ ndu ono, l'eleta ẹka ono, l'aakwakọbeje mmẹe vayịnu ẹnya bẹ bụ Zabudi nke mkpụkpu Shifamu.

²⁸ Onye ishi, ọ dụ l'ẹka mbụ oshi ólivu mẹe oshi sikamo, dụ l'alị ọkpa-ugvu, dụ l'ụzo ẹnyanwu-arịba bẹ bụ Bálu-hananu nke mkpụkpu Geda. Onye ishi, l'eleta ẹka l'eedobeje mmanụ ẹnya bẹ bụ Jowashi.

²⁹ Onye ishi, l'eleta élwù, l'ata nri lẹ whorokoto alị Sharọnu ẹnya bẹ bụ Shiturayi nke alị Sharọnu. Onye ishi, l'eleta élwù ọwhu l'ata nri lẹ nsụda nsụda ẹnya bẹ bụ Shafatu nwa Adụlayi.

³⁰ Onye ishi, l'eleta ịnya-kamẹlu ẹnya bẹ bụ Obyilu o-shi-l'eri Ishimẹlu. Onye ishi, l'eleta nkakfụ-ịgara ẹnya bẹ bụ Jehideya nke Meronọtu.

³¹ Onye ishi, l'eleta eghu mẹe atụru ẹnya bẹ bụ Jazizu o-shi-l'eri Hega. Ndu ono gẹ whẹ ha bụkota ndu e yeru iwhe Dévidi l'ẹka tẹ whẹ letaje iya ẹnya.

³² Nwune nna Dévidi, bụ Jonatanu bẹ bụ onye mgbazhi. Ọ bụ onye ẹnya ndo, bụru o-de-ẹkwo. Yẹle Jehiyẹlu nwa Hakumoni bụ ndu l'eleta ụnwegirima eze ẹnya.

³³ Ahitofẹlu bụ onye l'agbazhiru eze idzu. Hushayi o-shi-l'eri Akụ bụru ẹguru ọnya eze.

³⁴ Ndu megeeru bụru nọ-chia ẹnya Ahitofẹlu bẹ bụ Jehoyada nwa Benaya mẹe Abyata. Jowabu bụru iya bụ onye ishi ndu ojọgu eze.