1 Iwhe e meru l'oge ndu eze 26 - BAYỊBURU Ẹzaa

Ọgbo nche ọnuzo

¹ A bya l'ọgbo, l'eche ọnuzo, a gbaa whẹ l'ụzo, dụ ẹgube-ẹ: Ndu shi l'eri Kora bẹ bụ Meshelemiya, bụ nwa Kore o-shi-l'ẹpa Asafu.

² Meshelemiya bẹ nwụshiru unwoke: Ọkpara iya bụ Zakaráya, Jediyẹlu bụru otsota, Zebadaya bụru onye nke ẹto, Jatuniyẹlu bụru onye nke ẹno,

³ Ílamu bụru onye nke ise, Jehohananu bụru onye nke ishii, Eliyowenayi bụru onye nke ẹsaa.

⁴ Óbẹdu-edọmu nwụshikwaruwho unwoke: Shemaya bụ ọkpara iya, Jehozabadu bụru otsota, Jowa bụru onye nke ẹto, Saka bụru onye nke ẹno, Netanẹlu bụru onye nke ise,

⁵ Amiyẹlu bụru onye nke ishii, Ísaka bụru onye nke ẹsaa, Peyuletayi bụru onye nke ẹsato, o noo nkele Chileke gọru Óbẹdu-edọmu ọnu-ọma.

⁶ Nwa Óbẹdu-edọmu, bụ Shemaya bya anwụshia unwoke, bụ-gee ndu ishi l'ẹnya-uwhu whẹ, bụru ndu tsụru lẹ nwoke.

⁷ Ụnwu Shemaya bụ: Ọtuni, Refayẹlu, Óbẹdu, ọwaa Ẹluzabadu. Ụnwunna whẹ bụ Elihu mẹe Semakiya, whẹ bụ ndu tsụru lẹ nwoke.

⁸ Ndu ono gẹ whẹ ha bẹ bụkota ẹpa Óbẹdu-edọmu. Whẹ l'ụnwu whẹ bụkota ndu tsụru lẹ nwoke, nweru ike ozhi. Whẹ dụkota ụkporo ẹto l'ụmadzu labọ, mbụ ẹpa Óbẹdu-edọmu ono.

⁹ Meshelemiya bẹ nweru ụnwu, nweru ụnwunna, tsụru lẹ nwoke. Iri l'ẹsato bẹ whẹ dụkota.

¹⁰ Hosa, bụ ẹpa Merari bẹ nwụru ụnwu. Shimiri bụ onye ishi l'ime whẹ. Ọ tọ dụ yẹbedua bụ ọkpara gẹdegede, ọle nna iya wotaru iya mee ọkpara.

¹¹ Hilikaya bụ nwa Hosa nke ẹbo, Tebaliya bụru nke onye ẹto, Zakaráya bụru onye nke ẹno. Ụnwu Hosa gẹ whẹ ha mẹe ụnwunna iya bẹ dụkota iri l'ẹto.

¹² Ndu nche ọnuzo ono b'a gbarụ l'ọgbo l'ọgbo, lẹ gẹ ndu ishi whẹ dụ. Whẹ nwegeeru ozhi, whẹ l'eje l'ụlo Onye-Nwe-Ọha g'ọo ụnwunna whẹ ndu ọdo.

¹³ Whẹ tụa ido l'ẹnya-uwhu l'ẹnya-uwhu gude keshia ọnuzo ono, onye ukfu l'onye nta.

¹⁴ Ido, a tụru ọnuzo, cheru ụzo ẹnyanwu-awata bẹ dabarụ Shelemaya. A bya atụaru nwa iya, bụ Zakaráya ido ọnuzo ọwhu cheru isheli dabarụ iya. Zakaráya bụ onye mgbazhi, nweru uche.

¹⁵ Óbẹdu-edọmu bẹ nkiya dabarụ l'ọnuzo ọwhu cheru ọhuda. Ido ọnuzo ẹka l'aakwakọbeje iwhe dabarụ ụnwu iya.

¹⁶ Shupimu yẹle Hosa bẹ bụ ido nke ọnuzo cheru ụzo ẹnyanwu-arịba bẹ dabarụ whẹ yẹle ọnuzo Shalẹketu, dụ l'agụga oji ụzo imeli. Nche ono b'a gbarụ agbagba.

¹⁷ Ọnuzo ọwhu cheru ụzo ẹnyanwu-awata bẹ eri Lívayi l'adụje ụmadzu ishii eche lẹ mbọku. L'aadụje ẹno eche ọnuzo ọwhu cheru ụzo isheli lẹ mbọku, dụ ẹno eche ọnuzo ọwhu cheru ụzo ọhuda lẹ mbọku, dụ ẹbo-ẹbo eche ọnuzo ẹka l'aakwakọbeje iwhe lẹ mbọku.

¹⁸ A bya l'ogboduwhu eze-ụlo ono ọwhu cheru ụzo ẹnyanwu-arịba, aadụje ẹno eche agụga oji, a dụ ẹbo eche ọma ogboduwhu ono gẹdegede.

¹⁹ O noo bụ ọgbo nche ọnuzo ono bụ iya bụ ẹpa Kora mẹe ẹpa Merari.

Ụlo ẹku dụ l'ụlo Chileke

²⁰ Ọo ndu Lívayi bẹ ụlo ẹku ono, dụ l'ụlo Chileke mẹe ụlo ẹku nke ẹka l'aakwakọbeje iwhe e doberu nsọ dụ l'ẹka. Onye ishi whẹ bụ Ahayija.

²¹ A bya l'eri Ladanu, bụ ụnwu Gẹshonu, mbụ ndu shi l'eri Ladanu, bụ iya bụ ndu ọwhu bụ ishi l'ẹnya-uwhu ndibe Ladanu, bụ nwa Gẹshonu bẹ bụ Jehiyeli.

²² Jehiyeli nwụta Zetamu. Nwune Zetamu bụru Jowelu. Ọo whẹ bẹ ẹku nke ụlo Onye-Nwe-Ọha dụ l'ẹka.

²³ A bya l'eri Amụramu, mẹe eri Izharu, mẹe eri Hiburọnu, mẹe eri Úziyẹlu,

²⁴ onye bụ ishi ẹku ụlo Chileke l'eri ono bụ Shebuwẹlu. Shebuwẹlu bụ ẹpa Gẹshomu, Gẹshomu bụru nwa Mósisu.

²⁵ A bya l'ụnwunna iya, bụ ẹpa Eliyéza: Eliyéza bụ nna Rehabyiya, Rehabyiya bụru nna Jeshaya, Jeshaya bụru nna Jóramu, Jóramu bụru nna Zikiri, Zikiri bụru nna Shelomiti.

²⁶ Ọo Shelomotu yẹle ụnwunna iya b'ọ dụ l'ẹka, mbụ ẹka ono, l'aakwakọbeje iwhe e doberu nsọ. Mbụ iwhe ono, whẹ doberu nsọ mbụ eze bụ Dévidi, mẹe ndu ishi ẹnya-uwhu ibe nna whẹ, mẹe ndu ishi ụnu ndu ojọgu ugbo labọ l'ụkporo iri, mẹe ndu ishi ndu ojọgu ụkporo ugbo ise, mẹe ndu ishi ndu ojọgu mmaka.

²⁷ Whẹ shi l'arya ono, whẹ gwotaru l'ọgu dobe iya nsọ nke t'e gude iya dozhia ụlo Onye-Nwe-Ọha.

²⁸ O nokwawho g'ọ dụ l'iwhe Sámuwẹlu, onye l'awhụ awhụ, mẹe Sọlu nwa Kishu, mẹe Abụna nwa Naa, mẹe Jowabu nwa Zeruya dobekotaru nsọ. Iwhe lile, e doberu nsọ bẹ bụ Shelomiti yẹle ụnwunna iya bẹ l'eleta iya ẹnya.

Ndu e yeru l'ishi

²⁹ E shi l'eri Izharu tụa Kenaniya yẹle ụnwu iya ẹka tẹ whẹ bụru ndu l'a-nọ eje ozhi, l'abụa nke eze-ụlo Chileke. A tụru whẹ ẹka tẹ whẹ bụru ndu ishi ozhi mẹe ndu ọgbo ikpe Ízurẹlu.

³⁰ E shi l'eri Hiburọnu họta Hashabyiya yẹle ụnwunna iya tẹ whẹ bụru ndu l'awhụ mẹka ndu Ízurẹlu l'ụzo ẹnyanwu-arịba nke ẹnyimu Jọ́danu l'ọnodu ọrwu lile, l'aarwụru Onye-Nwe-Ọha mẹe ozhi lile, l'eejeru eze. Iwhe whẹ dụ bụ ụnu unwoke ugbo ẹno l'ụkporo ise, bụkotaru ndu tsụru lẹ nwoke.

³¹ Ọo Jeriya bẹ bụ onye ishi l'eri Hiburọnu, bụ iya bụ g'e deru iya l'ẹkwo e deshiru lẹ g'e shi nwụa whẹ l'ẹnya-uwhu whẹ. L'awha kwee Dévidi ụkporo awha ugbo labọ, ọ watarụ ọbu eze b'e nyocharu ẹkwo bya achọfuta l'o nweru eri ndu ono, bụ ndu tsụru lẹ nwoke, bu lẹ mkpụkpu Jaza l'alị Giledu.

³² Eze Dévidi bya ahọta Jeriya yẹle ụnwunna iya tẹ whẹ bụru ndu l'awhụ mẹka ikfu Rúbẹnu, mẹe ikfu Gadu, mẹe nkerẹbo ikfu Manáse l'ọnodu iwhe l'eeme l'ụzo Chileke, mẹe iwhe l'eeme l'okfu ẹhu eze. Iwhe, whẹ dụkota bụ ụnu unwoke ugbo ishii l'ụkporo iri l'ise, bụru ndu tsụ-geeru lẹ nwoke, bya abụru ishi l'ibe nna whẹ.