1 Iwhe e meru l'oge ndu eze 24 - BAYỊBURU Ẹzaa

Ọgbo ndu l'agbajẹ ẹja nụ Chileke

¹ Ọ waa ọgbo ụnwu Érọnu ndọwa. Ụnwu Érọnu bụ: Nedabu, Abyihu, Eliyéza ọwaa Itama.

² Nedabu yẹle Abyihu bẹ vu nna whẹ ụzo nwụhu, whẹ te edobe akọ. Eliyéza yẹle Itama bụru ndu l'agbajẹ ẹja nụ Chileke.

³ Dévidi bẹ gbarụ whẹ l'ọgbo l'ọgbo gude keshiaru whẹ ozhi. Ndu yetaru Dévidi ẹka o mee ya nno bụ Zédọku, bụ ẹpa Eliyéza yẹle Ahimẹleku, bụ ẹpa Itama.

⁴ Ẹpa Eliyéza bẹ ka onweru ndu bụ ishi amamẹ ẹpa Itama, ọo ya meru g'o gude a gbaa whẹ ọgbo ẹnya-uwhu iri l'ishii l'ẹpa Eliyéza, bya agbaa whẹ ọgbo ẹnya-uwhu ẹsato l'ẹpa Itama.

⁵ A tụru ido gude gbaa ọgbo ono, whẹ ha ẹnya nhamụnha. Nkele ọo g'e nweru ndu ishi-ozhi ụlo-nsọ mẹe ndu ishi-ozhi l'iwhe Chileke l'ẹpa Eliyéza bụ g'e nweru iya l'ẹpa Itama.

⁶ Onye o-de-ẹkwo, bụ Shemaya nwa Netanẹlu, mbụ onye Lívayi bya edeshia ẹwha whẹ l'iwhu eze, mẹe l'iwhu ndu ishi iya, mẹe l'iwhu Zédọku, bụ onye l'agbajẹ ẹja nụ Chileke, mẹe l'iwhu Ahimẹleku nwa Abyata, mẹe l'iwhu ndu ishi ẹnya-uwhu ndu l'agbajẹ ẹja nụ Chileke, mẹe ndu Lívayi. E vuru ụzo họta ẹnya-uwhu lanụ l'ẹpa Eliyéza, bya ahọta ẹnya-uwhu lanụ l'ẹpa Itama.

⁷ A tụru ido nke mbụ, ọ dabarụ Jehoyaribu, a tụa ido nke ẹbo, ọ dabarụ Jedaya.

⁸ A tụa ido nke ẹto, ọ dabarụ Harimu, a tụa ido nke ẹno, ọ dabarụ Seyorimu.

⁹ A tụa ido nke ise, ọ dabarụ Málukija, a tụa ido nke ishii, o dabarụ Mijaminu.

¹⁰ A tụa ido nke ẹsaa, ọ dabarụ Hakọzu, a tụa ido nke ẹsato, ọ dabarụ Abáyija.

¹¹ A tụa ido nke tete, ọ dabarụ Jeshuwa, a tụa ido nke iri, ọ dabarụ Shekanaya.

¹² A tụa ido nke iri lẹ nnanụ, ọ dabarụ Ẹliyashibu, a tụa ido nke iri l'ẹbo, ọ dabarụ Jakimu.

¹³ A tụa ido nke iri l'ẹto, ọ dabarụ Hupa, a tụa ido nke iri l'ẹno, ọ dabarụ Jeshebeyabu.

¹⁴ A tụa ido nke iri l'ise, ọ dabarụ Byiliga, a tụa ido nke iri l'ishii, ọ dabarụ Ịma.

¹⁵ A tụa ido nke iri l'ẹsaa, ọ dabarụ Heziru, a tụa ido nke iri l'ẹsato, ọ dabarụ Hapizezu.

¹⁶ A tụa ido nke iri lẹ tete, ọ dabarụ Petahiya, a tụa ido nke ụkporo, ọ dabarụ Jehezekelu.

¹⁷ A tụa ido nke ụkporo lẹ nnanụ, ọ dabarụ Jakinu, a tụa ido nke ụkporo l'ẹbo, ọ dabarụ Gamulu.

¹⁸ A tụa ido nke ụkporo l'ẹto, ọ dabarụ Delaya, a tụa ido nke ụkporo l'ẹno, ọ dabarụ Maaziya.

¹⁹ O noo g'e shi gbaa whẹ tẹ whẹ jeje ozhi l'ụlo Onye-Nwe-Ọha, ẹgube ochee-oroke whẹ, bụ Érọnu tụru whẹ ẹka iya, bụ iya bụ gẹ Onye-Nwe-Ọha, bụ Chileke nke Ízurẹlu tụru iya ya l'iwu.

²⁰ A bya l'eri Lívayi ono, ndu ọdo, whuduru nụ bụ: Ẹpa Amụramu, onye bụ ishi bụ Shubayẹlu. Onye bụ ishi l'ẹpa nke Shubayẹlu bụru Jehideya.

²¹ A bya l'ẹpa Rehabyiya, onye bụ ishi bụ Ishiya.

²² Onye bụ ishi l'ẹpa Izharu bụ Shelomotu. Onye ishi l'ẹpa Shelomotu bụru Jahatu.

²³ Ẹpa Hiburọnu bẹ bụ Jeriya, bụ ọkpara, Amaríya bụru onye nke ẹbo, Jahaziyẹlu bụru onye nke ẹto, Jekameyamu bụru nke ẹno.

²⁴ Nwa Úziyẹlu bụ Mayịka, onye bụ ishi l'ẹpa Mayịka bụ Shamiru.

²⁵ Nwune Mayịka nke nwoke bụ Ishiya. Onye ishi l'ẹpa Ishiya bụru Zakaráya.

²⁶ Ụnwu Merari bụ Mahuli ọwaa Mushi. Onye bụ ishi l'ẹpa Jáziya bụru Beno.

²⁷ Nwa Merari bụ Jáziya, ndu bụ ishi l'ẹpa Jáziya bụru Beno, Shohamu, Zakuru ọwaa Ibyiri.

²⁸ Nwa Mahuli bụ Eliyéza. Eliyéza ta anwụtadu nwa nwoke.

²⁹ A bya l'ẹpa Kishu, onye bụ ishi bụ Jerahụmelu.

³⁰ Ụnwu Mushi bụ Mahuli, ọwaa Eda, ọwaa Jeremotu. Ndu ono bụkota eri Lívayi l'ẹnya-uwhu whẹ l'ẹnya-uwhu whẹ.

³¹ Ndu ishi ndu ẹnya-uwhu ono, mbụ ndu ukfu lẹ ndu nta ono bẹ tụkwaruwho ido nkewhe, ẹgube ono, ụnwunna whẹ, bụ ẹpa Érọnu tụru. Whẹ nọdu l'iwhu eze Dévidi, mẹe l'iwhu Zédọku, mẹe l'iwhu Ahimẹleku, mẹe l'iwhu ndu ishi ẹnya-uwhu ndu l'agbajẹ ẹja nụ Chileke, mẹe nke ndu Lívayi tụa ido ono.