1 Iwhe e meru l'oge ndu eze 23 - BAYỊBURU Ẹzaa

Ozhi, ikfu Lívayi l'eje

¹ Dévidi bya akahụ bụru nwoke ọgurenya, o mee nwa iya Sólomọnu eze, l'achị ndu Ízurẹlu.

² Dévidi kua ndu ishi ndu Ízurẹlu gẹ whẹ ha mẹe ndu l'agbajẹ ẹja nụ Chileke mẹe ikfu Lívayi ndzuko.

³ Ndu ikfu Lívayi, gbarụ ụkporo awha l'awha iri tụgbua b'ọ gụru ọgu l'onye l'onye. Iwhe whẹ dụkota bụ ụkporo ụnu unwoke ugbo ẹno l'ụnu iri l'ise.

⁴ Ụkporo ụnu unwoke ugbo ẹto l'ime ndu ono bẹ Dévidi sụru tẹ whẹ nọdu l'ishi ọrwu, l'aarwụ l'ụlo Onye-Nwe-Ọha ono. Ụnu unwoke iri l'ise abụru ndu ishi ozhi mẹe ndu ikpe.

⁵ Ụnu unwoke iri abụru ndu nche ọnuzo, ụnu unwoke iri ọdo abụru ndu l'agụru Onye-Nwe-Ọha egvu ajaja, whẹ egude ngwa-egvu, ya doberu t'e gudeje gụa egvu ajaja.

⁶ Dévidi bya agbaa whẹ l'ọgbo l'ọgbo gẹ whẹ dụ bụru ẹpa Lívayi. Ọgbo Gẹshonu dụ iya, ọgbo Kohatu dụ iya, ọgbo Merari dụ iya.

⁷ Ndu ọwa bụ ọgbo Gẹshonu: Ladanu mẹe Shimeyi.

⁸ Ụnwu Ladanu bẹ bụ Jehiyẹlu bụ ọkpara, Zetamu bụru otsota, Jowelu l'etso. Ẹto ono bẹ whẹ dụ.

⁹ Ụnwu nke Shimeyi bẹ bụ Shelomotu, ọwaa Haziyẹlu, ọwaa Háranu. Ẹto ono bẹ whẹ dụkwawho. Whẹ bụkota ndu ishi l'ẹnya-uwhu ibe Ladanu.

¹⁰ Ndu ọwa bụ ẹpa Shimeyi: Jahatu, Zina, Jewushi, ọwaa Beríya. Ẹno ono bẹ whẹ dụ.

¹¹ Jahatu bụ ọkpara, Ziza bụru otsota. Jewushi mẹe Beríya ta anwụshidu unwoke l'igwe, a gụa whẹ g'ọo ẹnya-uwhu lanụ.

¹² Ndu ọwa bụ ẹpa Kohatu: Amụramu, Izharu, Hiburọnu, ọwaa Úziyẹlu. Ẹno ono bẹ whẹ dụ.

¹³ Ụnwu nke Amụramu bụ: Érọnu mẹe Mósisu. Érọnu b'e doberu iche t'o bụru onye l'e-wojeru iwhe kakọta ọdu nsọ dobe nsọ. Yẹbedua mẹe ẹpa iya bẹ l'a-kpọje isẹnsu ọku l'iwhu Onye-Nwe-Ọha jeye lẹ tututu-mịmimi. Ọ bụru whẹ l'a-nọ ejeru Onye-Nwe-Ọha ozhi, gude ẹwha iya agọ ọnu-ọma jeye lẹ tututu-mịmimi.

¹⁴ Mósisu, bụ onye nke Chileke mẹe ụnwu iya b'a gụru ye l'eri Lívayi.

¹⁵ Ụnwu Mósisu bụ: Gẹshomu ọwaa Eliyéza.

¹⁶ Ụnwu nke Gẹshomu bụ: Shebuwẹlu, yẹbedua bụ ọkpara.

¹⁷ Ụnwu nke Eliyéza bụ: Rehabyiya, yẹbedua bụ ọkpara. Eliyéza ta anwụtadu nwa nwoke ọdo. Ọle Rehabyiya, bụ nwa iya nwoke bẹ nwụshiru unwoke l'igwe.

¹⁸ Ụnwu Izharu bụ: Shelomiti, yẹbedua bụ ọkpara.

¹⁹ Ụnwu Hiburọnu ndọwa: Jeriya bụ ọkpara, Amaríya bụru otsota, Jahaziyẹlu bụru onye nke ẹto, Jekameyamu bụru onye nke ẹno.

²⁰ Ụnwu Úziyẹlu ndọwa: Mayịka bụ ọkpara, Ishiya bụru otsota.

²¹ Ndu ọwa bụ ẹpa Merari: Mahuli ọwaa Mushi. Ụnwu nke Mahuli bụ: Eliyéza ọwaa Kishu.

²² Eliyéza nwụhuru t'ọ nwụta nwa nwoke. Ọo ụnwanyi b'ọ nwụshiru. Ọ bụru ụnwu Kishu, bụ abụbu whẹ bẹ lụkotaru whẹ nụ.

²³ Ụnwu nke Mushi bụ: Mahuli, Eda, ọwaa Jeremotu. Ẹto ono bẹ whẹ dụ.

²⁴ Ndu ono bụkota ẹpa Lívayi l'ẹnya-uwhu l'ẹnya-uwhu. Whẹ bụkota ishi l'ibe nna whẹ ẹgube e deru whẹ l'ẹkwo, bya agụa whẹ ọgu l'onye l'onye, mbụ ndu gbarụ ụkporo awha tụgbua, bụru ndu l'eje ozhi l'ụlo Onye-Nwe-Ọha.

²⁵ Nkele Dévidi bẹ sụru; “Onye-Nwe-Ọha, bụ Chileke nke Ízurẹlu bẹ mewaru tẹ nchị dụ ndibe iya ndoo, tẹmenu o buwaru lẹ Jerúsalẹmu gẹ l'o bu iya jeye lẹ tututu-mịmimi.

²⁶ Eri Lívayi ta abụhedu nke tẹ whẹ l'evuwhe mkpuumkpu mẹe iwhe e gude eje ozhi l'ime iya.”

²⁷ Ọ bụru okfu ikpazụ, Dévidi kfuru b'e gude gụa ikfu Lívayi ọgu; e shi iya agụgu lẹ ndu gbawarụ ụkporo awha tụgbushia.

Ozhi, ndu Lívayi l'eje l'ụlo Onye-Nwe-Ọha

²⁸ Ozhi, ndu Lívayi l'eje bụ tẹ whẹ yetaru ụnwu Érọnu ẹka l'ozhi, whẹ l'eje l'ụlo Onye-Nwe-Ọha. Ọo whẹ bẹ l'eleta ọma ogboduwhu eze-ụlo ono ẹnya; ọ bụru whẹ l'eleta mkpu, dụkota l'ụlo ono ẹnya, bụru whẹ l'emecha iwhe lile, dụ nsọ emecha mẹwaru ozhi ọdo, l'eeje l'ụlo Onye-Nwe-Ọha ono.

²⁹ Ozhi ọdo, whẹ l'eje bụ ooleta buredi ono, dụ nsọ l'iwhu Chileke ẹnya, mẹe iwhe gbasarụ ụturutuu-balị, l'aagbajẹ ngwo-ẹja nri, mẹe nke ẹcha, l'eete eyee iwhe l'ekoje ẹcha; iwhe ọdo dụru whẹ nụ ooghe iwhe egheghe, yẹle ngwo-ẹja, a gwọkoberu mmanụ mẹwaru ọtu ẹrwa iwhe atụtu, t'a marụ ole ọ dụ mẹe lẹ g'ọ hatabe.

³⁰ Ozhi ọdo dụ whẹ l'ẹka bụ tẹ whẹ fụtaje l'ụtsu mbọkumboku kfụru kele Onye-Nwe-Ọha ekele, jaa ya ajaja, whẹ emekwa iya whọ nno l'urwẹnyashi fụtaru nụ,

³¹ mẹwaro nteke, l'aagbarụ ẹja ọkpokota-iwhe-ọku lẹ mbọku-ọtuta-ume, mẹe l'ọnwa ọ̀whúú, mẹe l'oge, l'eeri eri. Whẹ l'a-nọduje l'atatiwhu Onye-Nwe-Ọha ntekenteke ẹgube a tuburu whẹ tẹ whẹ meje iya.

³² Ọo ya bụ l'ọo whẹ b'ọ dụ l'ẹka, mbụ ozhi lile, l'eeje eje lẹ Ụlo-ẹkwa ndzuko, mẹe ọwhu l'eeje l'ụlo-nsọ. Whẹ l'a-nọkwawho ejeru ụnwunna whẹ, bụ ụnwu Érọnu ozhi, bụ ozhi gbarụ whẹ nụ l'ụlo Onye-Nwe-Ọha.