1 Iwhe e meru l'oge ndu eze 22 - BAYỊBURU Ẹzaa

¹ Tọ dụ iya bụ, Dévidi sụ: “Ọo ẹka-a bẹ ụlo Onye-Nwe-Ọha, bụ Chileke l'a-dụ, ọ bụru ẹka-a bẹ ẹnya-mgbẹja, ndu Ízurẹlu l'a-gbajẹ ẹja ọkpokota-iwhe-ọku l'a-dụ.”

Aakwakọbe nke ọtu eze-ụlo Chileke

² Dévidi bya atụa iwu t'a akpakodzua ndu mbyambya, bu l'alị Ízurẹlu. Ọ bya eshi l'ime whẹ wofuta ndu l'aa-kwachata ẹwhuru dobe, l'ee-gude tụa ụlo Chileke.

³ Ọ bya anụ mkpụrumkpu igwe, haa l'urwuturwu t'e gude kpụshia aga, l'aa-kụpyabegee lẹ mgbo ọnuzo mẹe ọwhu l'ee-gude jịgbabe iwhe ajịgbabe. O nokwawho g'ọ nụru ope, ẹrwa dụ iya nụ kpọru gẹ l'aa-tụ ọnu iya.

⁴ Ọ nụ oshi sida, bụ agụta agụta nkele ndu Sáyịdonu mẹe ndu Taya bẹ wolataru Dévidi ikpoto oshi sida.

⁵ Dévidi bya asụ: “Nwa mu Sólomọnu bẹ bụ nwata uke, l'adụa iwhe ọ mawarụ. Ụlo ọbu, l'aa-tụru Onye-Nwe-Ọha l'a-pa mebyi ẹka, nke ọwhu bụ l'aa-tụgbaru ọnu iya lẹ mgboko, o je l'a-dụ biribiri. Ọo ya bụ lẹ mu l'a-kwakọberu iya.” Ọo ya bụ, Dévidi bya edobe iwhe l'ee-gude tụa ụlo ono dobe nke etsutsu iya tẹmenu o nwụhude.

Iwhe Dévidi kfuru nwa iya Sólomọnu

⁶ Tọ dụ iya bụ, o kua nwa iya Sólomọnu, tụru iwu nụ iya sụ iya t'ọ tụaru Onye-Nwe-Ọha, bụ Chileke nke Ízurẹlu ụlo.

⁷ Dévidi sụ Sólomọnu: “Nwa mu, o shi dụ mu l'obu tẹ mu tụaru Onye-Nwe-Ọha, bụ Chileke mu ụlo.

⁸ Ọle Onye-Nwe-Ọha bẹ kfuru yeru mu sụ: ‘I gbunukawaru ọchi, lwụwa ọgu, parụ ẹka. Ba atụkwaru mu ụlo, o noo l'ọchi i gbuwaru lẹ mgboko bẹ ha shi l'ẹnya nkemu.

⁹ Lee l'aa-nwụtaru ghu nwa nwoke. Nwata ọbu bẹ nchị l'adụ ndoo. Mu l'e-me tẹ nchị dụ iya ndoo l'ẹka ndu ọhogu iya nọ iya mgburumgburu. Ẹwha iya bẹ l'a-bụru Sólomọnu, nteke l'ọo-bụru eze bẹ mu l'e-me tẹ nchị dụ ndu Ízurẹlu ndoo, ẹka lile adakọtaru whẹ jii.

¹⁰ Ọo yẹbedua bẹ l'a-tụru mu ụlo. Ọo-bụru nwa mu, mu abụru nna iya. Mu l'e-me t'eze, ọ bụ bụru echihu echihu l'alị Ízurẹlu jeye lẹ gbururu.’

¹¹ “Nwa mu, tẹ Onye-Nwe-Ọha swikwaru ghu ọkpobe eswiru, nke l'ii-megee tụa ụlo Onye-Nwe-Ọha, bụ Chileke ghu ono tụkota ẹgube ono o kfuru iya l'ishi ghu.

¹² Iwhe mu l'a-kpọ ẹnwa iya bụkwa tẹ Onye-Nwe-Ọha nụ ghu ori-l'ichicho, ya emee t'iwhe dojee ghu ẹnya, nke ọwhu bụ l'ịi-nọ achị ndu Ízurẹlu, edobe iwu Onye-Nwe-Ọha, bụ Chileke ghu.

¹³ Nteke ono bụ, ọ -bụru l'ii-dorwu ẹnya ndo eme iwhe ọ tụru ọkpa iya mẹe nsọ Onye-Nwe-Ọha doberu Mósisu tẹ ndu Ízurẹlu dobe, ọo ya bụ gụ abụru onye l'e-nwe ọga-l'iwhu. Shihulekwawho ike, ume adụ ghu. T'egvu ba atsụkwa ghu, meji eje akụfu ghu.

¹⁴ “Mu jenwuru ẹhu tẹmenu mu dobede iwhe l'ee-gude mee nke ụlo Onye-Nwe-Ọha ono. Mu doberu mkpọla-ododo, ẹrwa iya dụ ụkporo ụnu talẹntu ugbo iri l'ẹbo l'ụnu iri, dobe mkpọla-ọcha, ẹrwa iya dụ ụkporo ụnu talẹntu ụkporo ugbo ishii ụzo ise, dobe ope mẹe mkpụrumkpu-igwe, ẹrwa iya kpọru gẹ l'aa-tụ ọnu iya nkele whẹ parụ mebyi ẹka. Mu dobekwaruwho oshi yẹle ẹwhuru. E nweru ike, gụ eyekwafua ya iwhe.

¹⁵ Ndu ọrwu b'i nweru nke etsutsu. E nwe ndu l'akwachashi ẹwhuru, nweru ndu l'edo ụlo, nweru ndu kapịnta mẹwaro ndu l'eme nka dụ iche iche.

¹⁶ Ndu l'eme nka lẹ mkpọla-ododo dụ iya, ndu l'eme nka lẹ mkpọla-ọcha dụ iya, ndu l'eme nka l'ope dụ iya, ndu l'eme nka lẹ mkpụrumkpu-igwe dụ iya. Whẹ bụ agụta agụta. Gbalihu wata ọrwu. Tẹ Onye-Nwe-Ọha swiru ghu eswiru.”

¹⁷ Dévidi bya atụa iwu nụ ndu bụ ishi lẹ Ízurẹlu gẹ whẹ ha tẹ whẹ yetaru nwa iya Sólomọnu ẹka l'ọrwu ono bya asụ whẹ:

¹⁸ “?Ọo lẹ Onye-Nwe-Ọha, bụ Chileke unu te eswiduru unu eswiru tọo? ?Tọo l'o to medu tẹ nchị dụ unu ndoo ibẹka ibẹbo? O mewaru tẹ ndu bu l'alị-a lwakọta mu l'ẹka, mewa tẹ whẹ nọdu lẹ mkpula Onye-Nwe-Ọha mẹe lẹ mkpula ndu nkiya.

¹⁹ Ntaa bụkwa t'unu gude ndzụ unu mẹe obu unu chọo Onye-Nwe-Ọha bụ Chileke unu. Unu wụ-lihu tụaru Onye-Nwe-Ọha, bụ Chileke ụlo-nsọ, nke ọwhu l'aa-pata igbe-ọgbandzu Onye-Nwe-Ọha mẹe arya dụ nsọ bya edobe l'ụlo ono, l'aa-tụru Onye-Nwe-Ọha.”