1 Iwhe e meru l'oge ndu eze 20 - BAYỊBURU Ẹzaa

Jowabu lwụtaru mkpụkpu Raba

¹ A bya anọo jeye awha kụgba ishi rwua nteke ndu eze l'alụfuje jee ọgu, Jowabu chịta ndu ojọgu; whẹ je alakọta alị ndu Amọnu l'iyi. Whẹ jeshia mkpụkpu Raba je eyebuta iya. Ọle Dévidi bẹ nọroo lẹ Jerúsalẹmu. Jowabu bakfu ndu Raba ọgu, mee whẹ, whẹ bụru kpukpuru-swoo.

² Dévidi kputa eze whẹ okpu-eze, o kpu l'ishi. Ọ chọfuta lẹ mkpọla-ododo, e gude mee okpu-eze ono bẹ ẹrwa iya dụ talẹntu lanụ, ọ bụru ẹwhuru, vu oke ọnu aswa b'e dongashiru iya edongashi. E woru okpu-eze ono kpube Dévidi l'ishi. Dévidi gwotakwawho ivu, parụ ẹka lẹ mkpụkpu ono vulata.

³ O rwukoo ndu mkpụkpu ono dobe tẹ whẹ gude sọya, mẹe ọgu, e meru l'igwe, mẹe ogbunkụ igwe eje ozhi. Ọ bụru nno b'o megbakotaru mkpụkpu lile, dụ l'alị ndu Amọnu. E megee, Dévidi yẹle ndu ojọgu iya l'owhu wụru lawhu azụ lẹ Jerúsalẹmu.

Ọgu ọdo, ndu Ízurẹlu whẹ lẹ ndu Fílistiya nọdu lwụgbabe

⁴ O be nteke ọbu, ọgu daarụ onye lẹ ndu Fílistiya lẹ mkpụkpu Gaza. Ọ bụru nteke ono bẹ Sibekayi, bụ onye mkpụkpu Husha gburu Sipayi, bụ onye lanụ l'ẹpa Refa. A kakputa ndu Fílistiya l'ẹnya.

⁵ Ọgu ọdo bya adakwaru whẹ lẹ ndu Fílistiya, Ẹluhananu nwa Jayi gbua Lahumi, bụ nwune Goliyatu onye Gatu, mbụ onye ono, igbi dụ l'akfụ, o gude dụ g'ọo nke oshi, l'eegudeje akpa ẹkwa.

⁶ Ọgu ọdo bya adaa lẹ mkpụkpu Gatu. L'ẹka ono b'o nweru nwoke lanụ ọbu, halẹwho gbawhugbawhu. O fua mkpụshi-ẹka ishii ishii l'ẹka iya whẹ ẹbo-ẹbo, ọwaa mkpụshi-ọkpa ishii ishii l'ọkpa iya whẹ ẹbo-ẹbo, iwhe ọ dụkota bụ ụkporo l'ẹno. Nwoke ono shikwawho l'ẹnya-ụlo Rafa.

⁷ O be nteke ọbu, nwoke ono fụta bya awata ọko ndu Ízurẹlu ọnu; nwa nwune Dévidi, l'aza Jonatanu nwa Shimeya gbua ya.

⁸ Ndu ono bụkota ẹpa Refa onye mkpụkpu Gatu, whẹ lakọta l'ẹka Dévidi yẹle ndu ozhi iya.