1 Iwhe e meru l'oge ndu eze 19 - BAYỊBURU Ẹzaa

Dévidi yẹle ndu Amọnu l'alwụ ọgu

¹ A nọnyaa nteke ọbu, Nahashi, bụ eze ndu Amọnu bya anwụhu. Nwa iya nwoke bya abụru eze nọ-chia ẹnya iya.

² Dévidi bya ekfua sụ: “Mu l'e-meru Hanunu nwa Nahashi odoo ẹgube nna iya mekwanuru mbẹdua, bụ Dévidi.” O zhia ndu ozhi tẹ whẹ je awhụaru Hanunu imiko anwụhu nna iya. O be gẹ ndu ozhi Dévidi ono byarwutaru alị ndu Amọnu bya erwua ibe Hanunu;

³ ndu bụ ishi ndu Amọnu sụ Hanunu: “?Ịiri l'ọo ugvu bẹ Dévidi l'akwabẹ nna ghu nno meru o zhia t'a bya imiko anwụhu iya? ?T'ị madụ l'iwhe whẹ byarụ bụ tẹ whẹ bya anwụa mkpụkpu-a chiru l'ẹka, mbụ tẹ whẹ bya egerwua ya ẹhu, nata iya anyi?”

⁴ Ọo ya bụ, Hanunu gudeshia ndu ono, Dévidi zhiru ozhi, kpụshia whẹ ẹji-agba, bya eshi l'ike chabushia uwe mkpẹelanu whẹ, nwufu whẹ tẹ whẹ la.

⁵ Whẹ tụgburu. O be g'e kfuru iya Dévidi, o zhia t'a gbata whẹ ndzuta, nkele e menukaru whẹ iwhe iwhere. Eze zhia ozhi sụ whẹ: “Unu nọdu lẹ Jériko jeye nteke ẹji-agba unu l'erwudzuwhu azụ, tẹhenu unu alwatashiwaro.”

⁶ O be gẹ ndu Amọnu malẹruwho lẹ whẹ l'eshiwaa tụbaa l'imi Dévidi, Hanunu mẹe ndu Amọnu wota mkpọla-ọcha, ẹrwa iya dụ ụnu talẹntu ugbo labọ l'ụkporo iri gude je ebuta ụgbo-ịnya, mẹe ndu l'agba ịnya l'alị Arámu-naharayimu, mẹe l'alị ndu Arámu-maaka, mẹe l'alị ndu Zoba.

⁷ Whẹ je ebuta ụgbo-ịnya, dụ ụkporo ụnu ugbo ẹno, butafua eze ndu Maaka yẹle ndu ojọgu iya. Whẹ bya akwaa okpu l'atatiwhu mkpụkpu Medeba. Ndu nke Amọnu shigee lẹ mkpụkpu whẹ gbakodzua fụta nke ọgu ono.

⁸ Anụnu, Dévidi l'anụ iya, o yefu Jowabu yẹle ndu ojọgu iya gẹ whẹ ha.

⁹ Ndu Amọnu wụshia bya akpọo giriri nke ọgu l'iwhu ẹka l'eeshije abahụ lẹ mkpụkpu ono. Ndu eze ono, byarụ whẹ oyetaru ẹka nọdu l'ọma ẹgu.

¹⁰ Jowabu whụlewho l'e gburu iya giriri iya iwhu mẹ azụ t'a lwụshi iya ọgu, ọ họkoo ndu Ízurẹlu ndu ọwhu kagee ọkwa ẹnya l'ọgu chịru whẹ ngabẹru ndu Arámu ono.

¹¹ Ọ chịta ndu ọwhu dobe tẹ whẹ nọdu nwune iya, bụ Abyishayi l'ẹka ngabẹru ndu nke Amọnu.

¹² Jowabu sụ: “O -bụru lẹ ndu Arámu-a karideru mu ẹka, unu abya eyetaru mu ẹka, nteke bụkwanu l'ọo ndu Amọnu bẹ karideru unu ẹka, anyịbedua abyatashia bya eyetaru unu ẹka.

¹³ T'obu shihu unu ike, unu t'anyi lwụa ọgu ẹhu ndibe anyi g'ọo mkparawa nwoke, anyi alwụa ọgu ẹhu mkpụkpu nke Chileke. Lẹ Onye-Nwe-Ọha l'e-me iwhe dụ iya ree l'ẹnya.”

¹⁴ Ọo ya bụ, Jowabu yẹle ndu nkiya tụko wụfuta jeshia ọgu ono. Ndu Arámu ye ọkpa l'ọso gbalashịa.

¹⁵ Ndu nke Amọnu whụlewho lẹ ndu Arámu bẹ gbarụ ọso, whẹbedua yefua ọkpa l'ọso l'atatiwhu Abyishayi, bụ nwune Jowabu wụba l'ime mkpụkpu whẹ. Jowabu lwatashia Jerúsalẹmu.

¹⁶ Ọ bya ebe gẹ ndu Arámu malẹruwho lẹ ndu Ízurẹlu lwụ-gbuwaru whẹ, whẹ zhia ndu je achịfuta ndu Arámu ọwhu nọ l'azụ ẹnyimu Yufurétisu. Whẹ ye Shofaku, bụ onye ishi ndu ojọgu Hadadeza t'ọ bụru onye ishi whẹ.

¹⁷ O be g'a bya ekfuaru iya Dévidi, ọ kpakọo ndu Ízurẹlu l'owhu, daa azụ ẹnyimu Jọ́danu jekfu whẹ je akwaa kẹkereke ngabẹru whẹ. Dévidi bya akpọo ndu ojọgu iya ono giriri gẹ whẹ l'a-dụ lwụshi ndu Arámu ọgu. Ọgu ono swọru.

¹⁸ Ndu Arámu bya agbaarụ ndu Ízurẹlu ọso. Dévidi gbua ụnu unwoke ugbo iri l'ẹsaa l'ụkporo iri lẹ ndu l'egudeje ụgbo-ịnya alwụ ọgu, ọwaa ndu ojọgu o-je-l'ọkpa, dụ ụkporo ụnu ugbo ise, gbukwawho Shofaku, bụ onye ishi ndu ojọgu whẹ.

¹⁹ Nteke ndu ono, whẹ lẹ Hadadeza tụgbaru alwụshi Dévidi ọgu whụru lẹ ndu Ízurẹlu lwụ-gbuwaru whẹ, whẹ byakfuta Dévidi; whẹ doshia bya eburu lẹ nchị-ọdu-ndoo. Whẹ nọdu Dévidi lẹ mkpula. Ndu Arámu te ejejehe oyeru ndu Amọnu ẹka ọdo.