1 Iwhe e meru l'oge ndu eze 18 - BAYỊBURU Ẹzaa

Ọgu, Dévidi lwụgbaberu

¹ A nọ-gezhiawho nwa nteke ono, Dévidi bya alwụ-gbua ndu Fílistiya mee, whẹ nọdu iya lẹ mkpula. Ọ nata ndu Fílistiya ono mkpụkpu Gatu yẹle ụnwu mkpụkpu, dụkota iya nụ.

² Dévidi lwụ-gbukwaawho ndu Moabu bya mee, whẹ l'ejeru iya ozhi, atụkwawho ụtu anụ iya.

³ Dévidi lwụ-gbukwawho Hadadeza, bụ eze ndu Zoba, nọ lẹ mgboro mkpụkpu Hámatu, nteke Hadadeza jeru tẹ ya mee t'alị ono dụ je akpaa l'ẹnyimu Yufurétisu lwakọta iya l'ẹka.

⁴ Dévidi nata iya ụnu ụgbo-ịnya ugbo labọ l'ụkporo iri mẹe ndu l'agba ịnya-ọgu, dụ ụnu iri l'ẹsaa l'ụkporo madzụ ugbo iri, bya anatakwa iya whọ ndu ojọgu o-je-l'ọkpa, dụ ụkporo ụnu ugbo labọ l'ụnu madzụ iri. Dévidi tụko ịnya ono, l'anọje alọkpu ụgbo-ịnya gbubushikota akwara azụ ọkpa, bya eworu ụkporo ụgbo-inya ugbo ise doberu onwiya.

⁵ O be gẹ ndu Arámu, bu lẹ Damásukọsu byarụ tẹ whẹ yetaru Hadadeza, bụ eze ndu Zoba ẹka, Dévidi gbua whẹ ụnu ụkporo ugbo labọ l'iri l'ise.

⁶ Dévidi bya emeta ọdu ndu ojọgu l'alị ndu Arámu nke Damásukọsu harụ ndu ojọgu iya chịta dobe iya. Ndu Arámu nọdu Dévidi lẹ mkpula, whẹ l'atụ akịriko anụ iya. Onye-Nwe-Ọha l'emeje tẹ Dévidi tụa okoo l'ẹka lile, o jeru.

⁷ Dévidi chịkoo iwhe ndu ozhi Hadadeza l'egbobeje gude ezeru onwowhe ọwhu e gudegee mkpọla-ododo mee chịlata Jerúsalẹmu.

⁸ Dévidi shi lẹ mkpụkpu Tibuhatu mẹe lẹ mkpụkpu Kunu, bụkota mkpụkpu, dụ l'alị, Hadadeza l'achị vukoo ope, ha shii. Ọ bụru iya bẹ Sólomọnu megeru gude mee abaravuma mẹe itso mẹwaro iwhe o meshigbaberu l'ope.

⁹ O be gẹ Toyi, bụ eze ndu Hámatu nụru lẹ Dévidi bẹ lwụ-gbukotawaru ndu ojọgu Hadadeza, bụ eze ndu Zoba,

¹⁰ o yefu nwa iya nwoke, ẹwha iya bụ Hadoramu t'o je ekele eze Dévidi ekele, jaa ya ajaja lẹ yẹle Hadadeza kpọgbaru, ọ lwụ-gbua. Nkele Hadadeza bẹ yẹle Towu shi anọje alwụ ọgu ntekenteke. Ọ nụ arya, dụ iche iche, e meru lẹ mkpọla-ododo, mẹe ọwhu e meru lẹ mkpọla-ọcha, mẹe ọwhu e meru l'ope t'ọ nụ Dévidi.

¹¹ Eze Dévidi woru ụnwu arya ono doberu Onye-Nwe-Ọha nsọ lẹ g'o dobehawaru mkpọla-ọcha yẹle mkpọla-ododo, shikota l'ẹka mba gẹ mba ha, ọ lwụ-gburu, mbụ ndu Edọmu mẹe ndu Moabu mẹe ndu Amọnu mẹe ndu Fílistiya ọwaa ndu Amalẹ́ku.

¹² Abyishayi nwa Zeruya lwụ-gbua ndu Edọmu ụkporo ụnu madzụ ugbo labọ l'ụnu madzụ ise lẹ Nsụda Únú.

¹³ Ọ bya emeta ọdu ndu ojọgu l'alị ndu Edọmu, chịta ndu ojọgu iya yekota iya. Ndu Edọmu l'owhu nọdukota Dévidi lẹ mkpula. Onye-Nwe-Ọha l'emeje tẹ Dévidi tụa okoo l'ẹka lile, o jeru.

¹⁴ Ọo ya bụ, Dévidi bụru eze ndu Ízurẹlu l'owhu, l'ookperu whẹ ikpe l'ụzo, dụ ree mẹe l'ụzo, kfụru nhamụnha.

¹⁵ Jowabu nwa Zeruya bẹ bụ onye ishi ndu ojọgu Dévidi. Jehóshafatu nwa Ahiludu bụru onye l'akwakọbeje iwhe meru eme.

¹⁶ Zédọku nwa Ahitubu yẹle Ahimẹleku nwa Abyata bụru ndu l'agbajẹ ẹja nụ Chileke, Shavisha bụru onye l'ederu eze ẹkwo.

¹⁷ Benaya nwa Jehoyada bụru onye ishi ndu Keretu whẹ lẹ ndu Peletu, bụ ndu l'anọje eche eze nche. Ụnwu Dévidi unwoke bụru ndu mgbazhi Dévidi.