1 Iwhe e meru l'oge ndu eze 17 - BAYỊBURU Ẹzaa

Ozhi, Nétanu zhiru Dévidi

¹ Ọ bya ebe nteke Dévidi nokfuru anokfuru l'ibe iya, ọ bya asụ Nétanu onye nkfuchiru Chileke: “Leduwho lẹ mu bu l'ụlo, a tụru l'oshi sida, igbe-ọgbandzu Onye-Nwe-Ọha bụru l'ụlo-ẹkwa b'ọ dụ.”

² Nétanu sụ Dévidi: “Iwhe bụ iwhe gbatarụ ghu l'uche lọbaru mee ya, lẹ Chileke bẹ swiru ghu.”

³ Ọ bya ebe l'ẹnyashi ono, Onye-Nwe-Ọha kfuru yeru Nétanu sụ iya:

⁴ “Je ezhia nwozhi mu, bụ Dévidi l'ọ waa iwhe mụbe Onye-Nwe-Ọha l'ekfu ndọwa: Ọ tọ bụdu ghu l'a-tụru mu ụlo, mu l'e-buru.

⁵ Eshi mbọku ono, mu dufutaru ndu Ízurẹlu l'alị ndu Íjiputu rwua ntanụ-a, bẹ mu l'ebujekwaaru l'ụlo. Ọo mu -shi l'ụlo-ẹkwa ọwa mu abahụ l'ụlo-ẹkwa ọwhu, mu shi lẹ mkpuumkpu ọwa mu abahụ lẹ mkpuumkpu ọwhu.

⁶ L'ẹka lile ono, mu lẹ ndu Ízurẹlu shi tụko jeta, ?o nweru nteke mu sụje-zhiaru ndu ishi ikfu Ízurẹlu, mbụ ndu ono, mu sụru tẹ whẹ cheje ndibe mu, bụ ndu Ízurẹlu g'ọo onye l'eche atụru sụ whẹ: ?Ọo gụnu meru unu ta atụru mu ụlo sida?

⁷ “Kfuru nwozhi mu Dévidi sụ iya l'ọ waa iwhe Onye-Nwe-Ọha l'ekfu ndọwa: Mụbe Onye-Nwe-Ọha, bụ Onye-ishi-igwe-ọgu bẹ dufutaru ghu l'ẹgu, ẹka élwù l'akpa nri t'i be etsowhehe élwù; mu dufutaru ghu t'ị bya abụru onye l'achị ndu nkemu, bụ ndu Ízurẹlu.

⁸ Mu shi swiwheta ghu l'ẹka lile l'iije, mu tụko ndu ọhogu ghu gẹ whẹ ha lwụ-gbua l'iwhu mu. Mu l'e-me ẹwha ghu t'ọ paa ẹka g'ọo ẹwha ndu oke amadụ, e nwegeeru lẹ mgboko.

⁹ Mu l'a-nụ ndibe mu, bụ ndu Ízurẹlu alị ẹka whẹ. Mu adzabẹ whẹ adzabẹ g'ọo oshi l'alị ono, nke ọwhu ẹka ono l'a-bụru alị ẹka whẹ. Ẹka ono te enwedu onye bya l'a-chọbaa whẹ okfu ọdo. Ndu ejo obu ta abyadụ l'emekpabaa whẹ ẹhu g'e shi emekpa whẹ iya lẹ mbụ,

¹⁰ mbụ g'e shi emekpa whẹ iya eshi nteke mu họtaru ndu ọgbo-ikpe tẹ whẹ chịje ndibe mu, bụ ndu Ízurẹlu. Ndu ọhogu unu whẹ bẹ mu l'a-kapyabẹkota l'ẹnya. Iwhe ọdo, mu l'ekfuru ghu bụ lẹ mụbe Onye-Nwe-Ọha l'e-me t'ị bụru ọzo-ụlo ẹka ghu.

¹¹ O rwudele ghu whọ l'alala, ọ gbabelewho nteke l'ịinwuhu lakfu ndụ-ichee ghu whẹ lẹ maa, mu eshi l'ụnwu ghu wofuta nwa ghu lanụ t'ọ nọ-chi ẹnya ghu. Mu emee t'eze ono, ị bụ kpọru akpọru.

¹² Ọo nwa ghu ono l'a-tụru mụbe Chileke ụlo, mu l'e-buru. Mu emee t'ẹpa iya bụru eze jeye lẹ tututu-mịmimi.

¹³ Mu l'a-bụru nna iya, yẹbedua abụru nwa mu. Mu ta abyakwa l'e-wofu n-yemobu mu l'ẹka ọ nọ gẹ mu wofuru iya l'ẹka onye vu iya ụzo nọ.

¹⁴ Mu l'e-dobe iya t'ọ bụru onye ishi l'ụlo mu mẹe l'alị-eze mu jeye lẹ tututu-mịmimi. O nokwawho g'ẹpa iya l'a-bụru eze jeye lẹ tututu-mịmimi.”

¹⁵ O noo ya, Nétanu kọkotaru Dévidi iwhe ono lẹge e kfuru iya ya mẹe lẹge ọ whụru iya l'ọwhulenya.

Dévidi l'ekfu anụ Chileke

¹⁶ Ọo ya bụ, eze bụ Dévidi gbashi bahụ l'ime ụlo je anọdu l'iwhu Onye-Nwe-Ọha bya asụ: “Gụbe Onye-Nwe-Ọha, bụ Chileke, ?ọo onye bẹ mu bụ? tẹmenu, ?ọzo-ụlo mu bụkwanu gụnu nke t'i wolia mu je akfụbe l'ẹka ha l'eli ẹgube-ẹ?

¹⁷ L'ẹnya nkeghu b'ọ ha ghu nwanshị, gụbe Chileke. I kfuwaru okfu ẹhu ọzo-ụlo onye ozhi ghu gẹ mgbe l'iwhu whẹ l'a-dụ. ?Ọ waa ẹgube ẹka l'iigudeje ehe madzụ, gụbe Onye-Nwe-Ọha, bụ Chileke?

¹⁸ “?Ọ zhia gụnu ọdo bẹ mụbe Dévidi l'e-kfubakwanuaru ghu l'ẹgube ugvu ọwaa, ị kwabẹru mụbe onye ozhi ghu. Nkele ị makọtaru onye ozhi nkeghu.

¹⁹ Gụbe Onye-Nwe-Ọha, i kwoberu iswi onye ozhi nkeghu bya egude g'o shi bụru obu ghu, mee eze iwhe ha ẹgube-ẹ, bya emee tẹ mu makọtaru eze iwhe ọwa.

²⁰ “Ọ tọ dụdu onye dụ g'ọo ghu, gụbe Onye-Nwe-Ọha, tọ dụ Chileke ọdo dụ nụ gbahaa gụbedua, mbụ ẹgube ono, anyi nụru iya lẹ nchị anyi.

²¹ ?Ndẹ-zhia ndu ọdo, dụbaa g'ọo ndu nkeghu, bụ ndu Ízurẹlu, mbụ mba lanụ lẹ mgboko-o, gụbe Chileke gbafụtaru tẹ whẹ bụru ndu nkeghu, bya egude whẹ mee t'a marụ ẹwha ghu, bya emee iwhe pageeru ẹka, dụ biribiri l'iwhu ndu nkeghu, bụ ndu ị gbafụtaru l'ẹka ndu Íjiputu, tẹmenu ị chịkashikwawho ndu mba gẹ mba ha ọdo l'iwhu ndibe ghu ono.

²² I meru tẹ ndu nkeghu, bụ ndu Ízurẹlu bụru ndu nkeghu gẹdegede jeyewaroya, gụbe Onye-Nwe-Ọha bya abụwaru whẹ Chileke.

²³ “Gụbe Onye-Nwe-Ọha; mekwa t'o keru, mbụ ụkwa ono, i kweru l'ẹhu mụbe onye ozhi ghu mẹe l'ẹhu ọzo-ụlo mu. T'o rekwaa lẹ g'i kfuru jeye lẹ tututu-mịmimi;

²⁴ T'o kekwaru nke ọwhu ẹwha ghu l'a-pa ẹka apaa jeye lẹ tututu-mịmimi. Ọo nteke ono bẹ l'aa-sụ l'ọo gụbe Onye-Nwe-Ọha, bụ Onye-ishi-igwe-ọgu, mbụ Chileke nke Ízurẹlu bẹ bụ Chileke nke Ízurẹlu ọbu ezhi-okfu. Ọzo-ụlo yẹbe onye ozhi ghu Dévidi je l'a-kpọru g'ọo abara l'iwhu ghu.

²⁵ “Eshi-ọwhu ọ bụ gụbe Chileke mu bẹ goshiru mụbe onye ozhi ghu l'ii-metaru mu ọzo-ụlo. Ọo ya kpatarụ g'o gude, ọnu dụ mụbe onye ozhi ghu nke anọ ekfu anụ ghu.

²⁶ Gụbe Onye-Nwe-Ọha; ọo ghu bẹ bụ Chileke ọbu. I kweshiwaru mụbe onye ozhi ghu ụkwa iwhe-ọma, dụ-gee ẹgube-ẹ.

²⁷ Ntaa bụkwa t'ọ dụ ghu ree t'ị gọru ọnu-ọma ọbu nụwaro ọzo-ụlo onye ozhi ghu, nke ọwhu whẹ l'a-nọ eje eje l'iwhu ghu. Nkele onye gụbe Onye-Nwe-Ọha gọru ọnu-ọma nụ b'a gọwaru ọnu-ọma nụ jeye lẹ gbururu.”