1 Iwhe e meru l'oge ndu eze 16 - BAYỊBURU Ẹzaa

¹ Whẹ pabata igbe-ọgbandzu Chileke ono bya edobe iya l'ime ụlo-ẹkwa ono, Dévidi kpọberu t'e dobe iya. Whẹ bya agbaa ẹja ọkpokota-iwhe-ọku mẹe ngwo-ẹja ẹhu-guu l'iwhu Chileke.

² Dévidi gbagelewho ẹja ọkpokota-iwhe-ọku ono mẹe nke ẹhu-guu ono, o gude ẹwha Onye-Nwe-Ọha gọru ọnu nụ ndu Ízurẹlu.

³ Ọ bya ekeeru ndu Ízurẹlu ono ishi buredi nnanụ nnanụ, mẹe ọkpurukpu anụ, mẹe ẹcha-mbeke, e meru l'akpụru vayịnu, kedzuru whẹ iya l'ẹhu l'ẹhu, unwoke mẹe ụnwanyi.

⁴ Iwhe ọdo, o meru bụ l'ọ tụru ụwhodu lẹ ndu ikfu Lívayi ẹka tẹ whẹ jeje ozhi, gbarụ l'ejeje l'atatiwhu igbe-ọgbandzu Onye-Nwe-Ọha ono, bụ iya bụ tẹ whẹ kpokuje Onye-Nwe-Ọha, mẹe tẹ whẹ tuje iya ẹwha, mẹe tẹ whẹ jajẹ Onye-Nwe-Ọha, bụ Chileke nke Ízurẹlu ajaja.

⁵ Asafu bụ ishi, Zakaráya bụru otsota. Ndu ọdo bụ Jeyẹlu, mẹe Shemiramotu, mẹe Jehiyẹlu, mẹe Matitiya, mẹe Eliyabu, mẹe Benaya, mẹe Óbẹdu-edọmu, ọwaa Jeyẹlu. Whẹbedua l'a-nọ akpọ une mẹe ogumogu. Asafu akụ ogele.

⁶ Benaya yẹle Jahaziyẹlu, bụ ndu l'agbajẹ ẹja nụ Chileke egbu opyi-ọku l'atatiwhu igbe-ọgbandzu Chileke ono ntekenteke.

Egvu-ekele

⁷ Ọo mbọku ono bẹ Dévidi vugezhia ụzo kfuru Asafu mẹe ndu ọgbo-egvu iya tẹ whẹ gụaru Onye-Nwe-Ọha egvu.

⁸ Unu kele Onye-Nwe-Ọha ekele, unu kpokua ẹwha iya. Unu mee tẹ mba nọnu madzuru iwhe o megbaberu.

⁹ Unu gụru egvu nụ iya, unu gụa egvu gude tua ya ẹwha. Unu kfukashikwawho iwhe bụ iwhe dụ biribiri, l'oomeje.

¹⁰ Unu gude ẹwha iya ono, dụ nsọ ngajẹ l'ụnga. Tẹ obu tsọje ndu l'achọ Onye-Nwe-Ọha ụtso.

¹¹ Unu wojeru ẹnya dabẹ lẹ Onye-Nwe-Ọha mẹe ọkpehu iya. Unu achọ iwhu iya ntekenteke.

¹² Unu nyatakwa iwhe dụ biribiri, o megbaberu, mẹe iwhe awhụrulenya, o megbaberu, unu anyata ikpe, o kpejeru.

¹³ Unubẹ ẹpa Ízurẹlu, bụ onye ozhi iya, unubẹ ụnwu Jékọpu, bụ ndu o gude ẹka iya họta.

¹⁴ Ọ kwa iya bụ Onye-Nwe-Ọha; bụru Chileke anyi, Ikpe iya tụkoru mgboko vọo kfurukfuru.

¹⁵ Ọ tọ zọhajedu ọgbandzu iya azọha wata lẹ gbururu jeye lẹ gbururu. Iwhe o kweru ụkwa iya bẹ l'anọje shi l'ọgbo rwua l'ọgbo.

¹⁶ Ọgbandzu ono, yẹle Ébirihamu gbarụ mẹe nte ono, o riburu Áyiziku

¹⁷ b'o meru, o keru l'ẹhu Jékọpu, t'ọ bụru ọgbandzu, l'a-dụru ndu Ízurẹlu jeye lẹ gbururu.

¹⁸ Ọ sụru whẹ: “Ọo unu bẹ mu l'a-nụ alị Kenanu t'ọ bụru oke-iwhe, unu ketaru.”

¹⁹ Nteke whẹ shi habe nwahabe, nteke whẹ shi dụ nchakata, bụru nlwamụnlwa l'alị ono,

²⁰ nteke shi abụje, whẹ shi lẹ mba ọwa whẹ alụfu lẹ mba ọwhu, whẹ shi l'alị-eze ọwa, whẹ alụfu l'alị-eze ọwhu,

²¹ nteke ono bẹ l'adụdua onye o kweru t'ọ kpaa whẹ ẹhu. Ọ bụru l'okfu ẹhu whẹ b'o gude baarụ ndu eze mba,

²² sụ whẹ: “Unu be edenyikwa ndu nkemu, a wụru mmanụ ẹka. T'ọ bọ dụkwa ndu l'ekfuchiru mu nụ, unu l'e-meka iwhe.”

²³ Unu gụa egvu nụ Onye-Nwe-Ọha, unubẹ eliwhe l'owhu. Unu kfujee ya ryaa ya aryarya mbọku mbọku l'ọ bụ onye l'adzọ ndzụ.

²⁴ Unu tụaru ndu ọha ọdo ọnu lẹ g'ọ dube biribiri, unu akọoru mba gẹ mba ha lẹge ọrwu iya dube biribiri.

²⁵ O noo lẹ Onye-Nwe-Ọha bẹ parụ ẹka, tẹmenu ọ gbakwaawhọ t'a jaa oke ajaja. Ọ gbakwaawho t'a tsụje iya egvu amamẹ agwa.

²⁶ O noo nkele agwa ndu mgboko l'owhu ta adụdu iwhe ọ bụ. Ọle ọo Onye-Nwe-Ọha bẹ meru igwe.

²⁷ Ọdu-ugvu mẹe ogbu-zaazaa bẹ nọdu iya l'atatiwhu. Ike mẹe ẹhu-ụtso swetakota ẹka o bu esweta.

²⁸ Unubẹ ikfu g'ikfu ha lẹ mgboko-o, unu kwabẹ Onye-Nwe-Ọha ugvu. Unu kfua g'ọ dụ-be biribiri mẹe g'ọkpehu iya habe shii.

²⁹ Unu kwabẹ Onye-Nwe-Ọha ugvu, gbarụ ẹwha iya. Unu gude iwhe bya l'iwhu iya. Unu yee uwe, dụ nsọ baarụ Onye-Nwe-Ọha ẹja.

³⁰ T'ẹhu nmaakwa unu kpakpakpa l'iwhu iya, unubẹ eliwhe l'owhu. Mgboko bẹ keru jịngu, ọ tọ dụdu iwhe sụru iya enwubata.

³¹ T'imigwe l'owhu tekota ẹswa, eliwhe l'owhu enweru ẹhu-ụtso. Tẹ whẹ karụ mba gẹ mba ha lẹ Onye-Nwe-Ọha bụ eze.

³² T'eze-ẹnyimu tụa oke akpara mẹe iwhe lile, jiru iya nụ. T'ẹgu l'owhu tụa okoo mẹe iwhe lile, dụ iya nụ.

³³ O noo nteke iwhe bụ oshi, dụ l'ọswa l'a-gụ egvu ẹhu-ụtso l'atatiwhu Onye-Nwe-Ọha. O noo nke l'ọobya tẹ ya kpee ụnwu eliwhe ikpe.

³⁴ Unu kele Onye-Nwe-Ọha ekele l'ọ bụ onye ọma. N-yemobu iya l'anọje jeye lẹ gbururu.

³⁵ Unu ryarụ kpua ya sụ: “Nafụtanu anyi, gụbe Chileke, bụ Onye ndzọta anyi. Rwukobenu anyi ọnu, gụ adzọfuta anyi l'ẹka ndu mba gẹ mba ha, nke ọwhu anyi l'e-tu ghu ẹwha, gụbe onye ono, ẹwha ghu dụ nsọ ono, gude ajaja, anyi l'a-ja ghu ngajẹ l'ụnga.”

³⁶ T'ajaja bụru nke Onye-Nwe-Ọha, bụ Chileke nke Ízurẹlu, shi lẹ gbururu jeye lẹ gbururu. O noo ya, ndu Ízurẹlu gẹ whẹ ha tụko zụa mgbede sụ: “O noo g'ọ dụ,” bya asụ: “T'ajaja bụru nke Onye-Nwe-Ọha.”

Eeke ozhi

³⁷ Ọo ya bụ, Dévidi haa Asafu mẹe ndu ọgbo-egvu iya l'atatiwhu igbe-ọgbandzu Onye-Nwe-Ọha ono tẹ whẹ jeje ozhi l'iwhu igbe-ọgbandzu ono lẹ g'a chọru t'e meje iya mbọku, fụtaru ishi l'igwe.

³⁸ Ọ hakwawhọ Óbẹdu-edọmu mẹe ọgbo nkiya, dụ ụkporo madzụ ugbo ẹto l'ụmadzu ẹsato. Óbẹdu-edọmu nwa Jedutunu yẹle Hosa bẹ l'eche ọnu ẹka ono nche.

³⁹ Ọ haa Zédọku onye l'agbajẹ ẹja nụ Chileke mẹe ọgbo nkiya, bụkwawho ndu l'agbajẹ ẹja nụ Chileke tẹ whẹ nọdu l'atatiwhu mkpuumkpu Onye-Nwe-Ọha, dụ l'ẹka l'aagwajẹ iwhe lẹ mkpụkpu Gibyiyọnu.

⁴⁰ Ozhi nkewhe bụ tẹ whẹ gbajẹeru Onye-Nwe-Ọha ẹja ọkpokota-iwhe-ọku l'ẹnya-mgbẹja iya, eswe l'ẹnyashi, mbụ ntekenteke, ẹgube ono e deru iya l'ẹkwo iwu ono, Onye-Nwe-Ọha nụru ndu Ízurẹlu.

⁴¹ Ndu a gụru yeru whẹ bụ Hemanu mẹe Jedutunu mẹwaro ndu a họtaru kua whẹ ẹwha tẹ whẹ keleje Onye-Nwe-Ọha ekele lẹ nke n-yemobu iya ono, l'a-nọ jeye lẹ gbururu.

⁴² Hemanu yẹle Jedutunu b'ọ dụ l'ẹka, mbụ ogbu opyi-ọku mẹe ọku ogele mẹwaro ngwa-egvu ọdo, e gude agụ egvu, dụ nsọ. Ụnwu Jedutunu b'a gụru l'oche ọnuzo.

⁴³ Tọ dụ iya bụ, ndu Ízurẹlu wụkashihu gẹ whẹ ha lashia ibe whẹ. Dévidi lashia ibe nkiya tẹ ya gọru ọnu-ọma nụ ndibe iya.