1 Iwhe e meru l'oge ndu eze 13 - BAYỊBURU Ẹzaa

A patarụ igbe-ọgbandzu Chileke dobe l'ibe Óbẹdu-edọmu

¹ Dévidi bya ejekfu ndu ishi, l'achị ụnu ndu ojọgu ugbo labọ l'ụkporo iri mẹe ndu ishi, l'achị ụkporo ndu ojọgu ugbo ise; o jekfuru whẹbe ndu ishi ono gẹ whẹ ha tẹ whẹ nweru idzu.

² Dévidi bya ekfuru yeru edzudzu-ọha ndu Ízurẹlu sụ whẹ: “Ọ -bụru l'ọ dụ unu ree, tẹmenu ọ bụru uche Onye-Nwe-Ọha, bụ Chileke anyi, ọo ya bụ t'e zhia ozhi t'o rwukota unwune anyi lẹ nchị l'alị Ízurẹlu kpaa-whuu, zhikwaa ya whọ ndu l'agbajẹ ẹja nụ Chileke mẹe ndu ikfu Lívayi, bukota lẹ mkpụkpu ẹka l'eeche élwù, tẹ whẹ byakọta t'anyi lẹ whẹ bụru ọkpu kpụa nnanụ.

³ Nke ọwhu anyi l'e-je apalata igbe-ọgbandzu Chileke anyi, o noo l'anyi ta akpadụ ishi iya nteke Sọlu shi bụru eze.”

⁴ Ndzuko ono l'owhu kwetakota t'e mee ya nno nkele iwhe ono bụ iwhe gbarụ nke ememe l'ẹnya whẹ.

⁵ Ọo ya bụ, Dévidi bya akpakodzua Ízurẹlu l'owhu, watalẹwho l'ọnu mini Shihọ nke alị Íjiputu jeye ẹka l'eeshije abahụ mkpụkpu Hámatu, tẹ whẹ je apafụta igbe-ọgbandzu Chileke ono lẹ mkpụkpu Kiriyatu-jeyarimu.

⁶ Dévidi yẹle ndu Ízurẹlu lile zarụ jeshia mkpụkpu Bela bụ iya bụ Kiriyatu-jeyarimu, mbụ ẹka ono, dụ l'alị Juda tẹ whẹ je apata igbe-ọgbandzu Chileke ono, mbụ igbe ono, a gụru ẹwha Onye-Nwe-Ọha, onye ono, oshi-eze iya dụ lẹ mgbaku cherubu.

⁷ Whẹ pafụta igbe-ọgbandzu Chileke ono l'ụlo Abyinadabu parụ tukobe l'eli ọgba-kperekpere, dụ ọ̀whúú ọ̀whúú. Ọ bụru Uza mẹe Ahiyo bẹhunu l'anga ọgba-kperekpere ono.

⁸ Dévidi yẹle ndu Ízurẹlu l'owhu gude ike whẹ g'ọ ha ete ẹswa l'iwhu Chileke. Whẹ l'agụ egvu, akpọ ogumogu mẹe une, akụ nkwa mẹe ogele, egbu opyi-ọku eye iya.

⁹ Ọ bya ebe nteke whẹ rwuru ẹka l'eechishije ẹswa lẹ balị, bụ Kidọnu, Uza tụfu ẹka tẹ ya wọkobe igbe-ọgbandzu Chileke ono g'eswi, l'alọkpu ọgba-kperekpere ono, a tukoberu iya kpokutaru iwhe abya adada.

¹⁰ Onye-Nwe-Ọha vọru ọku ghua ẹhu l'ẹka Uza nọ, chigbulekwa iya whọ, nkele ọ tụfuru ẹka denyi l'igbe-ọgbandzu ono, ọ nọdu l'atatiwhu Chileke nwụhu.

¹¹ Ẹhu sụlewho Dévidi kọo nkele Onye-Nwe-Ọha bẹ wokfutaru Uza ejo ndakfu. A gụa ẹka ono Pẹ́rezu Uza; ọ bụru iwhe ono bẹ l'eeku iya byasụ ntanụ.

¹² Egvu Onye-Nwe-Ọha bya Dévidi l'ẹhu mbọku ono, ọ sụ; “?Ndẹe gẹ mu l'e-me parwua igbe-ọgbandzu Chileke-e uwhu?”

¹³ Ọo ya bụ, Dévidi ta aparwuhe igbe-ọgbandzu ono mkpụkpu Dévidi. O gbechia pafụ iya je edobe l'ibe nwoke, l'aza Óbẹdu-edọmu nke Gatu.

¹⁴ Igbe-ọgbandzu Chileke ono whẹ lẹ ndibe Óbẹdu-edọmu nọdu l'uwhu ọnwa ẹto. Onye-Nwe-Ọha gọlahaaru ọnu-ọma nụ ndu uwhu ono yẹle iwhe lile, Óbẹdu-edọmu nweru.