1 Iwhe e meru l'oge ndu eze 12 - BAYỊBURU Ẹzaa

Ndu ojọgu, shi l'ikfu Bénjaminu

¹ Ọ waa bụ ndu byakfutaru Dévidi lẹ mkpụkpu Zikulagu. Nteke ono bẹ l'ọoto kpadụ lẹ ntụsaru-ẹhu l'iswi Sọlu nwa Kishu. Ndu ono tso lẹ ndu ojọgu, dụru iya l'ukfu ọgu.

² Whẹ bụ ndu l'achị ube, tẹmenu whẹ bụru ndu ọogba akfụ mẹe ọogba mgbẹka doru ẹnya. Whẹ l'agba l'ẹka-ụtara agba l'ẹka-ịcha. Ẹka whẹ shi bụ ikfu Bénjaminu, mbụ lẹ whẹ bụ abụbu Sọlu.

³ Onye ishi whẹ bụ Ahiyeza, onye ọdo bụ Jowashi. Whẹ tụko bụru ụnwu Shema nke mkpụkpu Gibyiya. Ndu ọdo bụ Jeziyẹlu mẹe Peletu, whẹ tụko bụru ụnwu Azụmavetu, mẹe Beraka, mẹe Jehu nke mkpụkpu Anatotu.

⁴ Ishimaya, bụ onye mkpụkpu Gibyiyọnu tsoru iya. Yẹbedua bụ onye lanụ lẹ ndu ojọgu ụkporo l'iri whọ, ọ bụru iya bụ onye ishi whẹ. Ndu ọdo bụ Jeremáya, Jahaziyẹlu, Johananu, Jozabadu nke mkpụkpu Gedera,

⁵ Eluzayi, Jeremotu, Beyaliya, Shemaraya ọwaa Shefataya nke mkpụkpu Harufu.

⁶ Ndu ọdo bụ Ẹ́lukana, Ishaya, Azarẹlu, Joweza, Jashobeyamu, bụ ẹpa Kora,

⁷ Jowela ọwaa Zebadaya, bụ ụnwu Jerohamu nke mkpụkpu Gedọ.

Ndu ojọgu, shi l'ikfu Gadu

⁸ A bya l'ikfu Gadu, o nweru ndu ọwhu wofutaru onwowhe jekfu Dévidi l'ẹka a tụshiru ike l'echi-ẹgu. Ndu ọbu bẹ ọkpehu dụ, bụru ndu ojọgu, ọgu doru ẹnya, bụru ndu l'eme nka l'ogude iwhe l'eegudeje egbobuta onwonye l'ọgu mẹe l'ọpa arwa. Whẹ gbarụ igiri igiri g'ọo oduu-gburu-agụ, ebu jamụ-jamụ g'ọo mgbada, nọ l'ugvu.

⁹ Onye ishi whẹ bụ Ẹ́za, onye nke ẹbo bụ Obedaya, onye nke ẹto bụ Eliyabu,

¹⁰ onye nke ẹno bụ Mishumana, onye nke ise bụ Jeremáya,

¹¹ onye nke ishii bụ Atayi, onye nke ẹsaa bụ Eliyẹlu,

¹² onye nke ẹsato bụ Johananu, onye nke tete bụ Ẹluzabadu,

¹³ onye nke iri bụ Jeremáya, onye nke iri lẹ nnanụ bụ Makubanayi.

¹⁴ Ndu ikfu Gadu ono bụkota ndu ishi ojọgu l'ẹhu l'ẹhu. Onye ẹnya kagezhia alwalwa l'ime whẹ bụ onye ishi ndu ojọgu ụkporo ugbo ise, onye parụ ẹka l'ime whẹ bụru onye ishi ụnu ndu ojọgu ugbo labọ l'ụkporo iri.

¹⁵ Ọo ndu ono darụ ẹnyimu Jọ́danu l'ọnwa mbụ nteke ọ byajẹru utso gbakọta l'ọnu iya, je achịkashia iwhe bụ ndu bukota lẹ nsụda nsụda je akpaa lẹ ndu bu l'ụzo ẹnyanwu-awata mẹe l'ụzo ẹnyanwu-arịba.

Ndu ojọgu, shi l'ikfu Bénjaminu mẹe l'ikfu Juda

¹⁶ Ọ bya enweru ndu ọwhu shi l'ikfu Bénjaminu mẹe l'ikfu Juda jekfu Dévidi l'ẹka a tụshiru ike.

¹⁷ Dévidi lụfu gbata whẹ ndzuta bya asụ whẹ: “Ọ -bụru l'unu gude nchị-ọdu-ndoo bya t'unu dụru mu l'ukfu; ọ kwa iya bụ l'obu mu l'unu l'a-tụgba bụru nnanụ. Nteke bụ l'iwhe unu byarụ bụ t'unu nwuru mu ye l'ẹka ndu ọhogu mu, lẹ mu be emeka unu, ọ kwa iya bụ tẹ Chileke nke nna anyi lee ya ẹnya gbọoru unu ụja.”

¹⁸ Tọ dụ iya bụ, ume Chileke bya Amasayi, bụ onye ishi ndu ojọgu ụkporo l'iri whọ l'ẹhu, ọ sụ: “Anyi bụkwa nkeghu Dévidi! Anyi kfụru gụbe nwa Jesi l'azụ! Tẹ nke-ọma meeru ghu! Tẹ nke-ọma meeru ghu! Tẹ nke-ọma meeru ndu l'eyeru ghu ẹka, Nkele Chileke ghu l'e-yeru ghu ẹka.” Ọo ya bụ, Dévidi gbobe ẹka labọ nabata whẹ, bya emee whẹ ndu ishi ndu ojọgu iya.

Ndu ojọgu, shi l'ikfu Manáse

¹⁹ Ndu shi l'ikfu Manáse ụwhodu bẹ wụfutaru tsoru Dévidi nteke ono, yẹle ndu Fílistiya lị byakfuta Sọlu ọgu. Ọle Dévidi megeeru t'o yeheru ndu Fílistiya ẹka nkele ndu ishi whẹ gbarụ idzu chịfu iya t'o bo tsoshi whẹ. Whẹ sụru lẹ Dévidi l'e-buha whẹ tsoru onye-nwe-iya nụ Sọlu, ishi whẹ ejee ya.

²⁰ Ọo gẹ Dévidi l'eje mkpụkpu Zikulagu bẹ ndu ikfu Manáse-e wukfutaru iya; ndu ọbu bụ: Aduna, Jozabadu, Jediyẹlu, Máyikelu, Jozabadu, Elihu ọwaa Ziletayi. Ndu ono bụkota ndu ishi, l'achị ụnu ndu ojọgu ugbo labọ l'ụkporo iri l'ikfu Manáse.

²¹ Whẹ yetaru Dévidi ẹka lwụshi ndu ojọgu ọlwua-ọlwaa ọgu. Whẹ bụkota ndu ojọgu mkparawa, tẹmenu whẹ bụru ndu ishi ojọgu.

²² Lẹ mbọku lẹ mbọku bẹ ndu madzụ l'abyajẹ tẹ whẹ dụru Dévidi l'ukfu, jeye Dévidi nweru ndu ojọgu, bụ ikpoto.

Ole, ndu ojọgu Dévidi dụ

²³ Ọ waa ụmadzu ole, whẹ dụ, mbụ ndu ojọgu, byakfutaru Dévidi lẹ mkpụkpu Hiburọnu tẹ whẹ dụru iya l'ukfu nafụ Sọlu eze, ọ bụ woru iya nụ Dévidi, ẹgube ono Onye-Nwe-Ọha kfuru l'ọo-dụ.

²⁴ Ndu nke ikfu Juda, mbụ ndu l'apa iwhe e gude egbobuta onwonye mẹe arwa bẹ dụ ụnu iri l'ẹsaa, bụkotaru ndu ojọgu chị ngwọgu.

²⁵ Ndu nke ikfu Símiyọnu bẹ dụkota ụnu ndu ojọgu ugbo iri l'ẹsaa l'ụkporo ugbo iri l'ise, bụkotaru ndu ojọgu bụ dike-ọgu.

²⁶ Ndu nke ikfu Lívayi bẹ dụkota ụnu ugbo iri lẹ nnanụ l'ụkporo ụmadzu iri,

²⁷ yeru iya Jehoyada, bụ onye ishi ẹnya-ụlo Érọnu. Ndu whẹ l'iya gba l'ọgbo bẹ dụ ụnu ugbo tete l'ụkporo ise.

²⁸ Onye ọdo bụ nwata nwokoro, l'aza Zédọku. Yẹbedua bụ dike-ọgu. Ndu ishi ndu ojọgu, shi l'ọzo-ụlo nna iya bẹ dụ ụkporo ụmadzu l'ụmadzu labọ.

²⁹ Ndu nke ikfu Bénjaminu bụ iya bụ ndu abụbu Sọlu bẹ dụkota ụnu ugbo ẹsaa l'ụkporo ụmadzu iri. Igweligwe l'ime ndu nke ikfu Bénjaminu ono bẹ tụkwaduru ike yeru Sọlu jeye nteke ono.

³⁰ Ndu nke ikfu Ífuremu bẹ dụkota ụkporo ụnu ugbo labọ l'ụnu ugbo iri l'ẹbo, bụkotaru dike-ọgu, tẹmenu whẹ bụru ndu a marụ ẹwha whẹ l'ibe nna whẹ.

³¹ Lẹ nkerẹbo ikfu Manáse bẹ whẹ dụkota ụkporo ụnu ugbo labọ l'ụnu ise. Ndu ono bụ ndu e wofutaru ẹwha whẹ tẹ whẹ bya etsoru mee Dévidi eze.

³² Ndu nke ikfu Ísaka bẹ bụ ndu maru gẹ l'aagbajẹ oge, whẹ maru gẹ ndu Ízurẹlu l'eri ala. Iwhe whẹ dụ bụ ụkporo ugbo iri, bụkotaru ndu ishi. Ndu abụbu whẹ nọdu whẹ lẹ mkpula.

³³ Ndu nke ikfu Zébulọnu bẹ dụkota ụkporo ụnu ugbo ishii l'ụnu madzụ ise, bụkotaru ndu ọgu kwọwaru ẹhu, tẹmenu whẹ nweru ngwọgu, dụ l'iche l'iche, whẹ gude obu lanụ bya tẹ whẹ dụru Dévidi l'ukfu.

³⁴ Ndu nke ikfu Náfutali bẹ dụkota ụnu ugbo labọ l'ụkporo iri, bụkotaru ndu ishi ndu ojọgu. Ndu tso l'ọgbo nke whẹ bẹ dụkota ụkporo ụnu ugbo ẹno l'ụnu madzụ ugbo iri l'ẹbo l'ụkporo iri, bụru ndu l'apa iwhe e gude egbobuta onwonye mẹe arwa.

³⁵ Ndu nke ikfu Danu bẹ dụkota ụkporo ụnu ugbo ẹto l'ụnu iri lẹ nnanụ l'ụkporo iri, bụkotaru ndu ọgu kwọwaru ẹhu.

³⁶ Ndu nke ikfu Asha bẹ dụkota ụkporo ụnu ugbo ise, bụkotaru ndu mawarụ ẹnya ọgu shii, bụru ndu kwakọberu oje ọgu.

³⁷ Ndu nke ikfu Rúbẹnu mẹe ndu nke ikfu Gadu mẹe ndu nke nkerẹbo ikfu Manáse bụ iya bụ ndu onona, bu l'azụ ẹnyimu Jọ́danu azụ iya ọwhu bẹ dụkota ụkporo ụnu ugbo iri l'ise, bụru ndu nweru ngwọgu, dụ l'iche l'iche.

³⁸ Ndu ojọgu ono gẹ whẹ ha bẹ kwakọtaru ngwọgu l'ẹhu l'ẹhu. Whẹ gudekota obu whẹ g'ọ ha byakfuta Dévidi lẹ mkpụkpu Hiburọnu tẹ whẹ mee ya eze ndu Ízurẹlu l'owhu. Ọ kwawhọ ẹgube ono bẹ obu ndu Ízurẹlu ọwhu bụkota nnanụ t'e mee Dévidi eze ono.

³⁹ Whẹ lẹ Dévidi bẹ nọru abalị ẹto l'ẹka ono, whẹ l'eri l'angụ, o noo nkele ndibe whẹ tụkoru whẹ iwhe-eriri.

⁴⁰ O nokwawho gẹ ndu obutobu whẹ je akpaa lẹ ndu shi l'ikfu Ísaka mẹe l'ikfu Zébulọnu mẹe l'ikfu Náfutali kebegeeru nri l'eli nkakfụ-ịgara mẹe l'eli ịnya-kamẹlu mẹe l'eli ịnya-mulu mẹe l'eli oke-eswi vutaru whẹ. Nri dụ nke etsutsu iya, mbụ ụturutuu-balị mẹe ẹcha-figu mẹe ọjokfutu akpụru vayịnu, a mịkporu nkụ mẹe mmẹe-vayịnu mẹe mmanụ mẹe eswi mẹe atụru. O noo l'egoshi ụdu ẹhu-ụtso dụ lẹ Ízurẹlu.