1 Iwhe e meru l'oge ndu eze 11 - BAYỊBURU Ẹzaa

Dévidi bụ eze ndu Ízurẹlu

¹ Tọ dụ iya bụ, Ízurẹlu l'owhu tụko byakfuta Dévidi lẹ mkpụkpu Hiburọnu bya sụ iya: “Anyi lẹ ghu bụ mmee lanụ bụru anụ-ẹhu lanụ.

² Nteke garụ aga, mbụ je akpaa nteke Sọlu shi bụru eze, bẹ bụ gụbedua shi edu ndu Ízurẹlu eje eje alwa alwa l'ọgu. Tẹmenu Onye-Nwe-Ọha, bụ Chileke ghu sụ ghu l'ọo ghu l'a-bụru onye l'e-che ndibe iya, bụ ndu Ízurẹlu g'ọo onye l'eche atụru, mbụ l'ịi-bụru ishi ndibe iya, bụ ndu Ízurẹlu.”

³ O noo ya bụ l'iwhe bụ ndu bụ ọgurenya Ízurẹlu abya awukfu eze bụ Dévidi lẹ mkpụkpu Hiburọnu, Dévidi nọdu lẹ Hiburọnu l'ẹka ono whẹ l'iya gbaa ndzụ l'iwhu Onye-Nwe-Ọha, whẹ wụa ya mmanụ t'ọ bụru eze ndu Ízurẹlu ẹgube Onye-Nwe-Ọha shi l'ọnu Sámuwẹlu kfua ya.

⁴ Dévidi yẹle ndu Ízurẹlu lile wụru jeshia ọgu lẹ Jerúsalẹmu bụ iya bụ Jebusu. Ndu Jebusu bẹ bụ whẹ bu l'alị ono.

⁵ Ndu Jebusu sụ Dévidi: “Ị tịi fụdu bata l'ẹka-a.” Ọle Dévidi naghalẹru-a ẹka a tụshiru ike, dụ l'eli ugvu Záyọnu, megeeru bụru mkpụkpu Dévidi.

⁶ Dévidi bya ekfua sụ l'onye ivurụzo, l'e-gbu onye Jebusu bẹ l'a-bụru ishi, tẹmenu onye ọbu abụkwaruwho onye ishi ndu ojọgu. Ọ bụru Jowabu nwa Zeruya megeeru vuru ụzo tụgburu, ọo ya bụ, e mee ya ishi.

⁷ Dévidi bya akwata uwhu l'ẹka ono, a tụshiru ike ono. E kulahaa ya mkpụkpu Dévidi.

⁸ Ọ tụ-wheta mgbodo lẹ mkpụkpu ono mgburumgburu. O shi l'agbarike mgbodo mkpụkpu ono tụa ya jeye lẹ mgbodo ono gẹdegede. Jowabu dozhikwaruwho ẹka whọduru lẹ mkpụkpu ono.

⁹ Dévidi l'akaba ike aka eje eje nkele Onye-Nwe-Ọha, bụ Onye-ishi-igwe-ọgu swiru iya eswiru.

Ndu a ma ama lẹ ndu ojọgu Dévidi

¹⁰ Ọ waa ndu bụ ishi lẹ ndu ojọgu Dévidi, mbụ ndu whẹ lẹ ndu Ízurẹlu l'owhu dụru Dévidi l'ukfu, mee ụkfu kaa ya aka l'alị-eze ono, tẹmenu ọ bụru whẹ tụgbaru mee ya eze ẹgube Onye-Nwe-Ọha kweru ndu Ízurẹlu ụkwa.

¹¹ Ọ waa bụ ẹwha ndu ojọgu, ike kakọta lẹ ndu ojọgu, Dévidi shi nweru: Jashobeyamu ẹpa Tahukemọnu. Ọo ya shi bụru ishi ụmadzu ẹto whọ, bụ dike-ọgu. O gudeje arwa jekfu ndu ojọgu, dụ ụnu ugbo labọ ọgu, o gbukota whẹ l'akpụru ẹnyanwu lanụ.

¹² Onye nke ẹbo, l'etsota iya nụ bụ Eliyéza nwa Dodo, onye shi l'eri Ahowa. Yẹbedua tsokwawho l'ime ụmadzu ẹto ono.

¹³ O tso Dévidi nọdu lẹ Pasu-damimu nteke ono, ndu Fílistiya chịkoberu onwowhe byatashia ọgu l'ẹka ono. O nweru ẹgu ọbu a kụru balị, ọ bụru l'ẹka ono b'ọ nọ nteke ndu ojọgu ndu Ízurẹlu whụru whẹ tsu l'ọso gbalashịa.

¹⁴ Yẹbedua takeleru-a l'echilabọ ẹgu ono alwụshi ndu Fílistiya ọgu, gbushia whẹ nafụta whẹ ẹgu ono, Onye-Nwe-Ọha dzọfuta ndu Ízurẹlu mee, whẹ lwụ-gbua whẹ ọkpobe alwụ-gbu.

¹⁵ Ụmadzu ẹto l'ime ụkporo madzụ l'ụmadzu iri, bụkota ndu ishi ọgu wụru wụ-kfuta Dévidi l'ẹwhuru, dụ l'ọgba, dụ lẹ mgboro mkpụkpu Adulamu. Nteke ono bẹ ikpoto ndu Fílistiya wụfutaru bya adọru lẹ nsụda Refayimu.

¹⁶ Nteke ono bẹ Dévidi nọ l'ime ẹka ọ tụru o shihu ike. O nweru ẹka ndu ojọgu ndu Fílistiya kwarụ okpu lẹ mkpụkpu Bẹ́tulehemu.

¹⁷ Ẹgu mini gụshilahaa Dévidi ike; ọ sụ: “Oowa nggẹ ọ dụnu g'e shi e kutaru mu mini lẹ wẹlu ono, dụkube ẹka ono, l'eeshije abahụ lẹ Bẹ́tulehemu tẹ mu ngụa!”

¹⁸ O noo ya, unwoke ẹto ono, ike dụ l'ọgu ono kpata ụzo ghata ndu ojọgu ndu Fílistiya ono, kwarụ okpu l'ẹka ono je ekuta mini lẹ wẹlu ono, dụkube ẹka l'eeshije abahụ lẹ Bẹ́tulehemu ono, wojeshiaru Dévidi. E megee, Dévidi ta angụ mini ono; ọ whụshiaru iya Onye-Nwe-Ọha

¹⁹ bya asụ: “Tụswekwa! Chileke mu, be ekwekwa tẹ mu mee ẹgube iwhe ọwa-a. Mini-a ta adụdu-a g'ọo mmee ndu-a, woru ndzụ whẹ tsebe l'ọnu ogu gẹ l'ee-shi t'e kuta iya.” Ọo ya bụ, tọ ngụ mini ono. O noo ike unwoke ẹto ono, ike dụ l'ọgu kparụ.

²⁰ L'ime ụkporo unwoke l'unwoke iri ono, bụ ndu ishi ọgu ono bẹ bụ Abyishayi, bụ nwune Jowabu gbee bụru ishi whẹ. Abyishayi bẹ gudeje arwa jekfu ụkporu madzụ ugbo iri l'ise ọgu. O megee gbukota whẹ l'ọgu ono. Eshiwaro nno, ẹwha iya l'ede ude g'ọo nke ụmadzu ẹto ọwhu.

²¹ Ọo yẹbedua bẹ ẹwha iya kagezhia edede l'ime ụkporo madzụ l'ụmadzu iri ono. Ọ bụru iya bụ ishi whẹ; l'ẹka l'ẹte abụkwanu m'ọo l'a gụru iya ye l'ụmadzu ẹto whọ.

²² Benaya nwa Jehoyada bụ onye ọkpehu dụ shii; ẹka o shi bụ Kabuzelu. Ọ kparụ ẹjo ike. Ọo yẹbedua gburu unwoke Moabu labọ ono, l'akpa ike g'ọo oduu-gburu-agụ. Ọ kwa iya whọ jejeru je egbua oduu-gburu-agụ l'ime iduma mbọku ọbu aka-mini tụru.

²³ Benaya gbujekwaruwho eze nwoke Íjiputu ọbu, dụ ntọkpa ẹsaa l'ube l'ogologo. Arwa nwoke Íjiputu ono bẹ ha g'ọo ogbogoro oshi ndu l'akpa ẹkwa l'egudeje. Iwhe yẹbedua gudekwanu bụru mgbọro. Whẹ l'iya wọgba, ọ nyịchata nwoke Íjiputu ono arwa ono, o gude l'ẹka gude iya nmagbua ya.

²⁴ O noo ike, Benaya nwa Jehoyada kparụ ndono. Eshiwaro nno, ẹwha iya l'ede ude g'ọo nke ụmadzu ẹto whọ, bụ ndu ike dụ l'ọgu.

²⁵ Ọ bụ onye l'aakwabẹ ugvu l'ime ụkporo madzụ l'ụmadzu iri whọ, l'ẹka l'ẹte abụkwanu m'ọo l'a gụru iya ye l'ụmadzu ẹto whọ. Ọo ya bụ, Dévidi mee ya onye ishi lẹ ndu ojọgu, l'eche iya nche.

²⁶ Ẹwha ndu ishi ojọgu ono bụ: Asahẹlu, bụ nwune Jowabu, ọwaa Ẹluhananu nwa Dodo onye Bẹ́tulehemu,

²⁷ ọwaa Shamotu onye Harọdu, ọwaa Helezu onye Pelọnu,

²⁸ ọwaa Ira nwa Ikeshi nke Tekowa, ọwaa Abyiyeza onye Anatotu,

²⁹ ọwaa Sibekayi onye Husha, ọwaa Ílayi, bụ onye shi l'eri Ahowa,

³⁰ ọwaa Maharayi onye Netofa, ọwaa Helẹdu nwa Bána onye Netofa,

³¹ ọwaa Itayi nwa Ribayi onye Gibyiya, dụ l'alị ndu Bénjaminu, ọwaa Benaya onye Pyịratonu,

³² ọwaa Hurayi, shi lẹ nsụda nsụda ugvu Gáshi, ọwaa Abyiyẹlu onye Araba,

³³ ọwaa Azụmavetu onye mkpụkpu Baharumu, ọwaa Ẹliyahuba onye Shalụbonu,

³⁴ ọwaa ụnwu Hashemu onye Gizọnu, ọwaa Jonatanu nwa Shage onye Hararu,

³⁵ ọwaa Ahiyamu nwa Saka onye Hararu, ọwaa Elifalu nwa Uru,

³⁶ ọwaa Hefa onye Mechera, ọwaa Ahayija onye Pelọnu,

³⁷ ọwaa Hezuro onye Kamẹlu, ọwaa Narayi nwa Ezubayi,

³⁸ ọwaa Jowelu nwune Nétanu, ọwaa Mibuha nwa Hagiri,

³⁹ ọwaa Zelẹku, bụ onye Amọnu, ọwaa Naharayi onye Beerotu, bụ onye l'achịjeru Jowabu nwa Zeruya ngwọgu,

⁴⁰ ọwaa Ira onye Itiru, ọwaa Garebu onye Jatiru,

⁴¹ ọwaa Yuriya, bụ onye Hetu, ọwaa Zabadu nwa Ahụlayi,

⁴² ọwaa Ádina nwa Shiza onye ikfu Rúbẹnu. Ọo ya bụ onye ishi ẹpa Rúbẹnu, bụru iya bụ onye ishi ndu ojọgu ụkporo l'iri, whẹ l'iya gba l'ọgbo.

⁴³ Onye ọdo bụ Hananu nwa Maaka, ọwaa Joshafatu onye Mitanu,

⁴⁴ ọwaa Uzáya onye Ashitera, ọwaa Shama yẹle Jeyẹlu, bụ ụnwu Hotamu Arowa,

⁴⁵ ọwaa Jediyẹlu nwa Shimiri, Joha, bụ nwune iya. Whẹ bụ ndu Tizu.

⁴⁶ Onye ọdo bụ Eliyẹlu onye Mahava, ọwaa Jeribayi yẹle Joshaviya, bụ ụnwu Elunamu mẹe Itima onye Moabu,

⁴⁷ mẹe Eliyẹlu, mẹe Óbẹdu, mẹe Jasiyẹlu onye Mezoba.