1 Iwhe e meru l'oge ndu eze 10 - BAYỊBURU Ẹzaa

Anwụhu Sọlu

¹ Nteke ọbu bẹ ndu Fílistiya whẹ lẹ ndu Ízurẹlu lwụru ọgu; ndu Ízurẹlu gbaarụ whẹ ọso. E gbua igweligwe ndu Ízurẹlu l'ugvu Gilubowa.

² Ndu Fílistiya tsopyabe Sọlu yẹle ụnwu iya nke nyịkanyika. Whẹ gbua Jonatanu mẹe Abyinadabu yẹle Malukishuwa, bụ ụnwu Sọlu.

³ Ọgu ono bya fụkafuka l'ẹka iya nke Sọlu, ndu l'agba akfụ whụa Sọlu, whẹ gbaa ya akfụ ono, o merwua ya ẹhu.

⁴ Ọo ya bụ, Sọlu sụ onye chịru iya ngwọgu: “Mịta ogu-ịgba ghu ye mu l'ẹwho, a nọnyaa ndu akpapyị-a bya emeru iwhe-iwhere kpua mu.” Ọle onye chịru iya ngwọgu ono l'atsụshi iya egvu ike, t'o kwe. Ọo ya bụ, Sọlu woru ogu-ịgba nkiya ye onwiya l'ẹwho.

⁵ Nteke onye ono, chịru Sọlu ngwọgu whụru l'ọ nwụhuwaru; o yekwaruwho onwiya ogu-ịgba l'ẹwho nwụhufua.

⁶ O noo ya, Sọlu yẹle ụnwu iya whẹ ẹto mẹe ndibe iya tụko gẹ whẹ ha nwụshihukota.

⁷ Ndu Ízurẹlu ọwhu, bu lẹ nsụda Jezerẹlu bya awhụa lẹge ndu ojọgu ndu Ízurẹlu gbarụ ndu Fílistiya ọso mẹe lẹ Sọlu yẹle ụnwu iya bẹ nwụshihuwaru nụ, whẹ haa mkpụkpu whẹ gbalashịa, ndu Fílistiya bya eburu iya.

⁸ O belewho echile iya, gẹ ndu Fílistiya byarụ tẹ whẹ yeshia ndu ono, e gburu l'ọgu iwhe whẹ ye l'ẹhu, whẹ whụa odzu Sọlu yẹle ụnwu iya g'ọ dabugeeru l'ugvu Gilubowa.

⁹ Whẹ yeta Sọlu iwhe o ye l'ẹhu, gbuta iya ishi, chịkoo ngwọgu iya, bya eyefu ndu ozhi tẹ whẹ je aryakashịa ya l'alị Fílistiya gbaa mgburumgburu nke ọwhu ọgvu whẹ mẹe ndu madzụ l'a-nụ-dzuru iya.

¹⁰ Whẹ woru ngwọgu Sọlu je edobe l'ụlo agwa whẹ, kobe ishi iya l'ụlo agwa, l'eekuje Degọnu.

¹¹ Ndu mkpụkpu Jabẹshi nke alị Giledu nụlewho iwhe ono, ndu Fílistiya meru Sọlu,

¹² unwoke lile, bụ mkparawa lẹ mkpụkpu ono zelihu je apata odzu Sọlu yẹle nke ụnwu iya palata mkpụkpu Jabẹshi. Whẹ lia ọkpu whẹ l'ukfu eze oshi, dụ lẹ Jabẹshi, swịaru whẹ ẹgu abalị ẹsaa.

¹³ Iwhe wotaru ọnwu Sọlu bụ l'o mesweru Onye-Nwe-Ọha. O to goshidu lẹ ya gbarụ tẹ Onye-Nwe-Ọha gude ire iya ẹka nkele o to medu iwhe Onye-Nwe-Ọha sụru t'o mee, tẹmenu l'oojeje njịta l'ẹka ndu maa tẹ whẹ kpozhiaru iya ụzo.

¹⁴ Sọlu te ejejedu tẹ Onye-Nwe-Ọha kpozhiaru iya ụzo. Ọo ya bụ, Onye-Nwe-Ọha gbua ya, o woru alị-eze ono ye Dévidi nwa Jesi l'ẹka.