ɛTitus 1 - ɛWee ne ìTsɛm iHywas

iKyili

¹ ɛWee yɛwoo wo le ɛlɔ ɛBulus, ɛkpuru ɛTaanggbey ne ɛngɔn ne tom ɛYɛso ɛKiriti. Kɛ kasa me i tom me te n phyik ìnang ne itin ninaa ne ɛTaanggbey kɛ kasa, n da tɔɔrek nibhɛ ɛnkiinɛ ne seng itin de ne iphɛ yaa tɔɔrek ɛli ne yaa shɛɛ ishwɛɛ ne ifɛ yaa nang ɛTaanggbey ye irway ihwala,

² lenɛ ne iyɛk ne irway daa ne ibol ne iken ne inat de. ɛTaanggbey ya ne hame ɛ wul irywɛɛk ga kaa ku sim-mɛ ne iken nɛdee wo ɛli ne kɛ tang tum ɛzay ya.

³ Kaa ne sɛ nten nɛ kɛ tuu, ne ɛ phaal itin de ndɔ ne ibol ɛbhɛ. iPhɛ ne nzi ne sanga wo, iphɛ ne kɛ tek me nɛ ne iwɔ nge lenɛ ne boote ɛTaanggbey ɛHaa ne Phɔt Njwɛɛn.

⁴ ɛbhɛ phɛɛs ɛlɔ ɛTitus, ɛngɔn ne itin nge ndɔ ne ìnang ne itin mos. Te izɛɛng gbik ne irway ne laal, ne ifɛ le ɛlɔ ɛTaanggbey ne ɛ so ɛTaa, ne ɛYɛso ɛKiriti ɛHaa ne Phɔt Njwɛɛn shɛɛ ne igyɛ.

ɛTomɛ ɛTitus ne iKop iNɛn ne iKɛrɛt

⁵ Nggɛ tek kɛ ne ikop inɛn ne iKɛrɛt de te ˆɛ ryɔng ɛbyin ɛtomɛ gha ne ɛ kɛ mak ko, te ˆɛ ta yaak nɛ nindiinday ne idira ninaa ne roos ndɔ nigarang nga gbik ɛli ne ngga ku tɔng ngɛ wo.

⁶ Te ɛndiinday ya ne soye ɛnyi ne ɛ sang ɛkɔn ne tok, ɛhaa ɛkuk ɛdaan. ɛNyi nɛ ninɔn ɛbhɛ soye ninaa ne ìnang ne itin, i sang yɛɛ nibhɛ ne igbil, ne sang roos ibol nikyɛɛ.

⁷ ɛNdiinday ne idira ninaa ne roos sa so ɛnyi ne kɛ tek ɛbhɛ ne ɛtomɛ ɛTaanggbey ya ndɔ ne iwɔ ɛbhɛ. iPhɛ ne so nggbinggbing ɛ sang ɛkɔn ne tok ɛlɔ ninyi, sɔng ɛ tɔɔrek igbɔm nang, sɔng ɛhaa ne shii te njenjek nang. Sɔng ɛhaa ne sɔ igbuut ɛ te ziizii nang. Sɔng ɛhaa ne lɛng irywen nang, sɔng ɛhaa ne sim ibuu nang.

⁸ Te ɛndiinday ya yang teye ɛhaa ne say ninaa ne kpoo, ɛhaa ne sim ɛkɔn ɛyɛnɛng. ɛNyi ne ɛ kɛ wum ito ɛbhɛ, ɛhaa ne itin, ɛnyi ne kɛ tul kang, ɛ kɛ ku gbaat ito ɛbhɛ.

⁹ Te ɛndiinday ya soye ɛnyi ne ɛ kɛ wum ibol ɛTaanggbey de ne sɛ kyinak ngɛ wo gɛgɛy, ɛli ne kɛ mɛmɛ ɛbhɛ nɛ wo. Yaa ne lenɛ ɛlɛ wo ne ɛ te ɛbyin ninyi na itsɔngɔl gɛgɛy lenɛ ne imɛmɛ ne itin, ɛ ta i nep ninaa nɛ nibhɛ bok iphup be ne imɛmɛ ne itin da.

¹⁰ Nisas sa sonɛ gbom, nibhɛ so ninaa ivol ɛbuu, ninaa ne luk. Yang ji so ɛguu niYahodawa na nɛ nibhɛ bo wu iphɛ so nggbinggbing i hyɛghɛ icwee da nyɛɛn i kyi sɛ iphɔrɔt da.

¹¹ Nggbinggbing i yɛk nibhɛ nɛ nibhɛ kunggbyak, daa ɛli nɛ nibhɛ suruk ihywɛɛ ne idee de gbom daa ne mɛmɛ ne ɛkɔn na ne ɛ kɛ sang jam lenɛ ne sim iryat ɛbuu.

¹² ɛDɛng ndɔ ninaa ne iKɛrɛt ta ne ɛ kaa soye ɛnɛbi kaa ku boote ɛ yɔngɔ: “Ninyi ne iKɛrɛt ta soye ninaa ne irywɛɛk, nibhɛ so te inyam igywebhe, nibhɛ bok itek, nibhɛ bok idɔphiri.”

¹³ iBol lɛdee wo ne so itin nɛ. iPhɛ ɛlɛy ne ɛ nep nibhɛ gbom tɛ nibhɛ see iling ndɔ ne ìnang ne itin de.

¹⁴ Tɛ nibhɛ kɔɔng nge tenes nggbyɛrɛs niYahodawa da ne ifɛ sang so itin de. Tɛ nibhɛ ta kɔɔng nge roos ikpii ninyi da nɛ nibhɛ mbaray itin de.

¹⁵ ɛLɔ ɛnyi gha ne irway ɛbhɛ da so wɛwɛy yo, gbik nikɔn na ne so wɛwɛy. ɛLɔ ɛnyi gha ne ɛ kɛ teye ɛkɔn ne ishis sa, ɛ ta sang bok ìnang ne itin de sɔng ɛdɛ ɛkɔn na ne so ɛwɛwɛy ɛlɔ ɛbhɛ nang. Daa ɛli ne irway nibhɛ da gbik ne icwas nibhɛ da kɛ ku bees se.

¹⁶ Nibhɛ bo wu nibhɛ i yɛɛ ɛTaanggbey ye, ɛtomɛ nibhɛ gha i ne kyi ton iyɛɛ ɛTaanggbey yeda. Nibhɛ soye ɛkɔn ne ishis, nisang-phok, sɔng nibhɛ kɛ ma yung jam mɛ nibhɛ sɛɛ mɔn ɛkɔn ɛyɛnɛng nga nang.