Titus 3 - New Testament-et Akuzipigestun

Ugpeqat Kiyaghtaalleghqaat

¹ Neqangughtiki ugpeqat malighqutaqesqelluki kavemem igleghutistengitnun, umiilwaaghnunllu. Qaatkutngayaghqaagut, apeghiighngayaghqaagut tamaghhaanun aneghneghqilleghnun.

² Ungipaatiki kina alngunak seghletun akuzitkefqaan, aaghtiiraafqaan pisqelluku. Itupill nekeggmetulluki, qusevegngatulluki pisqelluki tamanganun.

³ Whangkutallu sivunghani nalluyaghtukut, qaatkusigasaghtukut, puughtengngayaghtukutlu. Yugusimta piyukellgha ayghiilluku, itagnaghqusiqluku ayuqsaghaghput. Unguvalleput kiyaghusiqsaghaput seghlepestaaghmun, aqinalleghmunllu. Yuget ugumiksaghiinkut, ugumikusaghtukutlu.

⁴ Iwernga Kiyaghneghem Yugulighistemta liisimakestekaqiinkut nangllegtalleghmineng, piniqelleghminengllu.

⁵ Yugulikaqiinkut apalluqluku nangllegtalleni, nakaan aneghneghqillemteggun. Agleghnalghiignekun Taghneghagnekun ughvuqaqii seghleghqelleput, nutaghamengllu unguvallelitkaqiinkut.

⁶ Kiyaghneghem kuuvegkaqaak Agleghnalghiik Taghneghak kemnapigllukek whangkunnun Jesus Christ‑akun, Yugulighistemteggun.

⁷ Kiyaghneq tawaten pikaaguq piniqilleghmikun nallghusaghnaluta elqughutngalleghminun. Enkaam sighimallelguukut whangkuta piliinnaluku kenlengilnguq unguvalleq.

⁸ Tamaakut pillghet ipanguut. Tamaakut apeghtuusat elpenun sagiqutesqesuganka yugnun qaatkesqelluki. Taagken ugpellelget Kiyaghneghqun aneghneghqipestaaghllequt. Tamaakut aneghneghqillghet pinilghiinguutlu kayutnguutlu tamanganun.

⁹ Iwernga elpek iqitngaluten tamaakuneng temngi qaniqullghiineng, aaghtiiraaghullghiineng sivuneghmeng aatghitneng, Liilightuusanengllu. Tamaana sasiinghituq, kayutngunaanghituq kitumun alngunak.

¹⁰ Kina alngunak aafquutestilghii kelengasaaghnaken ataasimeng nalighmeng alghighluku. Naganneghilkan peggnaken.

¹¹ Liisimakan tawatelnguum yugem ighsakegkaqaa ipapilleq, seghleghqestenguuqlu. Enkaam ellngan katam seghleghqellghan nanqigsaghqaaghtesleqaa aghyuughyaghqaaluku.

Taaqniitet Apeghtughallghet

¹² Aglaghtestekumkun Artemas nalighmeng Tychicus elpenun, Nicopolis‑ennaqeghllaggaaten, qayughllak uksughsugaqunga tamaani.

¹³ Kayusighnaqeghllagnakegken lawyer‑a Zenas, Apollos‑lu igleghalleghqagkenun. Wataghllak yataaghqunnakegken kelqesaghqameng sameng aklukegkagkeneng.

¹⁴ Ugpeqaalgutemta peghqigsaatkellitgu aneghneghqutkaghqaq enkaam kayusighyaqlegughhnakangit aklukegkapilget. Temngi kiyaghtaafqaameng pilit.

¹⁵ Qamaglluteng whangamnilnguut piniqiisinguq. Piniqelleghput aapqaghnaken ugpeqaalgutemnnun piniqistemnnun. Kiyaghneghem quyaslisi qamagllusi.