Titus 2 - New Testament-et Akuzipigestun

Ipapiget Apeghtuusat Ugpeqanun

¹ Iwernga elpek apeghtuusaqiki ugpeqanun ipapiget apeghtuusat.

² Apeghtughqi nuyekliit yuget nuqenneghtusqelluki, siivaknalghiinguluki, sumeghtaghayusqelluki, ayepsugitesqelluki ugpeqilleghqun, piniqilleghqun, nuqenneghtulleghqun.

³ Tawateghpigaq apeghtughqi nuyekliit aghnat kiyaghtesqelluki tuunꞌngaluki Kiyaghneghmun. Seghletun akuzitkesaghqaqenghitiit ilateng, nalighmeng megheghllafqiita wine‑meng. Apeghtughiyaghqaagut pinitun kiyaghtaalleghqameng,

⁴ enkaam peghqighlleqiit uyuqliit aghnat piniqesqelluki ugingitlu avaqutiitlu.

⁵ Sumeghtaghaqegsaghqaagut, pelungisaghqaagut kiyaghtaalleghmeggni, qepghaqegsaghqaagut nemeggni, nangllegtaghyaghqaagut, qaatkusaghqaagut ugimeggnun. Enkaam kitum alngunak seghlequughnaanghitii Kiyaghneghem apeghtuusii.

⁶ Tawateghpigaq qeleghqi nukalpigat nuqenneghtusqelluki.

⁷ Elpek salleghpegun tamaghhaakun, usputaawi ellngitnun aneghneghqilleghpegun. Apeghtughiiqi ipapighqelluten, piraamsiluten.

⁸ Wataghllak apeghtuusaqegkan elqughutngali enkaam kitum alngunak seghlequunghillinkut. Tawaten pikuvek kipullginaaghtet seghletun akuzitkennaanghitiinkut, kipullginaallghitallu kaynguyugtesleqii.

⁹ Apeghtughqi qepghaghtelaaghet qaatkesqelluki piliitestengit, efqughtengngwaaghesqellukillu. Veghusnaghyaghqaqenghitiit,

¹⁰ nalighmeng teglegviksaghqaqenghitiit. Yeghlegi quunpeng pinitun, ataasiighmelluteng piyaghqaqiit. Enkaam salleghmegteggun tamaghhaakun piyuknangllaghlleqiit apeghtuusii Kiyaghneghem Yugulighistemta.

¹¹ Tawaten kiyaghsaghqaagukut qayughllak Kiyaghneghem aliightekaqaa piniqelleni yugulillengesqelluku yuuk tamaghhaan.

¹² Taam piniqellghem apeghtughiinkut pegtesqelluku kiyaghtaalleq Kiyaghneghmun ayuqenghilnguq, ighsakesqelluki nunam yugan piyukellghi seghleghqengngalghiit. Apeghtughiinkutlu nuqenneghtusqelluta, elqughutngaluta, kiyaghtesqelluta Kiyaghneghem piyukellghatun nunami whani.

¹³ Tawaten kiyaghtelta utaqiimaluta quyanalghiimeng sighimalleghmeng. Sighimalqaghput nighughqengngalghii aliilleghqaa Jesus Christ‑am Kiyaghneghllamta Yugulighistemta.

¹⁴ Ellmineng tuunegkaaguq yugulinaluta tamaghhaaneng seghleghqelleghmeng. Tawaten pikaaguq qayughllak pelungighsaghyukanginkut ellminun yuguluta, sagiqluta aneghneghqisqelluta yugnun.

¹⁵ Apeghtuusaqiki tamaakut ugpeqanun. Kiyaghneghem qelghusii atuqluki kayemiki, aghuliightikillu seghletun pingukata. Yeqay kitumun alngunak ukavaghtestegpenang.