Romans 8 - New Testament-et Akuzipigestun

Kiyaghtelleq Taghneghagnekun

¹ Enkaangam kinkut alngunak Christ Jesus‑mun ilatkaakata Kiyaghneghem nanqiggnaanghitii aghyuughyaghqaaluki.

² Qayughllak Liilightuusaan Taghnegham unguvallelitilghiim Christ Jesus‑kun itemutkaqaanga liilightuusaaneng seghleghqellghemllu tuqullghemllu.

³ Moses‑em Liilightuusii tawaten pipagningitut qayughllak yugusimta piyukellghita kayaaleghqegkaqii Liilightuusat. Iwernga Kiyaghneghem pikaqaa Liilightuusat pipagningitkaat. Kayagtekaqaa ellmi katam Ighneni nunamun seghleghqumalghiitun yugtun ayuqluku. Tuunegkaqaa Ighneni aghqutnguluku seghleghqellemnnun. Tawaten nanqigtekaqaa seghleghqelleq yugusimelluku,

⁴ whangkunnun qaatkesaqlegughtesqelluki Liilightuusat elqughutngalghiit qelghusii. Whangkunguut kiyaghlleghhiit malighqutaqluta Taghnegham piyukellghanun, nakaan yugusimta piyukellghitnun.

⁵ Tamaakut kiyaghlleghhiit malighqutaqluteng yugusimeng piyukellghitnun, sumeghtaghaatkengnginaghaqiit piyukelleteng. Iwernga tamaakut kiyaghlleghhiit malighqutaqluteng Taghneghagnun, sumeghtaghaatkengnginaghaqiit Taghnegham piyukellghi.

⁶ Umyugaput malighqutaqegkata yugusimta piyukellghanun, tuqullequkut. Iwernga umyugaput malighqutaqegkata Taghneghagnun, Kiyaghneghem unguvallelilleqiinkutlu nekeggmellelilleqiinkutlu.

⁷ Umyugaput malighqutaqenghata yugusimta piyukellghanun, anguyagwaaqukut Kiyaghneghmun qayughllak qaatkigalkeput Liilightuusii. Ipa qaatkepagningitaput Kiyaghneghem Liilightuusii.

⁸ Tamaakut malighqutaqngalghiit yugusimeng piyukellghanun efqughtepagningitaat Kiyaghneq.

⁹ Iwernga elpesi igleqataqngunghitiisi yugusighpesi piyukellghan. Igleqataqngwiisi Kiyaghneghem Taghneghagkenka, qayughllak ipa kiyaghtengngulghii ilugpesini. Christ‑am Taghneghakek kiyaghtengngunghilkayek ilungani yugem, pikenghitaa Christ‑am.

¹⁰ Yugusisi tuqunaqnguut apalluqluki seghleghqellesi. Iwernga Christ‑a kiyaghtengngukan ilugpesini, taawa Taghnegham unguvallelilleqiisi, qayughllak Christ‑am nallghusaghtestekaqiisi Kiyaghneghem elqughutngallghanun.

¹¹ Kiyaghneghem Taghneghakek unguvaghtikak Jesus‑meng, kiyaghtengnguuk ilugpesini. Katam Kiyaghneghem unguvaghtestellghatun Christ Jesus, unguvaghtesleqii yugusisi Taghneghagmikun kiyaghlleghhiignekun ilugpesini.

¹² Enkaangam ugpeqaalgutemni, kiyaghsaghqaagukut Kiyaghneghem Taghneghagkenka kiyaghtesqesullghatun, nakaan yugusimta kiyaghtesqesullghatun.

¹³ Kiyaghtengngukufsi malighqutaqlusi yugusighpesi piyukellghanun, tuqullequsi. Iwernga Taghneghagnekun tuquskufsiki yugusighpesi seghleghqengꞌngalghiit piiqegkangit, taawa kiyaghllequsi.

¹⁴ Qayughllak tamaakut maghyaghquqii Kiyaghneghem Taghneghagkenka Kiyaghneghem avaqutaqii.

¹⁵ Taghnegham allgeghtekaghpesi Kiyaghneghmeng qepghaghtelaaghughtesneqiggnaanghitiisi alingelleghmun. Yeghlegi Taghnegham Kiyaghneghmun avaqutaqestiisi. Enkaam ellngakun tuqlughaghaghput Kiyaghneq, “Abba! Ataay!”

¹⁶ Kiyaghneghem Taghneghakek ellmegneng ilatkaaguk taghneghamnnun ungipaannaluta Kiyaghneghmun avaqutaqniluta.

¹⁷ Kiyaghneghem avaqutaqutanganeng, Kiyaghneghem pagitistekiinkut, Christ‑amllu pagitistelgutkiinkut. Nighughqellengellequkut Christ‑atun ikfiqegkumta Christ‑am ikfiqellghatun.

Kiyaghneghem Taghneghagkenka Kayusighiinkut

¹⁸ Sumemni ikfiqelleput unguvallemnni inglutepagningitut nighughqelleghmun Kiyaghneghem aliighsaghqaanun whangkunnun.

¹⁹ Ulimaaq qamaglluni utaqiinguuq qelanellelighluni Kiyaghneghmun aliightesqelluki kinkungutangi avaqutii.

²⁰ Kiyaghneghem nanqigtekaqaa ulimaaq aghyughyaghqaaluku enkaam atuunanightestaa. Ulimaaq nanqigtesunghitkaaguq, iwernga Kiyaghneghem tawaten piyukegkaqaa. Naqamllu paninang sighimallelguuq

²¹ qayughllak ataasimi aghneghmi Kiyaghneghem itemulleqaa ulimaaq aghulleghmeng. Taagken ulimaaq ilallequq itemngalleghllagitnun Kiyaghneghem avaqutiitnun.

²² Liisimakaghput whavemun kenlanga iingunaghmi ulimaaq ngillegtengnguuq aqnighqellghatun ighniyulghiim.

²³ Iwernga ulimaaghhiinaanghituq ngilleglleghhii, whangkutallu ngillegtengnguukut. Whangkunguukut Agleghnalghiigneng Taghneghagneng pilegni Kiyaghneghem tunusaqsugwhaagha whangkunnun. Ngillegtengnguukutlu ilumteggun utaqiimaluta Kiyaghneghmun allughqisqelluta avaqutaaluta ellnganun, itemutesqellukillu yugusiput seghleghqelleghmeng.

²⁴ Taaggun sighimalleghqun yugulikaagukut. Iwernga allgeghsimakumteggu sighimakegkaghput, taawa sighimallghunghituq. Yuget sighimangigatut sameng allgeghtengngwaaqameggneng.

²⁵ Iwernga sighimamakumta sameng allgeghtekaqenghilkemnneng, utaqalleqaghput qelaneghpenaamta.

²⁶ Tawateghpigaq Taghnegham kayusighaqiinkut kayaatellemnni, qayughllak nallukelghiikut naten yughalleghqaqsaqemtestun. Iwernga Taghnegham ellmineng katam yughaataqiinkut Kiyaghneghmun ngillegtelleghllagkun akuzitngunaan.

²⁷ Kiyaghneghem liisimakii yuget sumeghtaghallghit. Liisimakiillu sumeghtaghallghi Taghnegham, qayughllak Taghnegham yughaatkaqii yugi Kiyaghneghem piyukellghatun ayuqluki.

²⁸ Liisimakaghput Kiyaghneghem sangwaat qamaglluki qepghaghtestaqii qerngiita pinighqelleghqiitnun piniqistemi. Ellnginguut tuqluqii uspeqelleghmitun.

²⁹ Tamaakunguut Kiyaghneghem nakmikekestaqii. Aaftekaqiillu Ighneghmitun lliighesqelluki. Tawaten pikaaguq Ighneni allgeghyuwhaaghumasqelluku anglegutelghutanganeng.

³⁰ Enkaam Kiyaghneghem aaftekani tuqluqaqii. Tamaakutlu tuqluqani nallghusaqaqii elqughutngalleghminun. Tamaakutlu nallghusaqani elqughutngalleghminun quulvaqaqii.

Kiyaghneghem Piniqellgha Christ Jesus‑kun

³¹ Samengꞌngam pinaqesteggu una? Kiyaghneq whangkunnun ayuqngukan, kitumngam tengvimun pilleqinkut?

³² Ighlekumangitaa ellmi katam Ighneni; itupill tuunegkaqaa aghqutnguluku tamaghhamnnun! Kiyaghneghem tuunumakanginkut Ighneghmineng, taawa ellngakun ighlegpenani tuunelleqiinkut sameng tamaghhaaneng.

³³ Kitumngam anaggunnilleqaki Kiyaghneghem nakmikegkii yuget? Kiyaghneghem ellmineng katam anaggutellghinnikaqii!

³⁴ Kinangam pilleqa Kiyaghneghem yugi nanqigsaghqaaniluki aghyuughyaghqaaluteng? Christ Jesus‑em pilleqaguu? Nakaa, qayughllak ellnganguuq tuqumatkikaq whangkunnun, unguvaghtekaaguqlu tuqulleghmeng. Maaten yughaatkaqiinkut aqumluni aghenqigneghani Kiyaghneghem.

³⁵ Saamngam iqitesleqinkut piniqellghaneng Christ‑am? Seghleliillghaam, piyaqliillghaam, amyuqetaatkellghaam, paneghniqellghaam, aklumallghaam, yakughnaam, nalighmeng tuqutellghaam?

³⁶ Igaqngaaq Akuzitni Igaqegkani whaten, “Elpek apalluqluten aghhutanga tamaghhaan yuget tuqusugaqiinkut. Sumeghtaghalleghmeggni penniighestun ayuqniiqiinkut tuqusaghqat.”

³⁷ Iwernga tamaakut qamaglluki kayaalqengngwaaqaqaput Christ‑akun piniqistemteggun.

³⁸ Liisimakngwaaghaqa saam alngunak iqitesnaanghitiinkut Kiyaghneghem piniqellghaneng: talwa tuqullghem, unguvallghem, yaqulget, nalighmeng tughneghaat. Talwa sangwaa saghngaan aghneghmi nalighmeng sivumi agani, nalighmeng aghtughyaghqaanghillghet.

³⁹ Talwa sangwaat qulemnni nalighmeng asimnni. Ulimaaghmi iqitestiyaghqaqraggiituq whangkunneng Kiyaghneghem piniqellghaneng Christ Jesus‑kun Atanemteggun.