Romans 7 - New Testament-et Akuzipigestun

Ugpeqatlu Liilightuusatlu

¹ Ugpeqaalgutemni, lataamsi liisimakilghiini Liilightuusaneng. Enkaam liigikasi Liilightuusat qelghaqiit yuget kiyaghtengnguluki.

² Ugiiqaq aghnaq usputaaguq. Liilightuusam qelellghani aghnaq ugiminisaghqaaguq tagtalngatun ugimi kiyaghtellghan. Iwernga tuqukan ugini, taawa itemellequq Liilightuusaaneng nengughtellghem.

³ Iwernga, ugini unguvaluku allami yugmi kiyaghtekumi gelgaghniightenguluni atighyaghqaaguq. Iwernga uginga tuqumakan, itemellequq taagken Liilightuusameng. Gelgaghniighunghituq ugiinqigtekumi.

⁴ Ugpeqaalgutemni, elpesillu itemumaasi Liilightuusaneng qayughllak tuqukaagusi Christ‑ami. Tamaaken apalluqluku Christ‑am pikiisi. Ellnganguuq Kiyaghneghem unguvaghtekaa tuqulleghmeng, whangkunnun qepghaatesqelluku Kiyaghneq.

⁵ Sivunghani qaatkaqaput seghleghqengngalghiit piyukellghi yugusimta. Liilightuusat atuqistesugaqiinkut tamaakuneng. Enkaam atuqegkumteki tuqusleqiinkut.

⁶ Sivunghani anusimingllaghastun ayuqsaghtukut Liilightuusanun. Tuqukaatemnneng Christ‑ami, itemutkaagukut qaatkusaghqaallemnneng Liilightuusanun. Enkaam qepghaatngwaaghput Kiyaghneq unguvalleghraghamteggun Taghneghagnekun, nakaan unguvallelumteggun Liilightuusatgun.

⁷ Samengꞌngam pilleqesta? Liilightuusaat seghleghqellghwaat? Yeghlegillu! Taakut Liilightuusat liitestekaqii whangamnun seghleghqellghet sangutangi. Liinnayanghitaqa qiliiqetiqelleq sangutanga Liilightuusaq whaten qelghimangisaqan, “Qiliiqetiqegpenang.”

⁸ Iwernga atuqluku taana qelghusaq, seghleghqellghem allaaghhiinaghneng qiliiqetangllaqaqaanga. Liilightuusangunateng seghleghqellghet tuqungaat.

⁹ Sivunghani kiyaghtengnguyaghtunga Liilightuusangunaan; iwernga liisaqegka taana qelghusaq, seghleghqelleq unguvaghluni enkaam tuquunga.

¹⁰ Qelghusaq unguvastiyaghqaayalghii whangamnun, yeghlegi tuqustaanga.

¹¹ Taaggun qelghusakun, seghleghqellghem puughsaqlegughtaanga. Enkaam atuqluku qelghusaq seghleghqellghem tuqutaanga.

¹² Iwernga Liilightuusat agleghnalghiinguut, qelghusaqlu agleghnalghiinguuq, elqughutngaaqlu, pinightuqlu.

¹³ Taam qelghusam pinilghiim, tuqustangaa? Yeghlegillu! Seghleghqellghem tuqutaanga atuqluku sangwaa pinilghii. Enkaam liitaghput qelghusakun seghleghqelleq elngaatall seghlepiguuq.

Pingigataqa Piyukelqa

¹⁴ Liisimakaput Liilightuusat Kiyaghneghem Taghneghaaneng pinguut, iwernga maghyaghquunghitaanga Taghnegham. Maghyaghquungwaanga yugusima piyukellghan, enkaam qepghaghtelaaghuunga seghleghqelleghmun.

¹⁵ Liigikigataqa saaqutka qayughllak atuqigataqa sangwaa atuqsukaqa. Itupill atuqaqaqa sangwaa ugumikegkaqa.

¹⁶ Iwernga atuqegkumki ugumikegkanka atuqsunghiteghngaamki, taawa itagnaqaqanka Liilightuusat piniitangi.

¹⁷ Enkaam whangangunghituq tawaten piiqelghii, itupill seghleghqelleq ilumnilnguq tawaten piiquq.

¹⁸ Liisimakaqa avangitunga pinilghiimeng ilumni, yugusimni. Pinitun piyugaqsaghngaaghma, pipagningitaqa.

¹⁹ Pingigataqa pinilghii piyukegkaqa, yeghlegi seghleq piiqaqa piyukenghitkaqa.

²⁰ Enkaam piyukenghitkaqa pinemkun, taawa whangangunghituq tawaten pilghii. Itupill seghleghqellghwaaquq ilumnilnguq tawaten piiqelghii.

²¹ Enkaam liitaqa taana: pinitun pinaqeghngaghma, paninang seghleq tawantaquq.

²² Qaamkerugllak pinighyuugusiqanka Kiyaghneghem Liilightuusii.

²³ Iwernga liitaqa taawa ilanga liilightuusaq yugusimnituq. Pilluwaqangi Kiyaghneghem Liilightuusii umyugama itagnaqegkii. Liilightuusam yugusimnilnguum seghleghqestaqaanga, enkaam anusimingllaghastun ayuqunga taamun liilightuusamun.

²⁴ Seghleghwaaghuunga! Kitumngam itemulleqanga whaken yugusimeng tuqustiyaghqameng whangamneng?

²⁵ Iqamsiqanaghhalek Kiyaghneghmun itemuskanganga Jesus Christ‑akun Atanemteggun! Enkaangam qaatkanka Kiyaghneghem Liilightuusii umyugamkun, iwernga yugusimkun qaatkaqa liilightuusaq seghleghqestilghii whangamneng.