Romans 6 - New Testament-et Akuzipigestun

Tuqulleq Seghleghqelleghqun Iwernga Unguvalleq Christ‑akun

¹ Samengꞌngam pilleqesta? Seghleghqumanginaaltaa‑a Kiyaghneghem nangllegtallgha nulasqelluku?

² Nakaa! Qayughllak tuqukastun ayuqukut, enkaam tuqukaakumta naten seghleghqumanginaghnaqesta?

³ Liisimakaghsi, qamaglluta paaptaayaaqngamta ilatkaagukut Christ Jesus‑mun. Ilatkaagutkutlu tuqullghanun paaptaayaaqngamta.

⁴ Paaptaayellemteggun tuqukaagukutlu qunguqaagukutlu Christ‑ami. Aghtughyaghqaanghilleghllagmikun Atam unguvaghtekaqaa Christ‑a tuqulleghmeng. Enkaam kiyaghsaghqaaghllequkut kiyaghtaallelighraghaghluta.

⁵ Kiyaghneghem ilasimakanginkut Christ‑amun tuqullghakun, taagken ilatestepestaaghlleqiinkutlu ellnganun unguvaghtesluta ellngatun.

⁶ Liisimakaghput whangkuteluguyalghiit qaquuraatkaagut Christ‑akun igleqataqnaniisqelluta seghleghqellghem aghtughyaghqaanghillghanun, qepghaghtelaaghunanighnalutallu seghleghqelleghmun.

⁷ Yuuk tuquneghmini itemaquq aghtughyaghqaanghillghaneng seghleghqellghem.

⁸ Tuqumakumta Christ‑ami, ugpeqaghput kiyaghtelgusighyaghqaqaghputlu ellnga.

⁹ Liisimakaghput Christ‑a unguvaghtestekaaguq tuqulleghmeng enkaam allamengllu tuquyaghqaanghituq qayughllak tuqulleq aghtughyaghqaanghillghiitkaaguq ellnganun.

¹⁰ Ataasighhaghmeng tuqukaaguq kayaalqennaluku seghleghqelleq. Iwernga unguvatmineng, kiyaghtengnguuq Kiyaghneghmun.

¹¹ Tawateghpigaq sumeghtaghaghtek tuqukaalusi seghleghqellghem aghtughyaghqaanghillghanun, sumeghtaghaghteklu unguvangulusi Kiyaghneghmun Christ Jesus‑kun.

¹² Tamaaken apalluqluku seghleghqelleghmun igleqataqestegpenaki yugusisi tuqukayuget. Seghleghqellghem igleqataqegkaki yugusisi, qaatkesuglleqasi yugusighpesi seghleghqengngalghiit piyukellghi.

¹³ Alngunak nalighneghi yugusighpesi tuunegpenaki seghleghqusiiluki, qayughllak tawaten pikufsi tuunelleqasi seghleghmun. Itupill tuunitek Kiyaghneghmun. Tuqukastun ayuqsaghtusi, iwernga Kiyaghneghem unguvaghtekaqiisi. Enkaam tuuniteki iinguniita yugusisi Kiyaghneghmun ellnganun atuqesqelluki elqughutngalleghmun.

¹⁴ Seghleghqellghem igleqataqnaanghitiisi qayughllak igleqataqngwiisi Kiyaghneghem piniqellghan; igleqataqngunghitiisi Liilightuusat.

Qepghaghtelaaghi Elqughutngallghem

¹⁵ Enkaam sanaqestangam? Itagnaghtaa‑a seghleghqelleghqaghput qayughllak Kiyaghneghem piniqellghan igleqataqngukanginkut nakaan Liilightuusat? Nakaa, itagnanghituq!

¹⁶ Liisimakaqusi tuunegkufsi kitumun qaatkesaghqaaluku, taawa ellngan qepghaghtelaaqaaghlleqiisi. Qaatkegkufsigu seghleghqelleq, tuqusleqiisi. Iwernga qaatkegkufsigu Kiyaghneq, nallghusaghlleqiisi elqughutngalleghminun.

¹⁷ Qepghaghtelaaghuyaghtusi seghleghqelleghmun. Iwernga iqamsiqayugvikaqa Kiyaghneq qayughllak maaten qamakerugllak qaatkegkesi apeghtuusaghraghaat apeghtuusaqegkat elpesinun.

¹⁸ Itemutkaagusi seghleghqelleghmeng enkaam qepghaghtelaaghughtekaagusi elqughutngalleghmun.

¹⁹ Tamaakut liigikneghllugutangitneng elpesinun, usputaqngwaanka qepghaghtelaaghetlu piliitestengitlu. Sivunghani tuunegkayuguyaghasi yugusisi qepghaghtelaaghuluki nukeggnalghiinunllu nulamanginalghiinunllu seghletun pilleghnun. Maaten tuuniteki yugusisi qepghaghtelaaghuluki elqughutngalleghmun kiyaghtesqellusi pelungillusi.

²⁰ Qepghaghtelaaghwaaqngafsi seghleghqelleghmun, elqughutngallghem igleqataqellghitiisi.

²¹ Sivunghani seghletun pikaagusi, iwernga maaten kayngukaaghtasi tamaakut seghletun pikasi. Sangaawa allgeghtekaghsi tamaakut piluki? Allgeghtekaqaghsi tuqullghinaghhaq.

²² Iwernga maaten itemullusi seghleghqelleghmeng qepghaghtelaaghughtekaagusi Kiyaghneghmun. Enkaam Kiyaghneghem pelungiightesimiisi, allgeghutesimiisillu kenlengilngughmeng unguvalleghmeng.

²³ Akileghtuusaa seghleghqellghem tuqullghuuq; iwernga Kiyaghneghem akingilnguq tunusaa kenlengilnguuguq unguvalleq Christ Jesus‑kun Atanemteggun.