Romans 2 - New Testament-et Akuzipigestun

Kiyaghneghem Nanqigtillgha

¹ Tamaaken apalluqluku nanqigtikuvek yugneng anagniilqavigituten. Nanqiggneghpeki, elpeneng nanqigtaquten aghyuughyaghqaaluten qayughllak elpeklu ellngistun piiqelghiiten.

² Kiyaghneq nanqigtiiquq yugneng seghlepestaatun pilghiineng, liisimakaghputlu nanqigtillghi elqughutngaat.

³ Iwernga nanqigtaqaten anaggullghiit, naqamllu elpek katam piiqaten tamaakut ataasit anaggutellghet. Enkaam sumeghpenii anagyaghqaaniluku piziguu Kiyaghneghem nanqigtillgha?

⁴ Liigikenghisiguu nangllegtaghtulanga Kiyaghneghem? Aghyuughaghsigalkangaten tawaninginaq qayughllak nuqetutaqegkangaten. Sumeghpenii‑i taakut satngunghitaat? Liisimakenghisiguu Kiyaghneghem nangllekaqegkangaten qayughllak avuteghqesqesukangaten?

⁵ Iwernga elpek aleghquneghlluguuten, pineghlluguuten; tamaaken apalluqluku avuteghqesugigatuten. Enkaangaam elpek katam ulimangwaan aghyuullengelleghqan seghleghataghaaluku Nanqigtillghem Aghneghani. Tawani Aghneghmi Kiyaghneghem aliighlleqaak sakraallenillu, elqughutngalghiillu nanqigtilleni.

⁶ Nanqiglleqii tamaghhiita yuget apeghiighutellghistun.

⁷ Ilangi yuget pinitun pimanginaghaqut qayughllak Kiyaghneghmeng allgeghsukangit usuqelleq, quulvalleq, yugusiqlu tuquyaghqaanghilnguq. Enkaam Kiyaghneghem kenlengilngughmeng unguvallelilleqii.

⁸ Iwernga ilangi yuget ellnginaayugneghuut. Ugpeqsugigataat ipapilleq seghlepestaatun pinaluteng. Enkaam Kiyaghneghem sakrituteghllagluki, aghyuughllaglleqii.

⁹ Qamagtengngwaaghluni nunamelnguq yuuk, Jews‑a nalighmeng Gentile‑a, seghlepestaatun pikaq, Kiyaghneghem aghyuughlleqaa seghleliighmengllu ikfiqelleghmengllu.

¹⁰ Iwernga qamagtengngwaaghluni yuuk, Jews‑a nalighmeng Gentile‑a, pinitun pikaq, Kiyaghneghem usuqelleqaa, quulvaghlleqaa, nekeggmellelilleqaallu.

¹¹ Taniillngunaki Kiyaghneghem nanqiglleqii qamagtengngwaaghluki yuget.

¹² Gentile‑et allgeghtellghitiit Liilightuusat Kiyaghneghem tuunegkii Moses‑mun. Enkaam seghleghqelghiit nallukluki Liilightuusat, tuqukata Kiyaghneghem nanqiggnaanghitii Liilightuusatgun. Jews‑et Liilightuusalguut, enkaam seghleghqegkata Kiyaghneghem nanqiglleqii Liilightuusatgun.

¹³ Tamaakut nagataghesnalghiit Liilightuusaminun, Kiyaghneghem nallghusiigatii elqughutngalleghminun. Iwernga qaatkullghiit Liilightuusaminun nallghughqaqii elqughutngalleghminun.

¹⁴ Gentile‑et allgeghtellghitiit Kiyaghneghem Liilightuusii. Iwernga qaatkenneghmegteki taakut Liilightuusat, qaatkutellghita Liilightuusalgestun ayuqestiit ilumegteggun, allgeghtekaqenghiteghngaaghmegteki.

¹⁵ Qaatkutellghita yugnun liigikestiit ilumegteggun liisimakiit Liilightuusat qelghusiit. Sumeghtaghallghitallu liisimakestiit Liilightuusat ilungitnitulangi, qayughllak sumeghtaghallghita ilangakun anaggunniiqiit nalighmeng ilangakun itagnaghniiqiit.

¹⁶ Nanqigtillghem Aghneghani, Kiyaghneghem nanqiglleqii yuget aksaqegkiit Christ Jesus‑kun. Aapghaqaqa taana ungipaqnemki Pinilghiit Ungipat.

Jews‑etlu Liilightuusatlu

¹⁷ Maatenꞌngam latayuganka Jews‑et. Jew‑ngukuvek, neghyukaten Liilightuusat Kiyaghneghem tuunegkaqii yugpenun. Qukaayugtutenllu Kiyaghneghmun pikniluten.

¹⁸ Liilightuusatgun liisimakan sangwaa Kiyaghneghem sasqesullgha elpenun, natenllu nakmiksaghqaatanga sangwaa elqughutngalghii.

¹⁹ Enkaam sumeghpeni maghyaghqughtenguniiquten ayaakanun, nighuguniiqutenllu mamlegmelngughnun.

²⁰ Sumeghpeni nallghusaghtenguniiquten nalluuqanun, apeghtughistenguniiqutengllu taghnughhaghnun. Liilightuusalgutegpeneng, sumeghpeni liisimakniluku sangwaa tamaghhaan piiqan, qamagllukullu ipapilleq.

²¹ Apeghtughaqaten ilaten, sangan elpeneng apeghtiigasin? Ungipaqiiquten, “Teglegpenang,” elpaa‑ak, teglekiigasiin?

²² Piiquten, “Gelgaghniighpenang,” elpaak, gelgaghniiqiigasiin? Ugumikepigtaten kiyaghnengllaqat, elpaak, tugunniiqiigasiin temple‑ngitneng?

²³ Qukaayugtaquten qayughllak Kiyaghneghem Liilightuusani tuunegkaqii yugpenun. Iwernga qaatkenghinneghpeki Liilightuusat quulviigatan Kiyaghneq.

²⁴ Akuzitni Igaqegkani igaqngaaq, “Apalluqlusi elpesi Jews‑eni, Gentile‑et sanguughtaqaat Kiyaghneghem aatgha.”

²⁵ Qaatkengngukufki Kiyaghneghem Liilightuusii circumcise‑ellghen pinightuq. Iwernga qaatkenghilkufki Liilightuusat circumcise‑ellghilngughestun ayuquten. Enkaam quyastellengnaanghituten Kiyaghneghem akequsaaneng.

²⁶ Gentile‑a circumcise‑ellghilnguq qaatkullghii qelghusiitnun Liilightuusat, Kiyaghneghem tuguklighlleqaa nikimqun circumcise‑ekaaluku.

²⁷ Elpesi Jews‑eni Liilightuusalguusi igaqngalghiineng, circumcise‑ekaagusillu, taawanginaq qaatkigatasi Liilightuusat. Iwernga Gentile‑et circumcise‑ellghilnguut, qaatkaqiit Liilightuusat. Enkaam qaatkutellghitgun Kiyaghneghem nanqiglleqiisi aghyuughyaghqaalusi.

²⁸ Circumcise‑enginaghluku yugem yugusii Jew‑pigughtesnaanghitaa. Circumcise‑ellepiik pingigatuq yugusim qaaynginaakun.

²⁹ Itupill, yuuk Jew‑piiguuq Jew‑ngukumi ilumikun. Ighsaqghwa circumcise‑ekaaguq Agleghnalghiignekun Taghneghagnekun, nakaan igaqegkatgun Liilightuusatgun. Enkaam Kiyaghneghmeng usuqellengellequq, nakaan yugneng.