Romans 13 - New Testament-et Akuzipigestun

Qaatkelluki Aangwaaghet Igleghutilghiit

¹ Tamaghhaghmi qaatkusaghqaaguq aangwaaghughtekanun igleghutistenun. Kina alngunak igleghutistengunaanghituq wetkuqun Kiyaghneghem igleghutistengughtestekumigu. Igleghutistenguut qayughllak Kiyaghneghem nekegtekaqii igleghutisqelluki.

² Kitum alngunak qaatkenghilkumiki igleghutistet, qaatkigatii Kiyaghneghem nakmikegkii. Enkaam aghyuughteslequq.

³ Pinitun pikayuget alikigatiit igleghutistet, iwernga seghletun pikayuget aliksaghqaqiit. Aliksunghilkufsiki igleghutistet, pinitun pitek, enkaam usuqelleqiisi.

⁴ Igleghutistet Kiyaghneghem qepghaghtekii aneghneghqelleghqaghpesinun. Iwernga seghletun pikufsi, aliknakesi, qayughllak Kiyaghneghem qelghumii aghyuughesqelluki seghletun pikat. Kiyaghneghem qepghaghtekii, aghyuughistekiillu seghletun pilghiinun.

⁵ Tamaaken apalluqluku qaatkiteki igleghutistet. Qaatkiteki qayughllak Kiyaghneghmun aghyuughtesunghilnguusi. Iwernga taananginaq apalluunghituq. Qaatkiteki qayughllak liisimakaghsi qaatkutelleq elqughutngaaq.

⁶ Taakuklu apalluqlukek llivikaqasi tax‑esi, qayughllak igleghutistet qepghaagut Kiyaghneghmun qepghaqaten pineghmegteki.

⁷ Enkaangam tax‑et asengesi qamaglluki llivikiteki igleghutestegpesinun. Siivakitekillu quulvaghtekillu qamaglluki.

Piniqluki Ilasi

⁸ Asengegpenaan kina alngunak, iwerngaqun piniqelleghsi asengeknginaghteggu ilagpesinun. Kitum alngunak piniqegkumiki yulgutni qaatkengngwii iinguniita Liilightuusat.

⁹ Igaqngaat Liilightuusani whaten, “Gelgaghniighpenang, Yugtaghpenang, Teglegpenang, Qiliiqetiqegpenang.” Qaatkelleqaten taakut qelghusat, alngunaklu qelghusat, qaatkegkuvgu una qelghusaq: “Piniqluku yulguten piniqelleghpetun elpeneng.”

¹⁰ Kina alngunak piniqikumi yulgutmineng, seghletun pinaanghitii. Piniqilleghmikun qaatkutnguuq iinguniitnun Liilightuusat.

¹¹ Tamaakut piteki qayughllak liisimakaghsi pilleghqaq kaasimaaq. Qavalghiistun ayuqusi iwernga maaten taghtughyaghqaaghtusi. Yugulilleghput tughaaghtuq ugpeghyuggaallemnneng.

¹² Unuk alpagyaghtughtuq, whaa aghsaghtungestaghaa. Taaqeltekingam atuqneghmeng seghleghet yuget piiqegkangit mamlegmi. Enkaam tugulteki pilluwaasighqat nighugmi.

¹³ Pinitun kiyaghtelta katam yugestun kiyaghlleghhiit nighugani aghneghem. Seghletun teghigniqefqaamta, suumefqaamta, alngunak sex‑kun seghleghqefqaamta, pilluwutefqaamta, aqinatefqaamta.

¹⁴ Itupill akulghaaghestun aateggu Ataneq Jesus Christ‑a, sumeghtaghaatkefqiitallu atuqnaluki yugusighpesi piyukellghit.