Romans 12 - New Testament-et Akuzipigestun

Unguvalghiit Aghqutet

¹ Ugpeqaalgutemni, Kiyaghneq nangllegtapigtutanganeng, elngaatall kayemamsi tuunesqelluki yugusisi Kiyaghneghmun unguvalghiinguluki aghqutet. Pelungillit, tuguklighyugnaghlitlu Kiyaghneghmun. Taananguuq maniguutellepigsi.

² Uum nunam yugatun kiyaghtegpenasi. Yeghlegi Kiyaghneghmun allangughtestek nutaghtesluki umyugasi. Taagken liigikelleqaghsi piyukellgha Kiyaghneghem pinilghii, tuguklighyugnalghii, qamagtiingwaaghngalghiillu.

³ Kiyaghneghem tuunegkaqutanganeng tunusameng apostle‑ngulunga, tamaghhaghpesinun piinga: Sumeghtaghaatkegpenasi elpesineng pinighataghaghnilusi ayuqelleghpesineng. Yeghlegi ipapighqellusi sumeghtaghaatkaqitek ugpeqilleghtulegpesigun Kiyaghneghem tuunegkaakun elpesinun.

⁴ Yugusiput nalighneghtupigtut, tamaghaghmi nalighneq allatun sayaghqaaguq.

⁵ Uglaghyaghngaamta, ataasigukut Christ‑am yugusiini. Enkaam whangkuta nalighneghni whangkunneng pikutukut.

⁶ Qamaglluta allakullghiineng tunusalguukut Kiyaghneghem tuunegkaaneng nangllegtalleghmikun. Tunusaghput ungipaqingukan Kiyaghneghem ungipaaneng, ungipaqilta ugpeqilleghtutalemtestun.

⁷ Tunusaghput qepghaatingukan, qepghaatilta, apeghtughingukan, apeghtughilta;

⁸ kayemingukan ilameng, kayemilta; tuuningukan, ighlegpenaamta tuunilta; igleghutingukan, sagiqluta igleghutilta; nangllekingukan, quyakusiqluku nangllekilta.

⁹ Piniqitek ipapighqellusi. Ugumikluku seghleq, piyukumanginaghteggu sangwaa pinilghii.

¹⁰ Piniqututek anglegutkullghiistun. Quulvaatutaqitek pakiggulluku quulviisqesulleghpesineng.

¹¹ Taakunginaghhaagneng qepghaghtek, ighsanifqaafsi. Sagiqulluku qepghaataqiteggu Ataneq qamaken ilugpesineng.

¹² Quyangatek qayughllak sighimallelguusi, nuqetaqitek nekeggmellusi seghleliineghpesini, yughaghaqiteklu iiwleng.

¹³ Ugpeqaalgutegpesinun aklulghiinun tuuniiqitek, upughatiiqitek kinkuneng alngunak.

¹⁴ Yughaatkaqiteki amyuqetaatkistesi Kiyaghneghmun quyastesqelluki, nakaan aqnightesqelluki.

¹⁵ Quyalgusighaqiteki tamaakut quyalghiit, qiyalgusighaqiteki tamaakut qiyalghiit.

¹⁶ Kiyaghtek nekeggmetullusi. Qukaayugtegpenasi yeghlegi ilakiteki ukavantalghiit. Sumeghtaghaatkegpenasi peghqinghunilusi ilagpesineng.

¹⁷ Kitum seghletun pikangisi, akitegpenaki seghletun. Piiqiteki pinilghiit tuguklighyugnalghiit tamaghhaanun.

¹⁸ Piyaghqaakan, piiqiteggu sangwaa piyaghqaghsi kiyaghtesqellusi nekeggmellusi tamaghhaanun.

¹⁹ Piniqegkamni, akiniighnaqegpenaki seghletun pistesi, itupill pegteki Kiyaghneghem sakraallghanun. Akuzitni Igaqegkani igaqngalghii whaten, “Whanganguuq aghyuughiyaghqaq, whanganguuq akiniighyaghqaq, piiq Ataneq.”

²⁰ Igaqngaaqlu Akuzitni Igaqegkani, “Anguyagen iyataangukan neghesnaken, meqsugukan meghsinaken. Tawaten pikuvgu naasqwakun mayughfikelleqan kumangalghiimeng coal‑meng.”

²¹ Kayaalqestegpenasi seghleghmun, itupill kayaalqiteggu seghleq pinitun pilleghqun.