Romans 10 - New Testament-et Akuzipigestun

¹ Ugpeqaalgutemni, qamagun ilumkun piyukepigtaqanka whanga katam yugenka Jews‑et yugulillengesqelluki! Elngaatall Kiyaghneghmun yughaatkaqanka!

² Whaten piighhnaqanka yugenka: Qepghaasupigtaqaat Kiyaghneq iwernga liigikigataat naten Kiyaghneq qepghaatesugaqutni ellngitnun.

³ Liigikellghitaat naten Kiyaghneghem nallghusaghaqutangi yuget elqughutngalleghminun. Enkaam elqughutngangllaghnaqutkaqut qaatkelluki Liilightuusii. Tawaten pilleghmegteggun tugukliigataat Kiyaghneghem elqughutngallgha.

⁴ Christ‑a kenlekaat Liilightuusat. Enkaam tamaghhaghmi ugpeqillelek Kiyaghneghem nallghusaghlleqaa elqughutngalleghminun.

Yugulilleq Tamaghhaanun Pinguuq

⁵ Moses igaqaaguq Kiyaghneghmeng nallghusaghilghiimeng yugneng elqughutngalleghminun qaatkutellghitgun Liilightuusanun. Whaten igaqegkaqaa, “Yugem qaatkumakaki Liilightuusat, taakutgun kiyaghllequq.”

⁶ Iwernga nallghusaqaq Kiyaghneghem elqughutngallghanun ugpeqilleghqun, qelqaaguq, “Aaptegpenang, ‘Kina mayughlleqa qilagmun?’” (ukiggnaluku Christ‑a nunamun).

⁷ Nalighmeng aaptegpenang, “Kina ukiglleqa Abyss‑mun?” (mayuunnaluku Christ‑a tuqumeng.)

⁸ Akuzitni Igaqegkani whaten igaqngaaq, “Kiyaghneghem ungipaa qantaghantuq elpenun. Akuzitkelleqan qaneghpegun, ugpeqelleqanllu ilugpegun.” (Kiyaghneghem ungipaa ugpeqilleghmeng ayuqelghii, taananguuq ungipaqegkefut.)

⁹ Aapquvgu qaneghpeneng, “Jesus Atanghuniluku,” ilugpenengllu ugpeqegkuvgu Kiyaghneghmun unguvaghtesimaniluku tuqulleghmeng, yugulillengellequten.

¹⁰ Yuuk ugpeghtuq ilumikun, enkaam Kiyaghneghem nallghusaghaa elqughutngalleghminun. Aapghaallu qaneghmikun ugpeqegkani, enkaam yugulillenguq.

¹¹ Akuzitni Igaqegkani igaqngaaq, “Kitum alngunak ugpeqegkumigu ellnga kaynguyugnaanghituq.”

¹² Allangughutngitut Jews‑etlu Greek‑etlu qayughllak ataasiiguq Ataneq, Atanqaa tamaghhaan. Quyasteghllagaqaa tamaghhaan tuqlughilghii ellmineng.

¹³ Katam Akuzitni Igaqegkani igaqngalghii, “Tamaghaghmi tuqlughilghii aatghakun Atanghem yugulillengyaghqaaguq.”

¹⁴ Iwernga naten yuget tuqlughlleqatgu ugpenghilkumeng? Naten ugpeghlleqat, nagaquunneghilkumeng? Natenllu nagaqughlleqat ungipaqistengunateng?

¹⁵ Naten yuget ungipaqilleqat ellnganeng wetku kayagtellengegkuyeng? Katam Akuzitni Igaqegkani igaqngalghii, “Pinighnaghhaghmeng itegiit tamaakut ungipaqilghiit Pinilghiineng Ungipaneng!”

¹⁶ Iwernga ilanginiita qaatkegkaqiit Pinilghiit Ungipat. Isaiah aaptekaaguq, “Ataneq, kitum ugpeqegkaqagu ungipaghput?”

¹⁷ Kina alngunak ugpeqillelgunaanghituq nagategpenani ungipameng Christ‑ameng ayuqelghiimeng.

¹⁸ Iwernga piiqsingaa Israel‑eghmiit nagaquunneghinniluki ungipameng? Aa‑a, nagaqupestaaqaagut. Akuzitni Igaqegkani igaqngalghii, “Mengit aghulaqumaat tamaghhaanun nunam; akuzitangitlu kenlengitnun nunam.”

¹⁹ Alla aapqughaallelguunga: Israel‑eghmiit liigikenghitatkii‑i Israel‑eghmiingunghilnguut ellngitlu Kiyaghneghem yukatkii? Aa‑a, liigikumiit. Sivukluku Kiyaghneghem Moses whaten pistaa: “Elpesinun aqinakesnaqanka Israel‑eghmiingunghilnguut. Israel‑eghmiingunghilngughteggun liigikigalngughteggun ugumiyugtesnaqamsi.”

²⁰ Taagken Isaiah tetugpenani aapghikaaguq whaten Kiyaghneghem pillghaneng, “Tamaakut ivaghimangilnguut whangamneng, naalkegkaqaatnga. Tamaakunun aaptinghilngughnun whangamneng, liitestekaagunga.”

²¹ Iwernga Israel‑meng Kiyaghneq whatenllu pikaaguq, “Aghnelqusighllak nengugutanka iiggenka qaatkusigalngughnunllu, kipullginaalghiinunllu whangamneng.”