Romans 1 - New Testament-et Akuzipigestun

¹ Ukut latat Paul‑meng pinguut; qepghaghtekaanga Jesus Christ‑am. Kiyaghneghem tuqluqaqaanga apostle‑ngulunga, nakmikegkaqaangallu ungipaqesqelluki Pinilghiit Ungipani.

² Ayumiq Kiyaghneghem akequsaqegkaqii taakut Pinilghiit Ungipat uuknaliqistemikun. Uuknaliqutkegkaqiit agleghnalghiitgun Akuzitetgun Igaqegkatgun.

³ Taakut Pinilghiit Ungipat Kiyaghneghem Ighneghaneng ayuqut. Yuguluni allgeqaaguq Umiilgem David‑em kingunghitgun.

⁴ Agleghnalghiim Taghnegham liigikestiinkut Ataneghput Jesus Christ‑a, Kiyaghneghem aghtughyaghqaanghilnguuguq Ighnegha. Taghnegham ipapighqegkaqaa unguvaghtesluku Jesus tuqulleghmeng.

⁵ Ellngakun nangllekellengumaanga apostle‑ngulunga. Tawaten Kiyaghneghem pikaqaanga tuqliisqelluki nunataghhaan yugi ugpeqesqellukullu, qaatkesqellukullu Christ‑a. Enkaam Christ‑am aatgha quulvallengellequq.

⁶ Elpesillu Rome‑emelngughni, Kiyaghneghem tuqluqaqiisi Jesus Christ‑amun pikesqellusi.

⁷ Qamagllusi elpesi Rome‑emelngughni Kiyaghneghem piniqegkiitni, tuqluqiitnillu yuknalusi: Kiyaghneghem Atamta, Atanghemllu Jesus Christ‑am kayusiillisi, nekeggmellelisillillu.

Yughii Iqamsiqayullghem

⁸ Sivukluku tamaghhaghpesinun iqamsiqayugvikaqa Kiyaghneqa Jesus Christ‑akun, qayughllak ungipaa ugpeqilleghpesi mingitnguuq yulghutnun tamaghhaani.

⁹ Pinaqelqa qamaglluku qepghaataqaqa Kiyaghneq, ungipaqnaluki Pinilghiit Ungipat Ighneghaneng ayuqelghiit. Kiyaghneq liisimakistekaqa quunpeng yughaatkengngukemsi.

¹⁰ Yughaghaqungallu Kiyaghneghmun piyukelqegkagu qenwatlu elpesinun piyaghqaalunga.

¹¹ Esghaghyupigtaqamsi quyastellelinnalusi Kiyaghneghem Taghneghagkeneng iknaqsuugtesqellusi.

¹² Whaten pingwaamsi: qerngaamta kayemutunnaluta, elpesi ugpeqillemkun, whanga ugpeqilleghpesigun.

¹³ Ugpeqaalgutemni, liisimakesugamsi awen laalighfiksugaqamsi iwernga saam quunpeng pinghitestaqaanga. Enkaam maaten kayusiisuganka Rome‑eghmiit ugpeghesqelluki Christ‑akun, ilangitnun Gentile‑enun pillemtun.

¹⁴ Kiyaghneghem nakmikegkaqaanga ungipaqesqelluki Pinilghiit Ungipat. Enkaam ungipaqsaghqaqanka tamaghhaanun, Greek‑enunllu Greek‑ngunghilngughnunllu, peghqineghnunllu nalluuqanunllu.

¹⁵ Enkaam whaa ungipaqiyugllaguunga Pinilghiineng Ungipaneng elpesinunllu kiyaghlleghhiini Rome‑emi.

Pinilghiit Ungipat Kiyaghneghem Aghtughyaghqaanghilqii Yugulilleghmun

¹⁶ Kayngukigatanka Pinilghiit Ungipat: Kiyaghneghem aghtughyaghqaanghilqii yugulilleghmun tamaghhaanun ugpeqilghiinun. Sivukluteng ungipaqegkaagut Jews‑enun taagken Gentile‑enun.

¹⁷ Taakut Pinilghiit Ungipat liigikestiinkut naten Kiyaghneghem nallghusaghaqutangi yuget elqughutngalleghminun. Ugpeqillghiniitgun Kiyaghneq tawaten piiquq. Katam Akuzitni Igaqegkani igaqngaaq, “Nallghughqegkaq Kiyaghneghem elqughutngallghanun kiyaghllequq neghyukluku ellnga.”

Kiyaghneghem Sakritelleghllaga

¹⁸ Qilagmeng Kiyaghneghem yuget liigikestii sakritutnguniluki, aghyuughlleqnilukillu seghleghqellghitnun, seghletunllu pillghitnun. Seghletun pillghita liigiknanightestiit Kiyaghneghem ipapillghaneng.

¹⁹ Sangwaa yuget liisimakegkaat Kiyaghneghmeng ayuqelghii whateghlluwaaghuuq ellngitnun qayughllak Kiyaghneghem whateghlluwaaghughtaa ellngitnun.

²⁰ Kiyaghneghem ulimatanganeng nuna, yuget liigikngwaaghaqaat aghtughyaghqaanghillgha aghuliighigalnguq, ipallu Kiyaghneghutanga. Qaywa yuget esghaghpagningiteghngaaghmegtekek taakuk, paninang liisimakagket Kiyaghneghem ulimaaghakun. Enkaam yuget apalliitut whaten pilleghqameng, Nallukaghput Kiyaghnelgutanga.

²¹ Liisimakeghngaaghmegteggu Kiyaghneq, quulviigataat Kiyaghneghuluku, iqamsiqayugvikigataatlu. Yeghlegi sumeghtaghallghit Kiyaghneghmeng satngunaniqaagut, umyugiitlu liigiknaniqaagut.

²² Peghqinghuniiqut iwernga nalluughtaqut.

²³ Enkaam manigughpenaan Kiyaghneq tuquyaghqaghhaanghilnguq, yeghlegi manigughaqiit kiyaghnengllaqateng yugsugnilnguut, qawaagsugnilnguut, teghikusaghsugnilnguut, nalighmeng nemeghyaghsugnilnguut.

²⁴ Tamaaken apalluqluku Kiyaghneghem pegtii atuqesqelluki nukeggnalghiit sex‑kun seghleghqellghet piyukeghllakiit. Enkaam atuqaqiit yugusiteng anagngaluki, seghleghqaqluteng sex‑kun ilameggnun,

²⁵ qayughllak ipapilleq Kiyaghneghmeng ayuqelghii naavghusimaat iqlengamun. Enkaangam manigughaqiitlu, qepghaataqiitlu Kiyaghneghem ulimaaghi, avelghaghluku Ulimaghista ellnga katam. Ellnganguuq usuqsaghqaq quunperugllak kenlengunaan! Amen.

²⁶ Tamaaken apalluqluku Kiyaghneghem pegtii atuqesqelluki seghleghqellghet piyukeghllakiit. Aghnat sex‑eyugnanighiit yuget, yeghlegi sex‑eyagutut aghnaalgutmeggneng.

²⁷ Tawateghpigaq yugetlu sex‑eyugnanighiit aghnat, yeghlegi sex‑eyaguteghllagtut yulgutmeggneng. Tawaten pikaatangitneng Kiyaghneghem aghyuughii yugusiitgun apalluqluki anaggutelleghllagit.

²⁸ Tamaakut yuget sumeghmeggni satngunghinniiqaat liisimakipiilleq Kiyaghneghmeng ayuqelghii. Enkaam Kiyaghneghem pegtii satngunghilngughnun sumeghtaghallghitnun, atughqaqenghisaqangitnunllu.

²⁹ Allaaghhinaghmeng seghleghmeng pimanginaghaqut, seghleghqaqut, pakigneghuut, ugumiketaghtutlu. Aqinaketaghtut, yugtaghyuneghtuut, pilluwaghyuneghtuut, puughtiyuneghtuut, sumeghtaghaatkaqiitlu ilateng seghlepiguluki. Yiillgiiqut,

³⁰ seghletun akuzitkaqiit ilateng. Ugumikaat Kiyaghneq, yukeghqenghuut, qukaayugneghuutlu. Sumeghtaghaghaqut wata seghletun pinaluteng; qaatkusigatut angayuqameggnun,

³¹ nalluut, akequsateng atuqigatiit, nangllegyugigatut, nafughtiitaqutlu ilameggnun.

³² Liisimakiit Kiyaghneghem Liilightuusii pilghiit tawatelnguut yuget allgeghsaghqaqaanꞌnguq tuqulleq. Nagneghutnginaghpenaki tamaakut atuqegkateng, talwa itagnaqaqiit tawaten pilghiit.