Revelation 1 - New Testament-et Akuzipigestun

¹ Whani igani igaqngaat Kiyaghneghem aliightekii Jesus Christ‑amun. Kiyaghneghem aliightekaqii ellnganun liigikestesqelluki qepghaghteni sangwaat piyaghtungestaghniluki. Enkaam Christ‑am kayagtekaqaa yaquleni qepghaghteminun John‑mun tamaakut liisimakesqelluki.

² Taagken John‑em aapqaqii qamaglluki esghaqanillu nagatkanillu. Nagatkaqii akuzitangi Kiyaghneghem, ungipaqlu Jesus Christ‑ameng ayuqelghii.

³ Quyastekaaguq atightulghii iglagtuluni akuzitangitneng uuknaliqellghem. Quyastekaagutlu nagalluteng qaatkullghiit qayughllak qantaghaqun tamaakut pillequt.

Jesus‑em Ungipaa Ugpeqanun Yughaghvignilngughnun

^4-6 Ukut latat John‑meng pinguut ugpeqanun qerngughutkayuget maaghraghvinlegni yughaghvigni Asia‑mi. Nangllegtalleqlu nekeggmelleqlu elpesinillik Kiyaghneghmeng, maaghraghvinlek taghneghaneng, Jesus Christ‑amengllu. Kiyaghneghuuq kiyaghlleghhii maaten, ellnganguuq kiyaghlleghhii sivunghani, ellnganguuq tagiyaghqaq. (Taakut maaghraghvinlek taghneghat sivunganitut Kiyaghneghem umiilgusiin aqumutaan.) Jesus Christ‑a ataasiighmelnguuguq liisimakista ipapilleghmun. Ellnganguuq Kiyaghneghem unguvaghsuwhaaqaa tuqulleghmeng. Ellnganguuq igleghutistengat umiilgita nunam. Ellnganguuq piniqilghii whangkunneng, aawmikunllu itemutkaqiinkut seghleghqellemnneng. Ataneghpagulleghminitestiinkut, priest‑ngughtestiinkutlu Kiyaghneghminun Atamun. Jesus Christ‑am allgeghllikek nighughqelleqlu, aghtughyaghqaanghilleqlu igleghutimun quunperugllak kenlengunaan! Amen.

⁷ Ii‑i! Jesus tagiiquq qilagwaagteggun. Tamaghhaghmi yugem esghaghlleqaat, talwa tamaakut panasqelluku pikiita esghaghlleqaat. Qamaglluteng nunam ramkengi qiyaaghuuteghllagllequt apalluqluku ellnga. Aa‑a, tamaakut piyaghqaagut! Amen.

⁸ “Whanga Alpha‑nguungallu Omega‑nguungallu,” piiq Ataneq Kiyaghneq, Aghtughyaghqaanghiteghllak. Ellnganguuq kiyaghlleghhii maaten, ellnganguuq kiyaghlleghhii sivunghani, ellnganguuq tagiyaghqaq.

John‑em Esghaghwaallgha Christ‑ameng

⁹ John‑nguunga, ugpeqaalgutkaghpesinga. Ikfiqunga elpesistun qayughllak Jesus‑em Ataneghpagullghan pikiinkut. Ellngakun ikfiqelleput nuqetutaput. Aglaghtestekaagunga qiighqamun aatqelghii Patmos‑meng qayughllak ungipaqegkenka Kiyaghneghem akuzitangi, ungipaqlu Jesus‑meng ayuqelghii.

¹⁰ Atanghem Aghneghani Agleghnalghiim Taghnegham iitghaanga. Taagken tunutemnilluku nagaqughaqa ma iglagtuqaq qalghightaatetun.

¹¹ Whaten piiq, “Igaqughqi igatgun esghaqaghten. Taagken tuyughnaketen ugpeqanun qerngughutkayugnun maaghraghvinlegni yughaghvigni: Ephesus‑melnguut, Smyrna‑melnguut, Perga‑melnguut, Thyatira‑melnguut, Sardis‑melnguut, Philadelphia‑melnguut, Laodicea‑melnguutlu.”

¹² Taagken qiivunga esghaghnaluku ma aleghqughteka. Qiivyalghiinga esghaghanka maaghraghvinleguftut gold‑et kenelghutat tunemiit.

¹³ Taawa qukiitni kina llangaqa ighnegha yugem akughtughllagegneng atkuyaaqeftuq, sakimagmikunllu tafsingaftuq gold‑meng.

¹⁴ Naasqwallu nuyaallu qateghpetuk wool‑estun nalighmeng anigustun, iiskeklu kenghem kumangallghatun ayuqlutek.

¹⁵ Itegii qelmeghsaqastun siilustun ayuqeftut pelungighsaqat keneghqun. Mengallu eftughllagatun meghllagem tevughallghan ayuqluni.

¹⁶ Aghenqigneghmineng tugumiiqeftii maagraghvinlek ighaleqetaaghet, qaanghanengllu aanuq savigpak inglugtun gginakek ipegsaqak. Gginaa nighugllak aghneghem qukaan siqinghuughtellghatun.

¹⁷ Esghaghyamkun itegaan manungakun uullghaghtunga tuqukastun. Iwernga aghenqigneghmineng iiggmineng saaflunga piinga, “Alingegpenang, whanga sivuliigungallu kinguliigungallu.

¹⁸ Unguvalghiinguunga! Tuqukaayaghtunga, iwernga ii‑i, unguvanguunga quunperugllak kenlengunaan. Key‑lguunga Tuqulleghmunllu Hades‑munllu.

¹⁹ “Saaqsin igaqughqi igatgun sangwaat qamaglluki esghaqeten maaten, sangwaatlu kinguvaqun piyaghqat.

²⁰ Esghaghaten maaghraghvinlek ighaleqetaaghet aghenqigneghma iigganilnguut, maaghraghvinleklu gold‑et kenelghutat tunemiit, taakut sameng pisiitangi salin qayvightellghitut. Whaten pisiigut: Maaghraghvinlek ighaleqetaaghet yaqulguut. Kiyaghneghem ungipaghtekii ugpeqanun qerngughutkayuget maaghraghvinlegni yughaghvigni. Maaghraghvinlek kenelghutam tunemii taakunguut maaghraghvinlek yughaghviget.